لبنان ۾ اسرائيلي هوائي حملي ۾ وڏي پيماني تي تباهي، ٻن ڏينهن ۾ گهٽ ۾ گهٽ 45 ماڻهو مارجي، 100 کان وڌيڪ زخمي

بيروت-19 مارچ (اي پي پي) لبنان جي ڏکڻ پاسي اسرائيلي هوائي حملي ۾  وڏي تباهي ٿي آهي. گذريل ٻن ڏينهن ۾ گهٽ ۾ گهٽ 45 ماڻهو مارجي ۽ 100 کان وڌيڪ زخمي ٿيا آهن، جن ۾ ٻار به شامل آهن. الجزيره مطابق، اسرائيلي هوائي حملي ۾ ڏکڻ لبنان جي شهر برج الشمالي ۾ هڪ گهر کي نشانو بڻايو ويو. ان کان سواءِ انهن اسرائيلي سرحد جي ويجهو  وارن شهرن جي داخلي رستن تي به گولا فائر ڪيا ويا . اسرائيلي جنگي جهازن رات جو ڏکڻ ۾ جيزين ضلعي ۾ السريرا ۾ گهرن جي ويجهو ٻه هوائي حملا ڪيا، جڏهن ته خيام، بنت جبيل ۽ مفدون شهر جي ويجهو علائقن تي به حملن جو اطلاع مليو آهي. اسرائيل پاران گادي واري هنڌ  بيروت جي اوڀر ۾ بعلبيڪ ۽ ڏکڻ ۾ سيدون ۾ پڻ حملا ڪيا ويا. ان دوران، حزب الله دعويٰ ڪئي ته ڏکڻ لبنان ۾ سندن پاران 6 اسرائيلي ٽينڪ تباهه ڪيا ويا آهن. حزب الله چيو ته حملو ان وقت ٿيو جڏهن اسرائيلي فوج طيبه شهر ۾ اڳڀرائي جي ڪوشش ڪئي. لبنان جي اختيارين موجب، 2 مارچ کان وٺي اسرائيلي حملن ۾ گهٽ ۾ گهٽ 968 ماڻهو مارجي ويا آهن. صحت جي عالمي تنظيم موجب، مارجي ويلن مان 100 کان وڌيڪ ٻار هئا. گڏيل قومن خبردار ڪيو آهي ته لبنان ۾ اسرائيلي حملن ۾ واڌ ملڪ جي هڪ لک کان وڌيڪ ماڻهن کي بي گهر ڪيو ويو آهي، جن مان تقريباً ٽيون حصو ٻار آهن.