قومي اسيمبلي ۾ 27 هين آئيني ترميم تي بحث ٻي ڏينهن به جاري رهيو، حڪومت ۽ اتحادي پارٽين پاران ترميم وقت جي ضرورت قرار

اسلام آباد-12 نومبر (اي پي پي) قومي اسيمبلي ۾ 27 هين آئيني ترميم تي بحث اربع تي مسلسل ٻي ڏينهن به جاري رهيو، حڪومت ۽ اتحادي پارٽين ترميمن کي وقت جي ضرورت قرار ڏنو جڏهن ته مخالف ڌر جي پارٽين جي ميمبرن مخالفت ڪئي. اجلاس ۾ 27 هين آئيني ترميم تي بحث ۾ حصو وٺندي پي پي پي جي ڊاڪٽر نفيسه شاهه چيو ته ترميمي بل جي ڪجهه شقن تي بحث ٿيڻ گهرجي ها تنهن هوندي به اسان جو موقف آهي ته سويلين سپريميسي تائين وڃڻ لاءِ اسان کي دستياب موقعن مان فائدو کڻڻ گهرجي، بائيڪاٽ آپشن نه هجڻ گهرجي، ماضي ۾ اسان 17 سيٽن سان به پنهنجو ڪردار ادا ڪيو. هن چيو ته 27 هين آئيني ترميم ۾ وفاقي ڍانچي ۽ وسيلن جي حوالي سان شقن جي پي پي پي مخالفت ڪئي ۽ هاڻي هو هن ترميمن جو حصو ناهن، اسان صوبائي خودمختياري تي ڪو به ٺاهه قبول نه ڪنداسين، ان جو ڪريڊٽ پي پي پي کي ڏيڻ گهرجي، اهڙي طرح چيف اليڪشن ڪميشن ڪمشنر جي مقرري، ايگزيڪيٽو ميجسٽريسي جي بحالي ۽ ٻٽي شهريت جي حوالي سان شقن جي به اسان مخالفت ڪئي ۽ هو انهن ترميمن جو حصو ناهن، ملڪي حالتن کي ڏسندي اسان آرٽيڪل 243 جي حمايت ڪئي، وفاقي آئيني عدالت جي قيام لاءِ پي پي پي جي جدوجهد رهي آهي، ججن جي بدلي کي شفاف بڻائڻ لاءِ لاڳاپيل قدم کنيا ويا آهن. هن چيو ته ڇوٽ جنگي هيروز لاءِ آهي ان جي مخالفت نه ٿيڻ گهرجي. هن جو چوڻ هو ته اسان کي سياسي ۽ ايڪٽوازم تي ٻڌل عدليه جي ضرورت ناهي. ارشد عبدالله ووهره چيو ته آئيني ترميمون پارلياماني جمهوريت ۽ طريقيڪار جو حصو آهن، ملڪ جي آبادي ۾ تيزي سان اضافو ٿيو ان جي بنياد تي وسيلن کي مخصوص ڪرڻ گهرجي.هن چيو ته ايم ڪيو ايم (پاڪستان) اختيارن جي هيٺين سطح تي منتقلي جي شرط تي حڪومت جي حمايت ڪئي، اختيارن جي هيٺين سطح تي منتقلي سان جمهوريت ۽ جمهوري ادارا مضبوط ٿيندا، آرٽيڪل 140 اي ۾ ترميم ٿيڻ گهرجي. چنگيز خان ڪاڪڙ چيو ته آئيني ترميم سان 1973ع جو آئين ڪمزور ٿيندو، ججن جي ٽرانسفر جي ترميم جي اسان مخالفت ڪريون ٿا. شهريار آفريدي چيو ته رياست جو شهرين سان آئين جي صورت ۾ سوشل ڪانٽريڪٽ هوندو آهي، جيواسٽريٽجڪ پوزيشن سبب پاڪستان جو عوام تڪليف مان گذري رهيو آهي. اسان جي هٿياربند فوج دهشتگردي جو ڀرپور انداز ۾ مقابلو ڪري رهي آهي، ان صورتحال جي ڏس ۾ قوم کي متحد رکڻ جي ضرورت آهي. هن چيو جيستائين ملڪ ۾ امن نه ايندو ان وقت تائين ملڪي مفادن جو تحفظ نٿو ڪري سگهجي. پارلياماني سيڪريٽري ميان خان بگٽي بحث ۾ حصو وٺندي چيو ته27 هين آئيني ترميم ڪنهن هڪ شخص لاءِ ناهي پر ملڪ ۽ قوم لاءِ آهي. هن چيو ته بلوچستان ۾ دهشتگردي اهي تنظيمون ڪري رهيون آهن جيڪي جبلن تي ويٺل آهن، اهي افغانستان ۽ ڀارت جون ايجنٽ بڻيل آهن، اهي ماڻهو ڳالهين تي يقين نٿا رکن. هن چيو ته محمود خان اچڪزئي پنهنجي تقرير ۾ چيو ته مخالف ڌر ڳالهيون ڪرڻ چاهي ٿي، وزيراعظم مخالف ڌر کي ڪيترائي ڀيرا ڳالهين جي دعوت ڏني پر اهي ماڻهو ڳالهين ۾ سنجيده ناهن. هن چيو ته ملڪ جي دفاع ۽ سرحدن جي حفاظت تي سياست نه چمڪائڻ گهرجي، مخالف ڌر پارٽين کي ان ترميم جي حمايت ڪرڻ گهرجي. اسامه احمد ميله چيو ته حڪمران اتحاد کي ميثاق جمهوريت تي مڪمل عملدرآمد ڪرڻ گهرجي ۽ ان کي رڳو آئيني عدالت تائين محدود نه رکڻ گهرجي، جيڪڏهن ميثاق جمهوريت کي پنهنجي اصل شڪل ۾ آئين جو حصو بڻايو وڃي ته اسان به ان جي حمايت ڪنداسين. پي پي پي جي شهلا رضا بحث ۾ حصو وٺندي چيو ته پاڪستان کي اندروني ۽ ٻاهريان خطرا ۽ چئلينجز درپيش آهن، هن وقت قومي مفاد کي اڳتي وڌائڻ لاءِ آئيني فريم ورڪ ۽ مضبوط دفاع ۽ وفاق کي مضبوط بڻائڻ ضروري آهي. هن چيو ته مخالف ڌر پارٽين کي ڪميٽي ۾ وڃي پنهنجو اخلاقي موقف ڏيڻ گهرجي ها، پر هنن اهو موقعو ضايع ڪري ڇڏيو، عوام کي انصاف جي جلد فراهمي لاءِ عدليه ۾ سڌارا ضروري آهن، آئيني ترميم ۾ ججن جي ٽرانسفر جو طريقيڪار شفاف بڻائڻ جي تجويز ڏني وئي آهي، سپريم ڪمانڊر لاءِ ڇوٽ جي تجويز ڪنهن فرد واحد لاءِ ناهي پر عهدي لاءِ آهي ان تي واويلا ڪرڻ جي ضرورت ناهي.