اسلام آباد – 16 – جولائي (اي پي پي) صدر آصف علي زرداري ضلعي آواران ۾ فتنه الهندستان جي خلاف ڪامياب آپريشن دوران 3 دهشتگردن کي جهنم ڀيڙو ڪرڻ تي سيڪيورٽي فورسز کي خراج تحسين پيش ڪيو آهي. ايوان صدر جي پريس ونگ پاران جاري بيان ۾ صدر انٽيليجنس تي ٻڌل ڪارروائي دوران فتنه الهندستان جي اسپانسرڊ دهشتگردن جو خاتمو ڪرڻ تي سيڪيورٽي فورسز جي بهادري کي ساراهيو. صدر ڪارروائي دوران شهادت ماڻيندڙ ميجر سيد رب نواز طارق شهيد کي خراج عقيدت پيش ڪيو ۽ چيو ته قوم پنهنجي بهادر شهيدن جي قربانين کي سدائين ياد رکندي. صدر شهيدن جي پونئيرن سان همدرديءَ جو اظهار ڪيو ۽ صبر جميل جي دعا ڪئي. صدر چيو ته دهشتگردي جي مڪمل خاتمي تائين سيڪيورٽي فورسز جون ڪارروايون جاري رهنديون، دهشتگرد عنصرن جي خاتمي ۽ ملڪي دفاع جي لاءِ اسان جو عزم مضبوط رهندو. هن فتنه الهندستان جي مڪمل خاتمي جي قومي عزم جو اظهار ڪيو.
