سنڌ سرڪار هارين کي مڪمل مدد فراهم ڪري رهي آهي: شرجيل انعام ميمڻ

ڪراچي-05 نومبر (اي پي پي) سنڌ جي سينئر وزير شرجيل انعام ميمڻ چيو آهي ته چيئرمين بلاول ڀٽو زرداري جي هدايتن تي سنڌ سرڪار هارين کي مڪمل مدد فراهم ڪري رهي آهي، صوبائي حڪومت هارين جي مدد لاءِ سڌو سنئون نقد امداد پروگرام شروع ڪري رهي آهي، جنهن تحت ڊي اي پي ڀاڻ جي خريداري لاءِ في ايڪڙ 14هزار رپين جي پهرين قسط ڏني ويندي. ڪراچي ۾ پريس ڪانفرنس کي خطاب ڪندي سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ جي صوبائي وزير شرجيل انعام ميمڻ چيو ته ڪڻڪ جي پوک کان ٻه کان ٽي هفتا پوءِ تصديق جو عمل مڪمل ڪيو ويندو ۽ جن هارين جي ڪڻڪ جي پوک جي تصديق ڪئي ويندي انهن کي في ايڪڙ 8 هزار رپيا اضافي ڏنا ويندا ته جيئن اهي يوريا ڀاڻ جون ٻه ٻوريون خريد ڪري سگهن. شرجيل انعام ميمڻ چيو ته هي قدم سنڌ حڪومت پاران هارين کي معاشي مدد فراهم ڪرڻ، زرعي پيداوار وڌائڻ ۽ خوراڪ جي خود ڪفيليءَ حاصل ڪرڻ جي طرف هڪ اهم قدم آهي. هن چيو ته هاڻي تائين 4 لک 19 هزار هارين کي مدد فراهم ڪئي وئي آهي ۽ اها رقم ”هاري ڪارڊ“ ذريعي ڏني پئي وڃي. هاري ڪارڊ لاءِ 3 لک 50 هزار کان وڌيڪ درخواستون مليون آهن، جن مان 1 لک 80 هزار هارين جي درخواستن جي تصديق مڪمل ٿي چڪي آهي. هن چيو ته سنڌ حڪومت اي – چالان سسٽم شروع ڪيو آهي، جنهن کي عوام طرفان ساراهيو پيو وڃي. ڪراچي جي ٻن وڏين ڪاروباري شخصيتن پڻ هن سسٽم جي تعريف ڪئي آهي. هن چيو ته مشڪل فيصلا هميشه ڏکوئيندڙ هوندا آهن، پر انهن جو مقصد ماڻهن کي بهتر بڻائڻ ۽ امن قائم ڪرڻ آهي. اسان جي خواهش آهي ته حڪومت کي چالان جي صورت ۾ هڪ رپيو به نه وٺڻو پوي، ڇاڪاڻ ته اصل مقصد ماڻهن کي قانون جي اطاعت جو عادي بڻائڻ آهي. هڪ سوال جي جواب ۾ شرجيل انعام ميمڻ چيو ته آئين شهيد ذوالفقار علي ڀٽو ٺاهيو هو، 18 هين آئيني ترميم به پاڪستان پيپلز پارٽي جي دور ۾ آئي هئي ۽ چيئرمين بلاول ڀٽو زرداري 26 هين آئيني ترميم ۾ سرگرم ڪردار ادا ڪيو. هن چيو ته پيپلز پارٽي هڪ جمهوري پارٽي آهي جيڪا هميشه آئيني عمل ۽ پارلياماني روايتن تي عمل ڪندي آهي. سڀني تجويز ڪيل ترميمن تي پيپلز پارٽي جي سينٽرل ايگزيڪيوٽو ڪميٽي (سي اي سي) ۾ غور ڪيو ويندو ۽ فيصلا اڪثريتي ووٽ سان ڪيا ويندا. هن چيو ته سي اي سي 27 هين آئيني ترميم بابت فيصلو ڪندي ۽ پاڪستان پيپلز پارٽي ان مطابق عمل ڪندي، جيڪو به فيصلو پاڪستان، خطي ۽ عوام جي مفاد لاءِ بهتر هوندو. ترميم جا سمورا نقطا سي اي سي کي پيش ڪيا ويندا ته جيئن قومي مفاد ۾ فيصلو صلاح مشوري ذريعي ڪري سگهجي. هڪ ٻئي سوال جي جواب ۾ هن چيو ته حڪومتون ڪنهن کان به نه ڊڄنديون آهن پر قانون لاڳو ڪنديون آهن. ٽريفڪ قانونن تي سختي سان عمل ڪرائڻ لاءِ ڏنڊ وڌايو ويو آهي. هر صوبي جو پنهنجو قانون ۽ پنهنجون حدون آهن ۽ جيڪڏهن ڪا گاڏي فٽنيس جي قابل نه آهي ته ان کي قانون موجب ضبط ڪيو ويندو. آزاد ڪشمير جي صورتحال بابت ڳالهائيندي شرجيل انعام ميمڻ چيو ته اتي سياسي سرگرميون هلي رهيون آهن ۽ وقت اچڻ تي سياسي فيصلا ڪيا ويندا. وڪيلن پاران هوائي فائرنگ جي واقعي تي تبصرو ڪندي هن چيو ته قانون جي نظر ۾ سڀ برابر آهن. جيڪڏهن وڪيلن هوائي فائرنگ ڪئي آهي ته پوءِ اهو عمل غلط ۽ قانون جي خلاف ورزي آهي. پوليس سان لاڳاپيل هڪ سوال تي شرجيل انعام ميمڻ چيو ته ڪنهن کي به قانون کي چئلينج ڪرڻ جو پورو حق آهي، پر جيڪڏهن پوليس طرفان ڪا زيادتي ٿيندي ته حڪومت ان خلاف بنا ڪنهن فرق جي ڪارروائي ڪندي.