جنگيون ۽ خوداراديت واري حق کان انڪار عالمي نظام کي ڪمزور ڪري رهيو آهي: پاڪستان جي گڏيل قومن ۾ تنبيهه

گڏيل قومون-16 جنوري (اي پي پي) پاڪستان گڏيل قومن جي جنرل اسيمبليءَ کي خبردار ڪيو آهي ته وچ اوڀر، يورپ ۽ آفريقا ۾ جاري جنگيون خاص ڪري فلسطين ۽ ڪشمير ۾ خوداراديت واري حق کان انڪار عالمي نظام جي ساک کي نقصان پهچائي رهيا آهن. گڏيل قومن ۾ پاڪستان جي مستقل نمائندي عاصم افتخار احمد سيڪريٽري جنرل انتونيو گوتريش طرفان 2026ع لاءِ پيش ڪيل ترجيحن تي تبصرو ڪندي چيو ته گڏيل قومن جي سلامتي ڪائونسل جي قراردادن تي عملدرآمد يقيني بڻائڻ ۽ گڏيل قومن جي چارٽر تي ٻَڌل سموري طريقيڪار کي منصفاڻي ۽ پُرامن تڪرارن جي حل لاءِ ڪتب آڻڻ اڻٽر آهي. هن چيو ته پاڪستان سفارتڪاري، ٽياڪڙي ۽ امن سازيءَ جي ڀرپور حمايت ڪري ٿو. سندس چوڻ موجب گڏيل قومن موجب نيڪ نيتيءَ تي ٻَڌل خدمتن، اڳواٽ سفارتڪاري ۽ امن مشنز کي وڌيڪ مؤثر انداز ۾ استعمال ڪرڻ گهرجي ته جيئن ڇڪتاڻ کي وڌڻ کان روڪي سگهجي ۽ تڪرارن جو حل سياسي ذريعن سان ممڪن بڻائي سگهجي. هن چيو ته 2024ع جو گڏيل قومن جو پيڪٽ فار دي فيوچر گهڻ رُخي نظام تي اعتماد جي بحاليءَ لاءِ هڪ اهم خاڪو فراهم ڪري ٿو، جڏهن ته سيڪريٽري جنرل جو يو اين 80 انيشيئٽو اداري جي ڪارڪردگي بهتر بڻائڻ لاءِ آهي. هن زور ڀريو ته سڌارن کي صرف خرچن ۾ گهٽتائي يا گڏيل قومن جي بنيادي مينڊيٽس کي ڪمزور ڪرڻ تائين محدود نه ڪرڻ گهرجي پر امن، ترقي ۽ انساني حقن جي ٽنهي ٿنڀن کي هڪجهڙي اهميت ڏيڻ گهرجي. پاڪستاني سفير منصفاڻي قرض جاتي سڌارن، ڊجيٽل خال کي ختم ڪرڻ ۽ فوري ماحولياتي قدمن تي زور ڀريندي چيو ته پاڪستان سميت ڪمزور ملڪ لاڳيتو تباهي آڻيندڙ ٻوڏ، شديد گرمي ۽ پاڻيءَ جي کوٽ کي مُنهن ڏئي رهيو آهي. هن ماحولياتي مالي معاونت خاص ڪري موافقت لاءِ فنڊنگ ۽ لاس اينڊ ڊيميج فنڊ لاءِ وسيلا وڌائڻ کي اڻٽر قرار ڏنو. هن واضح ڪيو ته پاڻيءَ کي ڪڏهن به هٿيار طور بڻائڻ نه گهرجي، ڇاڪاڻ ته پاڻيءَ تائين رسائي بنيادي انساني حق ۽ بقا جو بنياد آهي جيڪو عالمي معاهدن خاص ڪري سنڌ طاس معاهدي جي پابندي جي اهميت کي اجاگر ڪري ٿو. پاڪستاني نمائندي چيو ته وڌندڙ فوجي خرچ ترقي جا وسيلا گهٽ ڪري رهيا آهن ۽ تباهه ڪندڙ جنگين جي خطرن ۾ اضافو ٿي رهيو آهي. هن سڀني رياستن لاءِ برابري ۽ خراب نه ٿيندڙ سلامتي جي بنياد تي هٿيارن جي خاتمي، ايٽمي هٿيارن جي گهٽتائي ۽ نئين اسلحه جاتي ٽيڪنالاجيز تي پابندين لاءِ نئين عالمي اتفاق راءِ جي ضرورت تي زور ڀريو.