وفاقي وزير رانا تنوير حسين سان ڪئنيڊا جي هاءِ ڪمشنر جي ملاقات

اسلام آباد-10 ڊسمبر (اي پي پي) قومي غذائي تحقيق ۽ تحفظ واري وفاقي وزير رانا تنوير حسين سان پاڪستان بابت ڪئنيڊا جي هاءِ ڪمشنر طارق علي خان ملاقات ڪئي، جنهن ۾ پاڪستان ۽ ڪئنيڊا وچ ۾ زرعي شعبي ۾ ٻه طرفي سهڪار کي هٿي وٺرائڻ، اهم زرعي جنسن جي منڊين تائين پهچ ۾ بهتري ۽ جاري فائيٽو سينيٽري ۽ فني سهڪار کي اڳتي وڌائڻ تي خيالن جي ڏي وٺ ڪئي وئي. وفاقي وزير هاءِ ڪمشنر جي آجيان ڪندي پاڪستان طرفان ڪئنيڊا سان زرعي رابطن کي وڌيڪ مضبوط بنائڻ جي عزم جو اظهار ڪيو. هن اعتراف ڪيو ته پائيدار زراعت، جديد فوڊ پروڊڪشن سسٽمز ۽ سائنسي بنيادن تي ٻَڌل ريگيوليٽري ڍانچي جي حوالي سان ڪئنيڊا عالمي سطح تي خاص حيثيت رکي ٿو ۽ پاڪستان ڪئنيڊا جي تجربن مان فائدو کڻڻ چاهي ٿو. رانا تنوير حسين مارڪيٽ تائين پهچ جي مسئلن جي حل جي اهميت تي زور ڀريندي چيو ته ڪئنيڊا مان ڪينو جو آمدني واپار پاڪستان جي زرعي ضرورتن جو اهم حصو آهي، تنهنڪري ان سلسلي ۾ وقت سر سرٽيفڪيشن ۽ رجسٽريشن جي عمل کي يقيني بنائڻ ضروري آهي. هن اهو به واضح ڪيو ته پاڪستان پنهنجي زرعي روانگي واپار کي ڪئنيڊين مارڪيٽ تائين هٿي ڏيڻ چاهي ٿو جنهن ۾ انبن، چانورن، ڪينو، کجور، حلال گوشت، جيليٽن، رڍن جا آنڊا ۽ پروسيس ٿيل ڪڪڙ جو گوشت شامل آهي. وفاقي وزير چيو ته پاڪستان ڪئنيڊا سان پنهنجي حلال شين جي روانگي واپار کي وڌائڻ لاءِ پُرعزم آهي ۽ ان سلسلي ۾ حلال جيليٽن، آنڊن ۽ ويليو ايڊڊ پولٽري شين لاءِ سي ايف آءِ اي جي سرٽيفڪيشن عمل ۾ تيزيءَ جي ضرورت آهي. وفاقي وزير زرعي شعبي جي جديد ڪاري ۽ عالمي گهرجن جي تڪميل لاءِ ڪئنيڊا فني معاونت جي ضرورت تي پڻ زور ڀريو. هن ٻُڌايو ته پاڪستان کي ايمبريو ٽرانسفر ٽيڪنالاجي، امپورٽ رسڪ اسيسمينٽ جي تربيت ۽ جانورن جي صحت بابت جديد ڄاڻ واري نظام جي قيام لاءِ مدد گهربل آهي. هن ڪئنيڊا کان درخواست ڪئي ته پاڪستان کي BSE negligible risk ڊوزيئر جي تڪميل ۽ ايف ايم ڊي ڪنٽرول پروگرام کي هٿي وٺرائڻ ۾ پڻ مدد فراهم ڪئي وڃي ته جيئن پاڪستان کي عالمي مارڪيٽن ۾ بهتر رسائي ملي سگهي. هن واضح ڪيو ته پاڪستان سائنسي بنيادن تي واپار جو حامي آهي ۽ فائيٽو سينيٽري انتظامن بابت فيصلا ميدان ۾ ڪيل مستند جائزن ۽ مضبوط رسڪ ايويليو ايشن تي ٻَڌل هئڻ گهرجي. هاءِ ڪمشنر طارق علي خان پاڪستان جي مؤقف کي ساراهيندي چيو ته ڪئنيڊا زرعي پيداوار ۽ فوڊ سيفٽي جي ڪيترن ئي شعبن ۾ فني سهڪار کي وڌيڪ مضبوط بنائڻ لاءِ تيار آهي. هن وزير کي ٻُڌايو ته ڪئنيڊا جي فيلڊ ليول، اسٽوريج ۽ سپلاءِ چين تي ٻَڌل جيتن جي تدارڪ جو نظام ISPM-14 موجب انتهائي مضبوط آهي ۽ ڪئنيڊا چاهي ٿو ته پاڪستان ان نظام جو جائزو وٺي مستقبل ۾ اناج جي روانگي واپار کي سسٽمز پهچ تحت قبول ڪري. هن ان ڳالهه جي خاطري ڪرائي ته ڪئنيڊا ڊي پي پي جي 4 رڪني فني ٽيم جي دؤري کي مڪمل طور تي سهولت فراهم ڪندو ته جيئن هو ڪئنيڊا جي پيداواري علائقن، گودامن، ٽرانسپورٽ چين ۽ معائني جي مرحلي جو سڌيءَ ريت جائزو وٺي سگهي. هاءِ ڪمشنر اهو ٻُڌايو ته ڪئنيڊا ڪينولا، سويابين ۽ پام آئل جي پيداوار ۾ وڌيڪ اضافو ڪري رهيو آهي ۽ جي ايم او لائسنسنگ جا معاملا طئي ٿيندي ئي پاڪستان لاءِ ڪينولا جو روانگي واپار ٻيهر شروع ڪرڻ جو خواهشمند آهي. هاءِ ڪمشنر پاڪستان طرفان ٻه طرفي سياسي مشاورت ۾ اثرائتي شرڪت کي ساراهيو ۽ ان عمل کي اداره جاتي سطح تي وڌيڪ مضبوط بنائڻ جي ضرورت تي زور ڀريو. هن وفاقي وزير کي آگاهه ڪيو ته ڪئنيڊا اپريل 2026ع ۾ ٿيندڙ ڪئنيڊا ڪرپس ڪنوينشن ۾ قومي غذائي واري وزارت جي آفيسرن کي دعوت ڏيڻ جو ارادو رکي ٿو ۽ پاڪستان آيڊيبل آئل ڪانفرنس ۾ شرڪت لاءِ پڻ پُرعزم آهي. هن چيو ته ڪئنيڊا پاڪستان کي خطي جو اهم ترين ڀائيوار سمجهي ٿو ۽ پاڪستان جي غذائي تحفط، زرعي نظام جي جديد ڪاري ۽ واپاري چٽاڀيٽي ۾ واڌ لاءِ سهڪار جاري رکندو. وفاقي وزير چيو ته پاڪستان ڪئنيڊا سان زرعي سهڪار کي وسيع ڪرڻ ۾ سنجيده آهي ۽ ٻئي ملڪ ٽيڪنالاجي جي منتقلي، ويليو ايڊيشن، چوپائي مال جي بهتري، هائبرڊ ٻجن جي تحقيق ۽ زرعي مشينري جي تياري ۾ گهري سهڪار مان ڀرپور فائدو کڻي سگهن ٿا. هن فني مشاورت، ريگيوليٽري هم آهنگي ۽ مارڪيٽ تائين پهچ جي معاملن تي اڳڀرائيءَ کي برقرار رکڻ لاءِ هڪ گڏيل ورڪنگ گروپ جي قيام جي تجويز ڏني. ملاقات هاڪاري انداز ۾ پڄاڻي تي پهتي جنهن ۾ ٻنهي ڌُرين پاڪستان ۽ ڪئنيڊا وچ ۾ مستقبل تي ٻَڌل، گڏيل فائدن تي ٻَڌل زرعي ڀائيواري کي اڳتي وڌائڻ جي عزم جو اظهار ڪيو.