اسلام آباد-01 جولاءِ (اي پي پي) ناڻي بابت مملڪتي وزير بلال اظهر ڪياني چيو آهي ته وفاقي حڪومت معاشي ميدان ۾ نمايان ڪاميابيون حاصل ڪندي نه صرف مهانگائي تي ضابطو آڻي معيشت کي استحڪام ڏنو پر ايندڙ مالي سال ۾ حڪومت جو هدف ايڪسپورٽ ليڊ گروٿ ۽ پرڏيهي مٽاسٽا جي ناڻي جي ذخيرن ۾ واڌ آهي ته جيئن آءِ ايم ايف تي ڀاڙڻ کي ختم ڪري سگهجي. پريس ڪانفرنس کي خطاب ڪندي مملڪتي وزير چيو ته جڏهن 2022ع ۾ موجوده حڪومت اقتدار ۾ آئي ته ملڪ ۾ مهانگائيءَ جي شرح 28 سيڪڙو هئي جڏهن ته حڪومت 12 سيڪڙو تائين گهٽتائي جو هدف مقرر ڪيو هو، الحمدلله اها شرح مالي سال 25-2024ع جي پڄاڻيءَ تي صرف 4.5 سيڪڙو رهي. هن ٻُڌايو ته جون 25ع جي مهيني ۾ مهانگائي جي شرح فقط 3.2 سيڪڙو رڪارڊ ڪئي وئي، جيڪا گذريل ڪيترن ئي سالن جي گهٽ ترين سطح آهي. هن چيو ته مهانگائي ۾ ان نمايان گهٽتائي جو سڌيءَ ريت اثر پاليسي ريٽ تي به پيو جيڪو 22 سيڪڙو کان گهٽ ٿي 11 سيڪڙو تي اچي ويو. اها شرح سيڙپڪاري کي هٿي ڏيڻ ۽ معاشي سرگرمين جي بحاليءَ لاءِ نهايت موزون آهي. هن چيو ته وقت سر قدم کڻندي آءِ ايم ايف سان 3 سالن جو معاهدو ڪيو ويو، جنهن سان معيشت جا ميڪرو اڪنامڪ بنياد مضبوط ٿيا. هن ٻُڌايو ته عوامي خدشن جي مخالفت ۾ ڪو مِني بجيٽ نه آندو ويو ۽ نه ئي مالياتي هدفن جي نافرماني ڪئي وئي. هن چيو ته اسان آءِ ايم ايف پروگرام تحت سڀ کان اهم هدف يعني پرائمري سرپلس حاصل ڪيو جيڪو ان ڳالهه جو ثبوت آهي ته اسان جي مالي حڪمت عملي اثرائتي رهي آهي. هن ٻُڌايو ته ايف بي آر گذريل مالي سال ۾ 26 سيڪڙو روينيو گروٿ حاصل ڪئي جيڪا هڪ وڏي ڪاميابي آهي. هن چيوته پاڪستان جو ڪرنٽ اڪائونٽ گذريل مالي سال ۾ 8 ارب ڊالر سر پلس رهيو جڏهن ته 25ع تائين پرڏيهي مٽاسٽا جي ناڻي جا ذخيرا 14 ارب ڊالرن تائين پهچي چڪا آهن. هن چيو ته اهوئي اُهو عنصر هو جيڪو پاڪستان کي ماضيءَ ۾ بار بار آءِ ايم ايف وٽ وٺي ويو پر هاڻي حڪومت ان مسئلي تي ضابطو آڻي ورتو آهي. هن چيو ته وزيراعظم محمد شهباز شريف جي اڳواڻيءَ ۾ حڪومت هاڻي ايڪسپورٽ ليڊ گروٿ جي حڪمت عمليءَ تي عمل پيرا آهي. هن چيو ته اسان اهڙي معيشت جي تعمير چاهيون ٿا جيڪا نه صرف پاڻڀري هجي پر پرڏيهي ناڻو ڪمائڻ جي صلاحيت به رکندي هجي. هُن اِن ڳالهه تي زور ڀريو ته اهڙي پائيدار ترقيءَ ذريعي هر شهري کي ان جا ثمر حاصل ٿيندا ۽ عوام جي زندگين ۾ حقيقي بهتري ايندي. مملڪتي وزير چيو ته 26-2025ع جي بجيٽ ۾ جتي مالياتي نظم و ضبط ۽ ترقياتي هدفن تي زور ڀريو ويو آهي اتي عوام کي سڌيءَ ريت رليف فراهم ڪرڻ لاءِ به قدم کنيا ويا آهن. هن چيو ته حڪومت جي ڪوشش آهي ته پاڪستان کي ٻيهر آءِ ايم ايف تي ڀاڙڻ جي ضرورت نه پوي ۽ اهو تڏهن ئي ممڪن آهي جڏهن اسان پنهنجو روانگي واپار وڌائي ڊالر ڪمائڻ جي صلاحيت کي وسعت ڏينداسين. ان موقعي تي ايف بي آر چيئرمين راشد محمد لنگڙيال چيو ته موجوده حڪومت جو واضح پيغام آهي ته ملڪ جي معاشي نظام کي هلائيندڙ ٽيڪس ڏيندڙ ئي اسان جي اصل ترجيح آهن ۽ ساڻن عزت ۽ احترام وارو سلوڪ ڪيو ويندو. پهرين جولاءِ کان شروع ٿيل نئين مالي سال کي ايف بي آر ”ٽيڪس پيئرز جو سال“ طور ملهائيندو. هن چيو ته جهڙيءَ طرح ڪنهن ڪارپوريٽ اداري لاءِ ان جا ڪلائينٽس اهم هوندا آهن اهڙيءَ طرح ايف بي آر لاءِ ٽيڪس ڏيندڙ سڀ کان اهم آهن، اسان سندن احترام ڪريون ٿا ۽ سمجهون ٿا ته اهي معاشري جا شهري نمائندا آهن. هن چيو ته گذريل مالي سال ۾ اداري ۾ ڪيترائي سڌارا ڪيا ويا جن جو مقصد داخلي نظام ۾ شفافيت، ايمانداري ۽ ڪارڪردگيءَ کي بهتر بنائڻ آهي. هن چيو ته اسان ايف بي آر ۾ احتساب، سينٽرل اسٽرڪچر جي بهتري ۽ ايمانداريءَ جي ڪلچر کي هٿي ڏيڻ تي ڪم ڪيو آهي، انهن سمورن سڌارن جو بنيادي مقصد اهو آهي ته ڪنهن به ٽيڪس ڏيندڙ کي غير ضروري تنگ نه ڪيو وڃي. هن واضح ڪيو ته سمورن ايف بي آر آفيسرن کي هدايت جاري ڪئي وئي آهي ته هو ٽيڪس ڏيندڙن لاءِ هر وقت دستياب هجن ۽ ڪنهن کي ملاقات لاءِ اڳواٽ وقت وٺڻ جي ضرورت نه پوي. هن چيو ته هلندڙ سال سمورين آفيسن خاص طور تي چيف ڪمشنرز، ڪليڪٽرز ۽ ٻين اعليٰ آفيسرن جون آفيسون ٽيڪس ڏيندڙن لاءِ کُليل هونديون، ان حوالي سان هدايت ڪئي وئي آهي ته جيئن شهري بنا ڪنهن رنڊڪ جي ان مان سڌيءَ ريت ڳالهيون ڪري سگهن. چيئرمين واضح ڪيو ته فنانس بل 2025ع ۾ ايف بي آر کي ڪجهه اختيار ڏنا ويا آهن پر ان جي غلط استعمال جي هرگز اجازت نه ڏني ويندي، اسان پنهنجي ٽيم کي واضح طور تي ٻُڌايو آهي ته جيڪڏهن ڪنهن آفيسر انهن اختيارن جو غلط استعمال ڪيو ته سندن خلاف سخت ڪارروائي ڪئي ويندي. هن چيو ته ڪرمنل ڪارروائي جو مقصد هاڻي ٽيڪس ريڪوري ناهي پر صرف فراڊ ۽ سنگين بي ضابطگين کي روڪڻ آهي. چيئرمين ان ڳالهه تي زور ڀريو ته 95 سيڪڙو کان وڌيڪ ٽيڪس ڏيندڙ ديانتداري سان ٽيڪس ادا ڪن ٿا ۽ ان لاءِ ايف بي آر جو رويو دوستاڻو هئڻ گهرجي. چيئرمين ٻُڌايو ته ايندڙ حصي ۾ هو گذريل مالي سال 25-2024ع ۾ ايف بي آر جي ڪارڪردگي جا تفصيل به فراهم ڪندو جنهن ۾ 26 سيڪڙو روينيو گروٿ ۽ ٻيا سڌارا شامل آهن.
