چين ۽ پاڪستان فولادي ڀائر آهن، چين پاڪستان جو ٻيو گهر ۽ پاڪستان به چين جو ٻيو گهر آهي: عطاءُ الله تارڙ

اسلام آباد – 08 ڊسمبر (اي پي پي) اطلاعات ۽ نشريات واري وفاقي وزير عطاءُ الله تارڙ چيو آهي ته چين ۽ پاڪستان فولادي ڀائر آهن، چين پاڪستان جو ٻيو گهر ۽ پاڪستان به چين جو ٻيو گهر آهي، چين هر مشڪل گهڙيءَ ۾ پاڪستان سان گڏ بيٺو، ٻوڏ متاثرين جي لاءِ چيني ڪمپينن ۽ ادارن جو تعاون ساراهه جوڳو آهي. اهڙن خيالن جو اظهار هن مقامي هوٽل ۾ چائنا چيمبر آف ڪامرس اِن پاڪستان جي اهتمام هيٺ پاڪستان ۾ فلڊ ڊيزاسٽر جي لاءِ عطين واري تقريب کي خاص مهمان جي حيثيت سان خطاب ڪندي ڪيو. وفاقي وزير چيو ته پاڪستان ۽ چين جي وچ ۾ لاڳاپا هڪ نه ختم ٿيندڙ رشتي جي صورت ۾ آهن جيڪي اسان جي بزرگن کان اسان کي وراثت ۾ مليا آهن جنهن جي حفاظت ۽ قدر اسان هر صورت ۾ ڪريون ٿا. هن چيو ته پاڪستان ۽ چين جي وچ ۾ ويجها لاڳاپا آهن، چين اسان جي لاءِ ٻيو گهر آهي ۽ اهڙي طرح پاڪستان به چين جي لاءِ ٻيو گهر آهي. وفاقي وزير چين جي مختلف شهرن جي دورن جو حوالو ڏيندي چيو ته پاڪ چين دوستي هر موسم جي دوستي آهي، اها دوستي سدائين مستقبل ۽ مضبوط رهي آهي، هر مشڪل وقت ۾ چين پاڪستان جو ساٿ ڏنو آهي. اطلاعات واري وفاقي وزير چيو ته چين جو اڳواڻ چو اين لائي جڏهن پاڪستان آيو ته منهنجي والده اسلام آباد جي رستن تي ٻين ٻارن سان گڏ چيني جهنڊو پڪڙي سندس استقبال ڪري رهي هئي، هي اهي يادون آهن جن ۾ اسان وڏا ٿياسين، اهي اسان جي ثقافت ۽ وراثت جو حصو آهن. هن چيو ته موجوده دور ۾ اسان جي نوجوان نسل به پاڪ چين دوستي جي حوالي سان تمام گهڻو ڪجهه سکيو آهي ۽ اهي لاڳاپا اڄ عوامي، ثقافتي ۽ تعليمي سطح تي وڌيڪ مضبوط ٿيا آهن. اطلاعات واري وفاقي وزير چين جي صدر شي جن پنگ ۽ وزيراعظم لي جيانگ جا پاڪستان جي لاءِ خيرسگالي جي جذبي ۽ تعاون تي ٿورا ادا ڪيا. اطلاعات واري وفاقي وزير چيو ته موسمياتي تبديلي عالمي مسئلو آهي، اسان ان جا شديد اثر ڏٺا آهن، پاڪستان جو عالمي ڪاربن اخراج ۾ حصو هڪ سيڪڙو کان به گهٽ آهي جڏهن ته موسمياتي تبديلي جي اثرن جي لحاظ کان اسان دنيا جي سڀ کان وڌيڪ متاثر ملڪن ۾ شامل آهيون. هن چيو ته جڏهن پاڪستان ۾ شديد ٻوڏ آئي ۽ پنجاب سميت مختلف علائقن ۾ ماڻهو متاثر ٿيا ته چين پاران مدد ۽ تعاون ان وقت انتهائي اهم ثابت ٿي، چين جي ڪمپنين ۽ ادارن پنهنجي ذميواري تحت هڪ قدم اڳتي وڌندي تعاون ڪيو جنهن سان ثابت ٿئي ٿو ته پاڪ چين دوستي مضبوط آهي، ان تعاون تي اسان چين جي ڪمپنين جي ٿورائتا آهيون. وفاقي وزير چيو ته جڏهن به اسان مشڪل حالتن کي منهن ڏنو آهي چين سدائين اسان سان گڏ بيٺل رهيو آهي، چين هڪ اعتماد جوڳو دوست آهي ۽ پاڪستان سدائين ان دوستي جي گهرجن کي پورو ڪرڻ جي لاءِ تيار رهندو. هن چيو ته وقت ثابت ڪيو آهي ته چين ۽ پاڪستان واقعي ”فولادي ڀائر“ آهن، عوامي، ثقافتي ۽ تعليمي مٽاسٽا ان دوستي کي وڌيڪ مضبوط ڪري رهيا آهن. واضح رهي ته چين چيمبر آف ڪامرس اِن پاڪستان، پاڪستان جي ٻوڏ متاثر علائقن جي لاءِ سيپٽمبر ۾ امدادي مهم جي شروعات ڪئي جنهن ۾ ميمبر ڪمپنين جي ڀرپور شرڪت ڏسڻ ۾ آئي. هيستائين 32 ڪمپنين اٽڪل 34 ملين رپين کان وڌيڪ رقم امدادي سامان جي خريداري ۽ ورڇ جي لاءِ جمع ڪئي. ان امداد ۾ خوراڪ، پيئڻ جو پاڻي، ڪمبل، مهاريُون ۽ پاڻي جهل وارين چاڌرن جهڙيون بنيادي شيون شامل آهن جيڪي متاثر علائقن ۾ فوري طور تي گهربل آهن.