سنڌ پوليس 1843ع ۾ قائم ٿي، برصغير جي قديم ترين فورسز مان آهي، هن وقت هڪ لک 62 هزار اهلڪار 31 ضلعن ۾ 618 پوليس ٿاڻن ۽ لڳ ڀڳ 190 ارب رپين جي بجيٽ تي ذميواريون نڀائي رهي آهي: سيد مراد علي شاهه

ڪراچي-18 ڊسمبر (اي پي پي)سنڌ جي وڏي وزير سيد مراد علي شاهه سنڌ پوليس ۾ وڏن سڌارن ۽ ٽيڪنالاجي اپ گريڊيشن جو اعلان ڪندي چيو آهي ته انهن قدمن جي نتيجي ۾ سڄي صوبي ۾ امن امان جي صورتحال ۾ نمايان بهتري آئي آهي۔ وڏي وزير اهي ڳالهيون پاڪستان نيوي جي 55هين پي اين اسٽاف ڪورس ۽ 23هين ڪوريسپونڊنس اسٽاف ڪورس جي آفيسرن کي خطاب ڪندي ڪيون. جنهن جي قيادت ريئر ايڊمرل سهيل احمد عظمي، ڪمانڊنٽ پاڪستان نيوي وار ڪاليج ۽ ڪمانڊر سينٽرل پنجاب ڪري رهيو هو۔ وزيراعليٰ هائوس ۾ ٿيل تقريب ۾ صوبائي وزيرن، انسپيڪٽر جنرل پوليس ۽ صوبائي سيڪريٽرين پڻ شرڪت ڪئي۔ وڏي وزير ٻڌايو ته سنڌ پوليس جيڪا 1843ع ۾ قائم ٿي ۽ برصغير جي قديم ترين پوليس فورسز مان هڪ آهي، هن وقت هڪ لک 62 هزار اهلڪارن، 31 ضلعن ۾ قائم 618 پوليس ٿاڻن ۽ لڳ ڀڳ 190 ارب رپين جي بجيٽ تي مشتمل آهي۔ هن چيو ته فرض جي ادائيگي دوران 2553 اهلڪارن جي قرباني ڏيندڙ هن فورس کي ڍانچي، آپريشنز ۽ فلاح و بهبود جي شعبن ۾ جديد بنيادن تي اختيار ڪيو پيو وڃي۔ مراد علي شاهه چيو ته حڪومت پوليسنگ جي بنيادي يونٽ، يعني پوليس ٿاڻن تي خاص ڌيان ڏنو آهي هن ٻڌايو ته سئو کان وڌيڪ پوليس اسٽيشنن کي الڳ بجيٽ ڏني وئي آهي جڏهن ته ايس ايڇ اوز ۽ جاچ آفيسرن کي ڊي ڊي او جا اختيار ڏئي فيصلا سازي کي تيز ۽ احتساب کي بهتر بڻايو ويو آهي۔ وڏي وزير ٽيڪنالاجي تي ٻڌل ڪيترن ئي قدمن تي روشني وڌي۔ پوليس اسٽيشن رڪارڊ مينيجمينٽ سسٽم تحت سمورن ڪيسن جو رڪارڊ ڊجيٽل طور محفوظ ڪيو پيو وڃي جيڪو فرانزڪ، ڪيميڪل، ڊي اين اي ۽ ميڊيڪو ليگل ليبارٽرين سان گڏ عدالتي نظام سان پڻ ڳنڍيل آهي، جنهن ذريعي جج آن لائن ڪيسن جي اڳڀرائي ڏسي سگهن ٿا۔ هن ٻڌايو ته ٽول پلازن تي لڳايل مصنوعي ذهانت سان ليس ڪئميرائن تي ٻڌل سنڌ اسمارٽ سرويلنس سسٽم کي ڏوهاري ۽ ايڪسائيز ڊيٽا سان ڳنڍيو ويو آهي جنهن جي مدد سان سَوين ڏوھارين کي گرفتار ڪيو ويو۔ دهشتگردي جي خاتمي لاءِ جديد سي ٽي ڊي فيوزن سينٽر قائم ڪيو ويو آهي جيڪو اوپن سورس انٽيليجنس، بگ ڊيٽا ۽ جديد وڊيو ۽ آڊيو اوزار استعمال ڪري ٿو۔ ٻين نظامن ۾ هوٽل آئي مينيجمينٽ سسٽم شامل آهي جيڪو هوٽلن ۾ رهندڙ ماڻهن جو رڪارڊ رکي ٿو ۽ ڪيترين ئي گرفتاريُن ۾ مددگار ثابت ٿيو آهي۔ ايمپلائي ويريفڪيشن سسٽم بايوميٽرڪ ذريعي ملازمن جي تصديق ڪري ٿو جنهن جي نتيجي ۾ هزارين ڏوهاري پڪڙيا ويا آهن۔ “تلاش” ڊيوائس ذريعي آفيسر موقعي تي ئي بايوميٽرڪ تصديق سان ڪنهن به شخص جو رڪارڊ چيڪ ڪري سگهن ٿا۔ شفافيت وڌائڻ لاءِ گشت ۽ ٽريفڪ ڊيوٽي دوران باڊي وورن ڪئميرائون پڻ متعارف ڪرايون ويون آهن۔ وڏي وزير خاص يونٽن جو به ذڪر ڪيو جن ۾ سينٽرلائيزڊ انويسٽيگيشن سيلز شامل آهن جتي تربيت يافته جاچ آفيسر ۽ مخصوص ليبارٽريون موجود آهن۔ اسپيشل سيڪيورٽي يونٽ بين الاقوامي ڪرڪيٽ ۽ ٻين هاءِ رسڪ تقريبن جي سيڪيورٽي فراهم ڪئي۔ ريپڊ رسپانس فورس کي هنگامي حالتن ۽ خطرناڪ مشنز لاءِ تيار ڪيو ويو آهي۔ ڪرائوڊ مينيجمينٽ يونٽ جنهن ۾ عورتن جو ونگ پڻ شامل آهي ۽ سنڌ پوليس هاءِ وي پيٽرول کي اهم شاهراهن جي تحفظ لاءِ گاڏين ۽ افرادي قوت سان ليس ڪيو پيو وڃي۔ ٽريفڪ مينيجمينٽ بابت هن چيو ته آن لائن ڊرائيونگ لائسنس سسٽم، مصنوعي ذهانت تي ٻڌل اي-چالان پليٽ فارم متعارف ڪرايا ويا آهن۔ ڏوهن جي انگن اکرن جو حوالو ڏيندي وڏي وزير ٻڌايو ته جنوري 2024 کان نومبر 2025 تائين موبائيل ۽ گاڏين جي ڇنڊڇاڻ ۽ چوري جي واقعن ۾ 44 سيڪڙو کان وڌيڪ گهٽتائي آئي آهي، جڏهن ته ڌاڙن دوران فوتگين ۽ زخمين جي انگ ۾ 60 سيڪڙو کان وڌيڪ گهٽتائي رڪارڊ ڪئي وئي آهي۔ مراد علي شاهه ڪچي علائقن ۾ حڪمت عملي ۾ وڏي تبديلي جو ذڪر ڪندي چيو ته حڪومت ردعمل تي ٻڌل ڪارروائين بدران حملي، هٿيار ڇڏائڻ، غير مسلح ڪرڻ ۽ مکيه ڌارا ۾ آڻڻ واري فريم ورڪ تحت جارحاڻا قدم کنيا آهن۔ 2024 کان پوءِ سکر، گھوٽڪي، ڪشمور ۽ شڪارپور ۾ ٽيڪنالاجي جي مدد سان ڪيل ڪارروائين ۾ سَوين ڏوهاري مارجي ويا يا وري زخمي يا گرفتار ٿيا، وڏي مقدار ۾ هٿيار هٿ آيا ۽ سر جي قيمت وارن درجنين گهربل ڏوهارين هٿيار ڦٽا ڪيا۔ وڏي وزير چيو ته جنوري کان نومبر 2025 دوران پوليس منظم ڏوهن ۽ منشيات خلاف به ڀرپور مهم هلائي جنهن ۾ اعليٰ درجي جي منشيات فروشَن جي گرفتاريءَ جي شرح 89 سيڪڙو حاصل ڪئي وئي۔ هن زور ڀريو ته حڪومت پوليس جي فلاح و بهبود تي به ساڳئي شدت سان ڌيان ڏئي رهي آهي۔ شهيد اهلڪارن جي خاندانن کي وڏو مالي معاوضو، رٽائرمينٽ جي عمر تائين پگهارون، روزگار جا موقعا، صحت انشورنس، ٻارن لاءِ اسڪالرشپس ۽ شادين لاءِ نقد امداد فراهم ڪئي وڃي ٿي۔ انهن قدمن جو مقصد فورس جي قربانين کي مڃتا ۽ عزت ڏيڻ آهي۔ مستقبل جي منصوبن بابت ڳالهائيندي وڏي وزير چيو ته ڪراچي سيف سٽي منصوبي تحت 12 هزار سي سي ٽي وي ڪئميرائون قومي ڊيٽابيس سان ڳنڍيون وينديون ۽ عادي ڏوهارين جي اليڪٽرانڪ ٽيگنگ جهڙا وڏا ٽيڪنالاجي منصوبا نگراني ۽ ڏوهن جي روڪٿام کي وڌيڪ مؤثر بڻائيندا۔ هن وڌيڪ چيو ته سنڌ اسمارٽ سرويلنس سسٽم کي وڏن شهرن جي وڌيڪ داخلي ۽ خارجي رستن تائين وڌايو ويندو جنهن سان دهشتگردي، اسمگلنگ ۽ سرحد پار ڏوهن جي روڪٿام ۾ مدد ملندي۔ وڏي وزير چيو ته صوبائي حڪومت هڪ پروفيشنل، ٽيڪنالاجي سان ليس ۽ عوام دوست پوليس فورس جي قيام لاءِ پرعزم آهي ته جيئن هر شهري پاڻ کي محفوظ محسوس ڪري ۽ پوليس جي هر قرباني کي عزت ملي۔ سندس چوڻ مطابق دوري تي آيل آفيسرن بريفنگ کي ساراهيو ۽ پوليس جي جديدڪاري، عملي مؤثريت ۽ فلاح و بهبود ۾ ٿيندڙ اڳڀرائي کي تسليم ڪيو۔