اسلام آباد – 29 مئي (اي پي پي) وزيراعظم شاهد خاقان عباسي چيو آهي ته پاڪستان مسلم ليگ (ن) جي حڪومت 2013ع ۾ ورثي ۾ مليل بجلي جي شديد بحران تي ڪاميابي سان ضابطو آڻي ورتو آهي، نيشنل گرڊ ۾ 11 هزار 461 ميگاواٽ بجلي شامل ڪئي، نواز شريف جي قيادت ۾ اسان جي پارٽي اهو مسئلو حل ڪرڻ جو واعدو ڪيو هو ۽ گذريل 5 سالن دوران موثر قدم کڻندي ان ناممڪن چئلينج کي پورو ڪري ڏيکاريو آهي. اهڙن خيالن جو اظهار هن وزيراعظم هائوس ۾ توانائي جي حوالي سان پريس ڪانفرنس کي خطاب ڪندي ڪيو. ان موقعي تي اطلاعات ۽ نشريات واري وفاقي وزير مريم اورنگزيب ۽ پاور ڊويزن وارو وفاقي وزير اويس احمد خان لغاري پڻ موجود هئا.
