ايشين گيمز 2026ع، والي بال ڪوارٽر فائنل ۾ پاڪستان جو تاريخي ڪارنامو، ڀارت کي هڪ طرفي مقابلي ۾ 0-3 تان شڪست ڏئي پهريون ڀيرو سيمي فائنل ۾ داخل

ناگويا-01 آڪٽوبر (اي پي پي) جاپان جي شهر ايچي ناگويا ۾ جاري 20 هين ايشيائي راندين جي مردن جي والي بال ايونٽ ۾ پاڪستان شاندار ۽ جارحاڻي راند جو مظاهرو ڪندي روايتي حريف ڀارت کي هڪ طرفي مقابلي کانپوءِ اسٽريٽ سيٽس ۾ 0-3 تان شڪست ڏئي ڇڏي. هن يادگار فتح جي ڪري قومي شاهين ايشين گيمز جي تاريخ ۾ پهريون ڀيرو سيمي فائنل ۾ پهچي ويا آهن، جنهن کي قومي والي بال جي تاريخ ۾ هڪ سونهري باب قرار ڏنو پيو وڃي. ڪوارٽر فائنل جي هن مقابلي ۾ پاڪستان شاندار حڪمت عملي، مضبوط دفاع ۽ تيز رفتار اسميشز ذريعي ڀارتي ٽيم کي ڪنٽرول سنڀالڻ جو ڪو به وقت نه ڏنو ۽ ميچ اسٽريٽ سيٽس ۾ 19-25، 23-25 ​​۽ 18-25 جي اسڪور سان پنهنجي نالي ڪري ورتي. ميچ ۾ مراد خان وزير شاندار ڪارڪردگي سان ٽاپ اسڪور رهيو، جڏهن ته عثمان فرياد علي، حماد ارشاد، مصور خان ۽ آفاق خان پڻ شاندار راند جو مظاهرو ڪري فتح ۾ اهم ڪردار ادا ڪيو. روايتي مخالف خلاف ڪلين سوئيپ فتح ۽ تاريخ ۾ پهريون ڀيرو سيمي فائنل ۾ پهچڻ تي پاڪستان والي بال فيڊريشن جي قيادت ٽيم کي زبردست خراج تحسين پيش ڪيو آهي. پاڪستان والي بال فيڊريشن جي چيئرمين چوڌري محمد يعقوب (اڳوڻو آءِ جي پوليس) قومي ٽيم ۽ پوري قوم کي هن تاريخي فتح تي دلي مبارڪون ڏيندي چيو ته رانديگرن پنهنجي غير معمولي عزم ۽ همت سان سڄي دنيا ۾ ملڪ جو سر فخر سان بلند ڪري ڇڏيو آهي. هوڏانهن پاڪستان والي بال فيڊريشن جي صدر سهيل خاور مير پڻ رانديگرن جي اڻٿڪ محنت کي ساراهيندي پوري قوم کي ڪاميابي جون مبارڪون ڏنيون ۽ اميد ظاهر ڪئي ته قومي والي بال ٽيم سيمي فائنل ۾ به ساڳيو عزم برقرار رکندي ۽ ملڪ لاءِ ميڊل حاصل ڪندي.