قائداعظم جا فڪر ۽ اصول اڄ به قوم جي رهنمائي ڪري رهيا آهن ، پاڪستان جي ترقي قائداعظم جي اصولن تي عمل ڪرڻ سان ئي ممڪن آهي: سيد مراد علي شاهه

ڪراچي-25 ڊسمبر (اي پي پي)سنڌ جي وڏي وزير سيد مراد علي شاهه چيو آهي ته قائداعظم محمد علي جناحؒ جي زندگي عوامي خدمت، انصاف، آئين جي بالادستي ۽ قانون جي حڪمراني جا سنهري اصول سيکاري ٿي. پاڪستان جي ترقي قائداعظم جي اصولن تي عمل ڪرڻ سان ئي ممڪن آهي ۽ اسين سندس ويزن موجب هڪ مضبوط، منصفاڻي ۽ خوشحال پاڪستان جي تعمير لاءِ پرعزم آهيون. هو قائداعظم محمد علي جناحؒ جي 149هين سالگرهه جي موقعي تي مزارِ قائد تي حاضري کانپوءِ ميڊيا سان ڳالهائي رهيو هو جتي هن پاڪستان جي باني کي زبردست خراجِ عقيدت پيش ڪيو. سندس آمد تي صوبائي ڪابينا جي ميمبرن، صلاحڪارن، خاص مددگارن، چيف سيڪريٽري، انسپيڪٽر جنرل پوليس ۽ ٻين معزز شخصيتن وڏي وزير جو استقبال ڪيو. وڏي وزير مزار تي گلن جي چادر چاڙهي، فاتحه خواني ڪئي ۽ مهمانن جي ڪتاب ۾ پنهنجا تاثرات قلمبند ڪيا. سيد مراد علي شاهه چيو ته قائداعظم جا فڪر ۽ اصول اڄ به قوم جي رهنمائي ڪري رهيا آهن. پاڪستان جي بانيءَ جو اتحاد، ايمان ۽ نظم و ضبط جو ڏنل پيغام اڄ به اوترو ئي اثرائتو ۽ قابلِ عمل آهي جيترو اڳ هو. هن چيو ته قائداعظم جي جدوجهدِ حيات عوامي خدمت، انصاف، آئين ۽ قانون جي بالادستي جا اهم سبق ڏئي ٿي. هن چيو ته پاڪستان جي ترقي جو رستو قائداعظم جي اصولن تي عمل ڪرڻ ۾ آهي ۽ اسين سندس ويزن موجب هڪ مضبوط، منصفاڻي ۽ خوشحال پاڪستان جي تعمير لاءِ پرعزم آهيون. سندس چوڻ هو ته مزارِ قائد تي حاضري ديانتداري ۽ خلوص سان عوامي خدمت جي عزم جي تجديد آهي ۽ سنڌ حڪومت قائداعظم جي نظريي جي روشني ۾ عوامي ڀلائي جي مشن کي اڳتي وڌائي رهي آهي. بعد ۾ مزارِ قائد تي ميڊيا سان ڳالهائيندي وڏي وزير چيو ته قائداعظم جي 149هين سالگرهه تي مزارِ قائد تي حاضري ۽ بانيءِ پاڪستان کي خراجِ عقيدت پيش ڪرڻ سندس لاءِ اعزاز آهي. هن چيو ته قائداعظم جا اصول آئين پسندي، قانون جي حڪمراني، سماجي خدمت ۽ مساوات تي ٻڌل آهن ۽ اهي حڪمراني لاءِ بهترين رهنما اصول مهيا ڪن ٿا. هن زور ڀريو ته ملڪ کي قائداعظم جي اصولن موجب هلائڻو پوندو. وڏي وزير پنهنجي ڪابينا طرفان پوري قوم کي قائداعظم جي سالگرهه تي مبارڪباد پڻ ڏني. هن پاڪستان ۽ دنيا جي مسيحي برادري کي به سندن مذهبي تهوار تي مبارڪباد پيش ڪئي. قومي ڪاميابين جو ذڪر ڪندي سيد مراد علي شاهه چيو ته 2025ع جي ڪاميابين کان پوءِ ملڪ 2026ع ۾ نئين اميد ۽ عزم سان داخل ٿي رهيو آهي. هن قيامِ پاڪستان ۾ ڪردار ادا ڪندڙ سڀني شخصيتن کي خراجِ عقيدت پيش ڪيو جن ۾ شهيد لياقت علي خان به شامل آهن جن جي آخري آرامگاهه به مزارِ قائد جي ڀرسان واقع آهي. هن شهيد ذوالفقار علي ڀٽو جي خدمتن کي به ياد ڪيو جنهن پاڪستان کي ايٽمي طاقت بڻايو جڏهن ته شهيد محترمه بينظير ڀٽو جي ڪردار کي ساراهيو جنهن ميزائل ٽيڪنالاجي حاصل ڪري ملڪ جي دفاع کي مضبوط ڪيو. مراد علي شاهه صدرِ پاڪستان، وزيراعظم ۽ چيف آف ڊفينس فورسز کي خراجِ تحسين پيش ڪيو ۽ چيو ته پاڪستان پيپلز پارٽي جو چيئرمين بلاول ڀٽو زرداري ملڪ جي مستقبل جو ضامن آهي. هن دعويٰ ڪئي ته پاڪستان ڀارت کي نه صرف جنگ جي ميدان ۾ پر سفارتي ۽ سياسي محاذ تي به شڪست ڏني ۽ ان جي پروپيگنڊا کي ناڪام بڻايو. هن ڪشميري عوام جي حقِ خوداراديت جي حمايت جو ورجاءُ ڪيو ۽ عالمِ اسلام کي درپيش مسئلن تي افسوس جو اظهار ڪندي خاص طور اسرائيلي جارحيت سبب هزارين فلسطيني شهيد ٿيڻ تي ڏک جو اظهار ڪيو ۽ مسلم دنيا ۾ اتحاد جي ضرورت تي زور ڀريو. ترقياتي قدمن جو ذڪر ڪندي وزيراعليٰ چيو ته ٿر جي مقامي ڪوئلي مان بجلي پيدا ڪئي پئي وڃي. هن چيو ته بجلي گهرن کي پاڻي جي فراهمي لاءِ نبيسر کان ٿر ڪول فيلڊ تائين پاڻي پهچائڻ جو منصوبو شروع ڪيو ويو آهي. هن وڌيڪ چيو ته اين اي ڊي يونيورسٽي ۾ هڪ ٽيڪنالاجي پارڪ قائم ڪيو پيو وڃي. هن ان ڳالهه تي زور ڀريو ته ملڪ جي ترقي ۽ استحڪام لاءِ اتحاد لازمي آهي. مزارِ قائد تي هڪ باوقار ۽ سادي تقريب منعقد ڪئي وئي جنهن ۾ سينئر سرڪاري عملدارن ۽ معزز شخصيتن شرڪت ڪئي.