اي پي پي ميگا ڪرپشن ڪيس ۾ نامزد جوابدار فرقان راؤ جي گرفتاري کان اڳ ضمانت جي درخواست جي ٻڌڻي 2 آڪٽوبر 2025 تائين ملتوي

اسلام آباد-25 سيپٽمبر (اي پي پي) اسپيشل جج سينٽرل همايون دلاور جي عدالت اي پي پي (ايسوسيئيٽيڊ پريس آف پاڪستان) ميگا ڪرپشن ڪيس ۾ نامزد جوابدار فرقان راؤ جي گرفتاري کان اڳ ضمانت جي درخواست جي ٻڌڻي 2 آڪٽوبر 2025 تائين ملتوي ڪري ڇڏي آهي. خميس ڏينهن عدالتي عملي ٻڌايو ته جسٽس همايون دلاور اڊيالا جيل ۾ جاري جيل ٽرائل ۾ موجود آهي جنهن جي ڪري عدالت ۾ مقرر ڪيل سڀني ڪيسن جي ٻڌڻي ملتوي ڪئي وئي، جنهن جي ڪري فرقان راؤ جي گرفتاري کان اڳ ضمانت جي درخواست جي ٻڌڻي پڻ ملتوي ڪئي وئي. ياد رهي ته ايف آءِ اي (وفاقي جاچ ايجنسي) اي پي پي ميگا ڪرپشن ڪيس ۾ ڪل 16 ماڻهن خلاف ڪيس داخل ڪيو آهي، جن تي قومي خزاني کي ڪروڙين رپين جو نقصان پهچائڻ جو الزام آهي. عدالت هيستائين ڪيس ۾ 7 جوابدارن جي ضمانت جون درخواستون رد ڪري چڪي آهي، جنهن کانپوءِ اهي عدالتي حراست ۾ جيل ۾ قيد آهن. اي پي پي اسڪينڊل ۾ ملوث جوابدارن خلاف سرڪاري وسيلن جي غلط استعمال، مالي بدعنواني ۽ سرڪاري فنڊن جي غبن جهڙا سنگين الزام هنيا ويا آهن. ايف آءِ اي موجب جاچ دوران ٺوس ثبوت سامهون آيا آهن، جن جي بنياد تي قانوني ڪارروائي شروع ڪئي وئي. فرقان راؤ پڻ نامزد جوابدارن ۾ شامل آهي، جنهن گرفتاري کان بچڻ جي لاءِ عدالت سان رجوع ڪندي گرفتاري کان اڳ ضمانت جي درخواست داخل ڪئي آهي. عدالت ڪيس جي ايندڙ ٻڌڻي لاءِ 2 آڪٽوبر جي تاريخ مقرر ڪئي آهي، جتي فرقان راؤ جي درخواست تي وڌيڪ ڪارروائي ڪئي ويندي.