افغانستان جي سرزمين دهشتگرد حملن جي لاءِ استعمال ڪئي پئي وڃي: پاڪستان

اسلام آباد – 11 ڊسمبر (اي پي پي) پاڪستان پنهنجي ان موقف کي ٻيهر ورجايو آهي ته افغانستان جي سرزمين دهشتگرد حملن جي لاءِ استعمال ڪئي پئي وڃي جنهن ۾ ڀارت جي ملوث هجڻ جا واضح اشارا مليا آهن، افغان قيادت پنهنجي سرزمين جي ان غلط استعمال کي ختم ڪرڻ جي لاءِ لکت ۾ خاطري ڪرائي. پرڏيهي آفيس جي ترجمان طاهر حسين اندرابي پريس بريفنگ ۾ ڪابل ۾ عالمن جي هڪ اجتماع پاران منظور ڪيل قرارداد بابت سوال جو جواب ڏيندي ان ڳالهه تي زور ڏنو ته افغانستان جي سرزمين ڪنهن ٻئي ملڪ کي خطرو يا نقصان پهچائڻ جي لاءِ استعمال نه ٿيڻ گهرجي. ترجمان قرارداد کي مثبت اڳڀرائي قرار ڏيندي صورتحال جي سنگيني جي احساس جي آجيان ڪئي جڏهن ته هن چيو ته ماضي ۾ به اهڙي قسم جي واعدن جو اظهار ڪيو ويو هو پر اهي پورا نه ٿيا. هن چيو ته افغانستان سان ڳالهه ٻولهه ۽ ڀائر ملڪن جي ثالثي جي ڪوششن دوران پاڪستان افغانستان کان لکت ۾ خاطري تي اصرار ڪيو هو. پرڏيهي آفيس جي ترجمان چيو ته يقيني طور تي اسان کي ان معاملي تي افغان قيادت سان لکت ۾ خاطري جي ضرورت پوندي. هڪ سوال جي جواب ۾ ترجمان چيو ته ٽي ٽي پي، فتنه الخوارج ۽ فتنه الهندستان سميت دهشتگرد عنصر جيڪي افغان سرزمين تان آپريٽ ڪري رهيا آهن، کي ڀارت جي سرگرم حمايت حاصل آهي. هن ميڊيا کي ٻڌايو ته پاڪستان ۾ دهشتگردي جي سرپرستي ۾ ڀارت جي ملوث هجڻ بابت پاڪستان وٽ دستاويزي ثبوت موجود آهن، ڪلڀوشن ياديو ۽ جعفر ايڪسپريس تي حملو اهڙن ڪيترن ئي مثالن ۾ شامل آهي. ڀارت پاران غيرقانوني طور تي قبضي هيٺ ڄمون ۽ ڪشمير ۾ انساني حقن جي خلاف ورزين جو ذڪر ڪندي هن چيو ته گڏيل قومن جي انساني حقن جي ماهرن ۽ عالمي حقن جي ادارن جون رپورٽن والاريل ڪشمير ۾ وسيع پئماني تي ٿيندڙ خلاف ورزين کي منظرعام تي آندو آهي جنهن ۾ تازي پهلگام حملي کانپوءِ اٽڪل 2800 ماڻهن جون گرفتاريون پڻ شامل آهن. هن چيو ته ڪشميري عوام جو فتح نه ٿيڻ خودمختياري جو حق گڏيل قومن جي سلامتي ڪائونسل جي ايجنڊا ۾ شامل آهي. ترجمان ان ڳالهه جو ورجاءُ ڪيو ته ڪشمير بابت گڏيل قومن جي سلامتي ڪائونسل جي لاڳاپيل قراردادن موجب پاڪستان ڪشميرين جي خودمختياري جي حق کي مڪمل طور تي حاصل ٿيڻ تائين اڻٿڪ اخلاقي، سياسي ۽ سفارتي حمايت جاري رکندو. ترجمان انڊونيشيا جي صدر پرابوو سوبيانتو جي ٻن ڏينهن جي اسلام آباد جي دوري جو ذڪر ڪندي چيو ته ان ۾ ٻطرفي دفاعي تعاون ۽ غزه جي صورتحال تي خيالن جي ڏي وٺ ڪئي وئي. هن چيو ته عالمي استحڪام فورس ۾ حصو وٺڻ ڪنهن به ملڪ جو خودمختيار فيصلو هوندو، جيستائين پاڪستان جو تعلق آهي اهڙو خودمختيار فيصلو اڃا تائين ناهي ڪيو ويو. طاهر حسين اندرابي چيو ته پاڪستان انساني همدرديءَ جي بنياد تي امداد جي بنا ڪنهن رڪاوٽ جي چرپر فراهم ڪرڻ جي خواهش تحت افغانستان کي انساني امداد جي منظوري ڏئي ڇڏي آهي ۽ اهو طالبان تي آهي ته اهي ان کي حاصل ڪن. سارڪ جي عمل کي ڀارت پاران روڪڻ کي افسوسناڪ قرار ڏيندي هن چيو ته پاڪستان گهڻ رخي جي لاءِ پرعزم آهي ۽ هو ڏکڻ ايشيا ۾ ترقي، خوشحالي ۽ رابطن کي مضبوط بڻائڻ جي لاءِ ڪنهن به قدم جي آجيان ڪندو. ترجمان وفاقي گهرو وزير سيد محسن نقوي پاران ڪجهه ماڻهن جي حوالگي جي لاءِ برطانوي عملدارن سان ڳالهه ٻولهه بابت پڇڻ تي چيو ته اڃا تائين پاڪستان ۽ برطانيا جي وچ ۾ حوالگي جو ڪو باقاعده معاهدو نه آهي جڏهن ته هن چيو ته باضابطا معاهدي جي عدم موجودگي ۾ حوالگي جي ڪيسن کي ڪيس ٽو ڪيس جي بنياد تي هلائي سگهجي ٿو. هن نائب وزيراعظم محمد اسحاق ڊار جي ايران جي پرڏيهي وزير عباس عراقچي ۽ سعودي پرڏيهي وزير شهزاده فيصل بن فرحان السعود سان ٿيندڙ ٽيليفونڪ ڳالهه ٻولهه کان پڻ ميڊيا کي آگاهه ڪيو جنهن ۾ هن ٻطرفي ۽ علائقائي معاملن تي خيالن جي ڏي وٺ ڪئي. ترجمان ڀارتي پرڏيهي وزير جي پاڪستان مخالف ريمارڪس کي رد ڪندي ان کي انتهائي اشتعالانگيز، بي بنياد ۽ غيرذميواراڻو قرار ڏنو ۽ چيو ته پاڪستان جا ادارا بشمول هٿياربند فوج قومي سلامتي جا ٿنڀ آهن ۽ اهي ملڪ جي خودمختياري ۽ علائقائي سالميت جي تحفظ جي لاءِ پرعزم آهن. هن چيو ته مئي 2025ع جي تڪرار پاڪستان جي هٿياربند فوج جي پيشيواراڻي مهارت سان گڏوگڏ ملڪ ۽ پاڪستاني عوام جي ڪنهن به ڀارتي جارحيت جي خلاف مناسب، موثر ۽ ذميواراڻي انداز ۾ دفاع ڪرڻ جي عزم جو واضح ثبوت ڏنو. ترجمان چيو ته ڀارتي قيادت پاران پاڪستان جي رياستي اداري ۽ ان جي قيادت کي بدنام ڪرڻ جي ڪوشش هڪ پروپئگنڊه مهم جو حصو آهي جيڪا خطي ۽ ان کان ٻاهر ڀارت جي غيرمستحڪم ڪاررواين سان گڏوگڏ پاڪستان ۾ ان جي رياستي سرپرستي ۾ دهشتگردي تان ڌيان هٽائڻ جي لاءِ ٺاهي وئي آهي.