اسلام آباد-06 آگسٽ (اي پي پي)قومي اسيمبليءَ هڪ قرارداد منظور ڪئي آهي جنهن ۾ سوشل ميڊيا تي غير اخلاقي مواد، عورتن جي بنا اجازت تصويرن ۽ وڊيوز کي ڦهلائڻ جي مذمت ڪندي عزت ۽ رازداري جي حق جي تحفظ تي زور ڀريو آهي. قومي اسيمبليءَ ۾ اها قرارداد سيده نوشين افتخار پيش ڪئي. قرارداد ۾ چيو ويو آهي ته پاڪستان جي آئين ۾ سمورن شهرين کي بنيادي حقن جو تحفظ مليل آهي، ان ۾ عزت، زندگي ۽ رازداري جو حق به شامل آهي ۽ قانونن ۾ به انهن حقن جو تحفظ ڪيو ويو آهي، ماڻهن خاص ڪري عورتن جي تصويرن ۽ وڊيوز کي بنا اجازت بنائڻ ۽ ڦهلائڻ، موبائل ڊوائيسز، سوشل ميڊيا جي غلط استعمال ۽ قانونن تي عملدرآمد ۾ ڪمزوريءَ سبب خطرناڪ صورتحال اختيار ڪري چڪو آهي، هي آئين ۽ قانون جي واضح ڀڃڪڙي آهي، انهن تصويرن کي بليڪ ميلنگ، هراسمينٽ، ڊس انفارميشن ۽ مس انفارميشن لاءِ استعمال ڪيو پيو وڃي، انهن ڪارڻن سبب عوامي ماڳن تي عورتن لاءِ عدم تحفظ پيدا ٿي رهيو آهي. پيمرا ايڪٽ 2016ع سميت ڪيترائي قانون موجود آهن پر ان تي عملدرآمد گهٽ آهي. قرارداد ۾ وڌيڪ چيو ويو آهي ته جاچ ۽ سزائن ۾ دير سان صورتحال ڳڻتي جوڳي بڻجندي پئي وڃي. هي ايوان خاص ڪري عورتن جي غير قانوني رڪارڊنگز ۽ سندن بنيادي حقن جي ڀڃڪڙين جي شديد مذمت ڪري ٿو ڇاڪاڻ ته هي اسلامي ۽ مهذب معاشري جي قدرن جي خلاف آهي، اسان ان عزم جو ورجاءُ ڪريون ٿا ته عزت ۽ رازداري جي حق جو تحفظ ڪيو وڃي ۽ وفاقي حڪومت پيڪا ايڪٽ سميت ان حوالي سان ٻين قانوني قدمن کي وڌيڪ مستحڪم بڻائي. بعد ۾ سينيٽ اها قرارداد منظور ڪري ورتي.
