واشنگٽن_16 فيبروري(اي پي پي) آمريڪا دعوي ڪئي آهي ته ان ايران مان ايندڙ جديد روايتي هٿيارن ۽ امداد جي کيپ ضبط ڪئي آهي. ميڊيا رپورٽن موجب وچ اوڀر ۾ آمريڪي سينٽرل ڪمانڊ ايڪس تي جاري بيان ۾ چيو آهي ته اها کيپ 28 جنوري تي عربي سمنڊ ۾ ضبط ڪئي وئي هئي جنهن کي يمن ۾ حوثين جي ڪنٽرول وارن علائقن طرف منتقل ڪيو پئي ويو،سٽ ڪام هٿيارن جون تصويرون پوسٽ ڪندي لکيو آهي ته ان کيپ ۾ وچولي مفاصلي تائين مار ڪندڙ بليسٽڪ ميزائلن جا جزا ۽ ٻيو فوجي سامان شامل هو،آمريڪي سينٽرل ڪمانڊ جي ڪمانڊر ايرڪ ڪوريلا جي حوالي سان چيو آهي ته اهو خطي ۾ ايران جي بدنيتي تي مشتمل سرگرمين جو هڪ ٻيو مثال آهي،هن نشاندهي ڪئي ته ايران پاران حوثين کي جديد روايتي هٿيارن جي فراهمي عالمي قانون جي سڌي ريت خلاف ورزي آهي اها صورتحال عالمي جهاز راني کي نقصان پهچائي رهي آهي، واضع رهي ته غزه جنگ شروع ٿيڻ کان پوءِ احمر سمنڊ ۾ عالمي جهاز راني جي اچ وڃ ۾ رڪاوٽ آئي آهي ڇاڪاڻ ته حوثي گروپ واپاري سامونڊي جهازن کي نشانو بڻائي رهيا آهن.
