صوبائي وزير شرجيل انعام ميمڻ جو گرين لائين بي آر ٽي جي آپريشنز ڪمانڊ اينڊ ڪنٽرول سينٽر جو دورو، پيپلز پارٽي اقتدار جي بُکايل ناهي ۽ نه ئي اقتدار لاءِ پنهنجن اصولن تي سمجهوتو ڪري ٿي: شرجيل انعام ميمڻ

ڪراچي- 19 آڪٽوبر (اي پي پي) سنڌ جي سينيئر وزير ۽ اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ گرين لائين بي آر ٽي جي آپريشنز ڪمانڊ اينڊ ڪنٽرول سينٽر جو دورو ڪيو، جتي کيس گرين لائين بي آر ٽي نظام جي مختلف پاسن، ٻين ٽرانسپورٽ منصوبن سان انضمام، مسافرن جي تعداد ۽ مجموعي ڪارڪردگيءَ بابت تفصيلي بريفنگ ڏني وئي. ان موقعي تي ٽرانسپورٽ کاتي جو سيڪريٽري اسد ضامن، ٽرانس ڪراچي جو سي اي او زبير چنه، يلو لائين بي آر ٽي جو پروجيڪٽ ڊائريڪٽر ڪمال دايو ۽ سنڌ ماس ٽرانزٽ اٿارٽيءَ جو ايم ڊي بهزاد ميمڻ پڻ ساڻس گڏ هئا.سينيئر وزير شرجيل انعام ميمڻ چيو ته سنڌ حڪومت جي ڪوشش آهي ته ايندڙ ڇهن کان اٺن مهينن دوران صوبي جي سمورن ضلعن ۾ روڊن جي تعمير جو ڪم شروع ڪيو وڃي، جيئن هر علائقي جي عوام کي بهتر سفري سهولتون فراهم ٿي سگهن. سنڌ حڪومت جي پهرين ترجيح ٽرانسپورٽ جي نظام کي بهتر بڻائڻ آهي ۽ ان سلسلي ۾ سمورن پهلوئن جو جائزو ورتو پيو وڃي. هر منصوبي جو لاڳاپيل پراجيڪٽ مئنيجر پنهنجي شعبي ۾ ڪم ڪري رهيو آهي.هن چيو ته چين جو دورو پڻ تمام سٺو رهيو. سنڌ جو وڏو وزير جلد صوبائي ڪابينا کي ان دوري بابت پاڻ بريفنگ ڏيندو. ان دوري جو بنيادي مقصد پاڪستان، خاص طور تي سنڌ حڪومت ۽ سنڌ جي عوام لاءِ بهتريءَ جا موقعا پيدا ڪرڻ هو. وڏي وزير جي بريفنگ کان اڳ هو ان معاملي تي سوالن جا جواب نه ڏيندو. شرجيل انعام ميمڻ چيو ته سنڌ حڪومت جمهوري انداز ۾ معاملن کي اڳتي وڌائي رهي آهي ۽ هر شعبي ۾ ڪم ڪري رهي آهي. صحت، تعليم، ٽرانسپورٽ، آبپاشي ۽ مڪاني حڪومتن جي نظام سميت سمورن شعبن ۾ عوام جي زندگي آسان بڻائڻ ۽ سندن بهتريءَ لاءِ قدم کنيا پيا وڃن. شرجيل انعام ميمڻ چيو ته گذريل ڪجهه ڏينهن دوران سياسي تبديليون سامهون آيون آهن. خيبرپختونخوا ۾ کنيل قدم نه ڪنهن لالچ هيٺ کنيو ويو ۽ نه ئي اقتدار جي هوس ۾ کنيو ويو. جيڪڏهن ائين هجي ها ته گورنر طرفان مقرر ڪيل صلاحڪار سياسي نمائندا هجن ها يا ڪنهن سياسي پارٽي جي سفارش تي نامزد ڪيا وڃن ها، پر انهن جي چونڊ ميرٽ جي بنياد تي ڪئي وئي آهي. هن چيو ته هن وقت خيبر پختونخوا جو سڀ کان وڏو چئلينج دهشتگردي آهي. ان صورتحال کان نه رڳو اتي جي حڪومت، پر خيبر پختونخوا جو عوام ۽ سڄو ملڪ متاثر ٿي رهيو آهي. افغانستان کان سرحد پار ڪري دهشتگردن جي پاڪستان ۾ داخل ٿيڻ هڪ وڏو چئلينج آهي. خيبر پختونخوا حڪومت کي ڪيترائي ڀيرا چيو ويو ته هو پنهنجا معاملا درست ڪري، پر گهربل اڳڀرائي نه ٿي سگهي. شرجيل انعام ميمڻ چيو ته ڪجهه ماڻهو بلوچستان ۾ دهشتگرديءَ جا مثال ڏين ٿا، پر اتي جي حڪومت دهشتگرديءَ خلاف ڪارروائيون ڪري رهي آهي. پوليس اهلڪار شهيد ٿي رهيا آهن ۽ قانون لاڳو ڪندڙ ادارا دهشتگردن خلاف قدم کڻي رهيا آهن. بلوچستان جي وڏي وزير طرفان دهشتگرد تنظيمن جا دفتر کولڻ يا انهن سان ڳالهيون ڪرڻ جو مطالبو نٿو ڪيو وڃي. هن چيو ته بدقسمتيءَ سان خيبر پختونخوا ۾ عمران خان ۽ سندس پارٽي جي حڪومت جا سربراهه دهشتگردن سان ڳالهين جي ڳالهه ڪندا رهيا آهن. پي ٽي آءِ جي پهرين حڪومت جي دور ۾ مدرسن کي فنڊ پڻ فراهم ڪيا ويندا رهيا. انهن نيٽ ورڪن کي سرڪاري فنڊنگ ڏيڻ واري معاملي جو پڻ جائزو وٺڻ گهرجي، جن بابت الزام آهن ته اتان دهشتگردن لاءِ افرادي قوت تيار ڪئي ويندي هئي. جيڪڏهن حڪومت اهڙن نيٽ ورڪن کي فنڊ ڏيندي ته عوام تحفظ لاءِ ڪيڏانهن ويندو؟ هن چيو ته حالتون اتي پهچي ويون هيون جو ماڻهو مغرب جي نماز کان پوءِ گهرن مان ٻاهر نڪرڻ کان به خوف محسوس ڪندا هئا. ڪجهه شهرن ۾ پوليس اهلڪار وردي پائي ٻاهر نڪري نه سگهندا هئا. انهن حالتن جي ذميواري خيبر پختونخوا حڪومت تي لاڳو ٿئي ٿي. شرجيل انعام ميمڻ چيو ته دهشتگرديءَ جو ڪو واقعو پيش اچڻ هڪ الڳ معاملو آهي، پر دهشتگردن لاءِ نرم رويو اختيار ڪرڻ بلڪل مختلف ڳالهه آهي. حڪومت جي ذميواري آهي ته عوام جي جان ۽ مال جو تحفظ يقيني بڻائي ۽ دهشتگرديءَ خلاف اثرائتا قدم کڻي. هن چيو ته خيبر پختونخوا ۾ دهشتگرديءَ جي موجوده صورتحال جي بنيادي سببن ۾ صوبائي حڪومت جو دهشتگردن لاءِ نرم رويو رکڻ پڻ شامل آهي. اتان جي وڏي وزير ۽ حڪومت جي ذميواري هئي ته هو دهشتگردن خلاف پاڻ به ڪارروائيون ڪري، پنهنجي سياسي عزم جو مظاهرو ڪن ۽ پنهنجي فورسز کي اثرائتي انداز ۾ استعمال ڪن. هن چيو ته ڪراچي ۾ پڻ هڪ وقت دهشتگردي عروج تي هئي، پر سنڌ حڪومت آپريشن ڪيا، رينجرز ۽ ٻين قانون لاڳو ڪندڙ ادارن جي مدد حاصل ڪئي ۽ دهشتگرديءَ جي خاتمي لاءِ عملي قدم کنيا. اهڙيءَ طرح جڏهن ڪچي وارن علائقن ۾ حالتون خراب ٿيون ته حڪومت ۽ لاڳاپيل ادارن ڌاڙيلن خلاف ڪارروائيون ڪيون. اڄ الله جي فضل سان سنڌ ۾ اغوا براءِ تاوان جي واقعن ۾ نمايان گهٽتائي آئي آهي.هن چيو ته حڪومت جي بنيادي ذميواري پنهنجي رِٽ قائم ڪرڻ ۽ عوام کي تحفظ فراهم ڪرڻ آهي. جيڪڏهن خيبر پختونخوا ۾ حڪومت جا نمائندا طالبان کي ٽڪيٽ ڏيڻ تي مجبور هجن يا حڪومتي نظام ۾ موجود ماڻهو دهشتگردن جي سهولتڪاري ڪن ته اهڙي صورتحال ڪنهن به صورت ۾ قبول نٿي ڪري سگهجي. شرجيل انعام ميمڻ چيو ته پيپلز پارٽي انهن آخري پارٽين ۾ شامل هئي، جن گورنر راڄ جي حمايت ڪئي. اسان معاملن کي ڳالهين ذريعي حل ڪرڻ جي ڪوشش ڪئي. ڪيترائي ڀيرا چيو ويو ته وفاقي حڪومت جيڪو به قدم کڻڻ چاهي ٿي، ان کان اڳ ڳالهه ٻولهه ڪئي وڃي. ڳالهيون پڻ ڪيون ويون، پر ان جي باوجود خيبر پختونخوا جو وڏو وزير ان معاملي تي راضي نه ٿيو. هن چيو ته جيڪڏهن وڏو وزير پاڻ پنهنجي تقريرن ۾ طالبان ۽ دهشتگردن جي حق ۾ ڳالهائي ته عوام کي بي يارو مددگار نٿو ڇڏي سگهجي. حڪومت جو مقصد اهو نٿو ٿي سگهي ته اها اقتدار ۾ رهندي ماڻهن کي مرڻ لاءِ ڇڏي ڏئي ۽ خيبر پختونخوا جي عوام کي دهشتگردن جي رحم ڪرم تي ڇڏي ڏئي. سينيئر وزير شرجيل انعام ميمڻ چيو ته پي ٽي آءِ جي حڪومتي دور ۾ بلوچستان جي مختلف علائقن مان دهشتگرد آيا، هتي ڪارروايون ڪيائون ۽ واپس هليا ويا. پشاور سانحي ۾ پڻ معصوم ٻارن کي شهيد ڪيو ويو، ان وقت به پي ٽي آءِ جي حڪومت هئي. دهشتگرديءَ جو ڪو واقعو پيش اچڻ تي حڪومت جي ذميواري آهي ته سخت ۽ اثرائتو جواب ڏئي، جيئن دهشتگردن جي صلاحيت ختم ڪري سگهجي. دهشتگردن لاءِ نرم رويو رکڻ يا انهن جا دفتر کولڻ جون ڳالهيون ڪنهن به صورت ۾ قبول ناهن. شرجيل انعام ميمڻ چيو ته اسان جي سياسي اڳواڻن ۽ ڪارڪنن دهشتگرديءَ خلاف جدوجهد ۾ پنهنجون جانيون قربان ڪيون آهن. پي ٽي آءِ کان سواءِ اٽڪل سموريون وڏيون سياسي جماعتون دهشتگرديءَ کي منهن ڏينديون رهيون آهن. مولانا فضل الرحمان صاحب تي پڻ حملا ٿي چڪا آهن. سندس تازي بيان تي مون کي افسوس ٿيو. هن چيو ته اسان مولانا فضل الرحمان جي عزت ۽ احترام ڪريون ٿا، پر کيس پڻ ان ڳالهه جو جائزو وٺڻ گهرجي ته هو اهڙي جماعت جي حمايت نه ڪري، جنهن تي دهشتگردن لاءِ نرم گوشو رکڻ جا الزام آهن.هن وڌيڪ چيو ته مولانا صاحب کي ڏسڻ گهرجي ته ملڪ هن وقت ڪهڙن چئلينجن مان گذري رهيو آهي. سندس جماعت پڻ دهشتگرديءَ جو نشانو بڻجندي رهي آهي، تنهن ڪري کيس دهشتگرديءَ خلاف واضح موقف اختيار ڪرڻ ۽ حڪومت جا هٿ مضبوط ڪرڻ گهرجن. سينيئر وزير شرجيل انعام ميمڻ چيو ته اسان جون قانون لاڳو ڪندڙ فورسز دهشتگردن خلاف مسلسل ڪارروايون ڪري رهيون آهن. گذريل ڪجهه ڏينهن دوران وڏي انگ ۾ دهشتگردن کي ماريو ويو آهي. اسان جي فورسز ۽ انهن جي قيادت دهشتگرديءَ خلاف اهم قدم کنيا آهن. هن چيو ته اسان کي پنهنجي فورسز جا هٿ مضبوط ڪرڻا آهن. اسان سمجهون ٿا ته سياسي حڪومتن ۽ پاڪستان جي اسٽيبلشمينٽ کي هڪ صفحي تي اچي ملڪ کي درپيش چئلينجن جو مقابلو ڪرڻو پوندو. هن ڪراچي جو مثال ڏيندي چيو ته هڪ وقت هو، جڏهن شهر ۾ روزانو 30 کان 40 ماڻهو ماريا ويندا هئا، هر روز هڙتالون ٿينديون هيون، ڪاروبار ۽ تعليمي ادارا بند رهندا هئا ۽ صنعتون شهر کان ٻاهر منتقل ٿي رهيون هيون. ان وقت حڪومت ۽ اسٽيبلشمينٽ گڏجي ڪم ڪيو، جنهن جي نتيجي ۾ ڪراچي ۾ امن قائم ڪرڻ ۾ مدد ملي. هن چيو ته اڄ ڪراچي ۾ ماضيءَ وانگر روزانو هڙتالون نٿيون ٿين ۽ دهشتگرديءَ جي واقعن ۾ پڻ نمايان گهٽتائي آئي آهي. اهو حڪومت جي سياسي عزم ۽ ادارن جي گڏيل سهڪار جو نتيجو آهي. هن چيو ته بلوچستان ۾ پڻ وڏو وزير ۽ صوبائي حڪومت دهشتگرديءَ خلاف قدم کڻي رهيا آهن. بلوچستان حڪومت پنهنجا خدشا وفاقي حڪومت آڏو رکيا، پر ڳالهين ۽ مشاورت ذريعي مسئلا حل ڪرڻ جي ڪوشش ڪئي. پيپلز پارٽي ڪڏهن به دهشتگرديءَ خلاف قدمن جي مخالفت نه ڪئي آهي ۽ نه ئي دهشتگردن جي معاملي تي ڪنهن به قسم جو سمجهوتو ڪيو آهي. شرجيل انعام ميمڻ چيو ته اسان جي جوانن جو احترام ڪرڻ اسان سڀني تي فرض آهي، چاهي اهي شهري هجن يا هٿياربند فوجن جا جوان. دهشتگرديءَ جو سڀ کان وڌيڪ نشانو بڻجندڙ سياسي جماعتن ۾ پيپلز پارٽي سرفهرست آهي. هن چيو ته 18 آڪٽوبر تي جڏهن شهيد محترمه بينظير ڀٽو وطن واپس آئي ته سندس استقبال لاءِ آيل پيپلز پارٽي جا سوين ڪارڪن دهشتگرديءَ جو نشانو بڻيا ۽ پنهنجي جانين جو نذرانو پيش ڪيائون. محترمه بينظير ڀٽو پاڻ پڻ هڪ دهشتگرد حملي ۾ بچي ويون هيون، پر بعد ۾ راولپنڊي ۾ دهشتگرديءَ جي هڪ افسوسناڪ واقعي ۾ شهيد ٿي ويون. دهشتگرديءَ خلاف پيپلز پارٽي جو موقف هميشه واضح رهيو آهي.سينيئر وزير شرجيل انعام ميمڻ چيو ته شهيد محترمه بينظير ڀٽو پنهنجي آخري تقريرن ۾ ان عزم جو اظهار ڪيو هو ته سوات ۾ پاڪستان جو جهنڊو ٻيهر ڦڙڪايو ويندو. ان وقت طالبان ۽ انتهاپسند عنصر سوات تائين پهچي چڪا هئا. صوفي محمد جي تحريڪ ۽ ان تحت ٿيندڙ سرگرميون ڪنهن کان به لڪل نه هيون. هن چيو ته محترمه بينظير ڀٽو جي شهادت کان پوءِ آصف علي زرداري پڻ ان عزم کي اڳتي وڌايو ۽ پيپلز پارٽي جي حڪومت دهشتگرديءَ جي خاتمي لاءِ عملي قدم کنيا. شرجيل انعام ميمڻ چيو ته سوات آپريشن جي نتيجي ۾ بي گهر ٿيل اٽڪل 8 لک ماڻهن کي مختلف علائقن، جن ۾ چارسده، ڪراچي ۽ ٻيا شهر شامل هئا، منتقل ڪيو ويو هو. آپريشن کان پوءِ حالتون بهتر ٿيڻ تي انهن ماڻهن جي پنهنجن گهرن ڏانهن واپسي ممڪن بڻائي وئي. اهو هڪ تمام وڏو قومي ڪم هو، جنهن ۾ پيپلز پارٽي جي حڪومت اهم ڪردار ادا ڪيو. ان ڪردار کي پڻ تسليم ڪرڻ گهرجي. هن چيو ته پيپلز پارٽي هميشه ثابت ڪيو آهي ته اها اقتدار خاطر پنهنجن اصولن تي سمجهوتو نٿي ڪري. بلوچستان ۾ جڏهن پيپلز پارٽي جي پنهنجي حڪومت هئي ۽ صدر ۽ وزيراعظم پڻ انهيءَ جماعت سان تعلق رکندا هئا، تڏهن به حالتن جي گهرج موجب جڏهن سخت قدمن جي ضرورت محسوس ٿي ته پيپلز پارٽي پنهنجي حڪومت خلاف به قدم کڻڻ کان پاسو نه ڪيو. اسان لاءِ عوام جو تحفظ اقتدار کان وڌيڪ اهم آهي.شرجيل انعام ميمڻ چيو ته جيڪڏهن پيپلز پارٽي کي وفاقي وزارتن جو شوق هجي ها ته ماضيءَ ۾ پڻ کيس وزارتن جون آڇون ٿينديون رهيون آهن ۽ اڄ به وفاقي وزارتون ملي سگهن ٿيون. پاڪستان مسلم ليگ (ن) طرفان مختلف موقعن تي پيپلز پارٽي کي وفاقي حڪومت ۾ شامل ٿيڻ جي آڇ ڪئي وئي، پر اسان پنهنجن اصولن تي قائم رهڻ کي ترجيح ڏني. هن چيو ته اسان چاهيون ٿا ته پارليامينٽ هلندي رهي، جمهوري نظام برقرار رهي ۽ جمهوريت مضبوط ٿئي. انهيءَ مقصد تحت اسان وفاقي حڪومت جي حمايت ڪئي، نه ڪي وزارتون حاصل ڪرڻ لاءِ. سينيئر وزير شرجيل انعام ميمڻ چيو ته پيپلز پارٽي اقتدار جي بُکايل ناهي ۽ نه ئي اقتدار لاءِ پنهنجن اصولن تي سمجهوتو ڪري ٿي. جيڪڏهن عوام دهشتگرديءَ جو شڪار ٿي رهيو هجي، معصوم شهرين جون جانيون ضايع ٿي رهيون هجن ۽ واپاري طبقو خوف واري ماحول ۾ زندگي گذاري رهيو هجي ته پيپلز پارٽي خاموش نٿي رهي سگهي. هن چيو ته خيبر پختونخوا جي ستن ڊويزنن مان پنجن ۾ امن امان جي صورتحال انتهائي ڳڻتي جوڳي رهي آهي. سوات، پشاور ۽ ٻين متاثر علائقن ۾ دهشتگرديءَ جي واقعن عوام کي سخت مشڪلاتن ۾ وجهي ڇڏيو آهي. اتي جي واپارين ۽ عام شهرين کي تحفظ فراهم ڪرڻ حڪومت جي ذميواري آهي. هن چيو ته ان ڳالهه جو پڻ جائزو وٺڻو پوندو ته ڇا واپاري طبقي کي طالبان کي ڀتو ڏيڻ تي مجبور ڪيو پيو وڃي ۽ ڇا صوبائي حڪومت امن امان برقرار رکڻ ۾ ڪامياب رهي آهي. هن چيو ته جيڪڏهن صوبائي حڪومت جا نمائندا دهشتگردن جي دٻاءَ هيٺ هجن، واپاري خوف سبب ڀتو ڏيڻ تي مجبور هجن ۽ حڪومت دهشتگردن خلاف اثرائتي ڪارروائي نه ڪري سگهي ته اها هڪ سنگين صورتحال آهي. دهشتگردن لاءِ نرم رويو رکڻ ۽ انهن سان سمجهوتي جون ڳالهيون ڪرڻ سان مسئلا حل نه ٿيندا. شرجيل انعام ميمڻ چيو ته حڪمرانن جي بنيادي ذميواري عوام جي جان ۽ مال جو تحفظ آهي. جيڪو حڪمران عوام جي تحفظ تي سمجهوتو ڪري ٿو، اهو پنهنجي بنيادي ذميواري پوري نٿو ڪري. معصوم شهرين کي دهشتگردن جي رحم ڪرم تي نٿو ڇڏي سگهجي. هن چيو ته اهي قدم ڪنهن تڪڙ يا بنا سوچ ويچار جي نه کنيا ويا آهن. خيبر پختونخوا حڪومت کي بار بار چيو ويو ته معاملا درست ڪري، ڳالهين ۽ مشاورت ذريعي مسئلا حل ڪرڻ جي ڪوشش ڪئي وئي، پر گهربل اڳڀرائي نه ٿي سگهي.هن چيو ته پي ٽي آءِ ۾ پڻ اسد قيصر، بئريسٽر گوهر ۽ ٻيا اهڙا اڳواڻ موجود آهن، جن کي انهن معاملن جي سنگينيءَ جو احساس ڪرڻ گهرجي. دهشتگرديءَ جي معاملي تي ڪنهن به قسم جي مصلحت اختيار نٿي ڪري سگهجي. سينيئر وزير شرجيل انعام ميمڻ چيو ته پيپلز پارٽي تي تنقيد ڪندڙن کي ياد رکڻ گهرجي ته اسان جي پارٽي هميشه دهشتگرديءَ خلاف عملي جدوجهد ڪئي آهي ۽ ان جي وڏي قيمت ادا ڪئي آهي. جيڪڏهن خيبر پختونخوا ۾ حالتون بهتر ٿي وڃن ته اتي جمهوري طريقي سان جيڪو چاهي حڪومت ڪري. اهي قدم ڪنهن جماعت کي مستقل طور اقتدار کان پري رکڻ لاءِ نه، پر عوام جي جان ۽ مال جي تحفظ لاءِ آهن. هن چيو ته جن معصوم شهرين وٽ نه محافظ آهن، نه هٿيار ۽ نه ئي پنهنجي حفاظت جا وسيلا، رياست انهن کي دهشتگردن جي حوالي نٿي ڪري سگهي. عوام جو تحفظ رياست جي ذميواري آهي ۽ پيپلز پارٽي ان ذميواريءَ کان ڪڏهن به پوئتي نه هٽندي.گرين لائين بي آر ٽي بابت هڪ سوال جي جواب ۾ سينيئر وزير شرجيل انعام ميمڻ چيو ته گذريل چئن کان پنجن سالن دوران سنڌ ۾ ٽرانسپورٽ جي شعبي ۾ نمايان ڪم ٿيو آهي. ان ۾ اليڪٽرڪ اسڪوٽيون، پاڪستان جون پهريون اليڪٽرڪ بسون ۽ پنڪ بسون شامل آهن. هن چيو ته گرين لائين بي آر ٽي اڳ ۾ ئي تعمير ٿيل هئي، پر ان ۾ عورتن لاءِ مخصوص بسن جي سهولت موجود نه هئي. جڏهن عورتون پبلڪ ٽرانسپورٽ ۾ سفر ڪن ٿيون ته کين مختلف مسئلن ۽ مشڪلاتن کي منهن ڏيڻو پوي ٿو. شرجيل انعام ميمڻ چيو ته جڏهن عورتن کي بهتر سفري سهولتون فراهم ڪيون وڃن ٿيون ته سندن حوصلا افزائي ٿئي ٿي ۽ والدين پڻ پنهنجين نياڻين کي تعليم ۽ ٻين ضرورتن لاءِ ٻاهر موڪلڻ وقت وڌيڪ محفوظ محسوس ڪن ٿا. سنڌ حڪومت عورتن کي بااختيار بڻائڻ ۽ کين بهتر سفري سهولتون فراهم ڪرڻ لاءِ ڪيترائي قدم کنيا آهن، جن جا مثبت نتيجا سامهون اچي رهيا آهن. ريڊ لائين بي آر ٽي تي مسافرن جي انگ بابت ڳالهائيندي شرجيل انعام ميمڻ چيو ته انگ اکر رڳو بيان ڏيڻ لاءِ پيش ناهن ڪيا ويندا. جڏهن گرين لائين وفاقي حڪومت وٽ هئي ته ان تي روزانو اٽڪل 50 هزار مسافر سفر ڪندا هئا. هن چيو ته سنڌ حڪومت طرفان هن نظام جي ذميواري سنڀالڻ کان پوءِ پنهنجي حڪمت عملي جوڙي وئي، محنت ڪئي وئي ۽ ٽرانسپورٽ کاتي جي سموري ٽيم ان جي ڪارڪردگي بهتر بڻائڻ لاءِ ڪم ڪيو. سينيئر وزير شرجيل انعام ميمڻ چيو ته اڄ گرين لائين بي آر ٽي تي روزانو اٽڪل 90 هزار مسافر سفر ڪري رهيا آهن. جيڪڏهن هو 90 هزار مسافرن جي دعويٰ ڪري رهيا آهن ته ان جو بنياد انگ اکر ۽ ڪارڪردگي آهي. هو رڳو پريس بيان ڏيڻ لاءِ غلط انگ اکر پيش نٿا ڪري سگهن. هن چيو ته ميڊيا ۽ ٻين حلقن کي پڻ اهڙن قدمن جي حوصلا افزائي ڪرڻ گهرجي. اهو ئي انفرا اسٽرڪچر اڳ ۾ وفاقي حڪومت وٽ هو، جڏهن روزانو اٽڪل 50 هزار مسافر سفر ڪندا هئا، پر سنڌ حڪومت هڪ سال اندر مسافرن جو انگ ٻيڻو ڪري ڇڏيو. اهو فرق حڪومتي عزم، بهتر حڪمت عملي ۽ مسلسل محنت جي ڪري ممڪن ٿيو آهي. هڪ ٻئي سوال جي جواب ۾ شرجيل انعام ميمڻ چيو ته گرين لائين بي آر ٽي جي تعمير ۽ ان جي روٽ سان گڏوگڏ ٻين بي آر ٽي منصوبن کي پڻ پاڻ ۾ ڳنڍڻ ضروري آهي. ريڊ لائين ۽ يلو لائين کي پڻ هڪ ٻئي سان ڳنڍيو پيو وڃي، جيئن سمورن بي آر ٽي منصوبن جي وچ ۾ سفري رابطو قائم ٿي سگهي. هن چيو ته منصوبو اهو آهي ته اورنج لائين کي گرين لائين سان، گرين لائين کي ريڊ لائين سان ۽ يلو لائين کي پڻ ريڊ لائين سان ڳنڍيو وڃي. ان انضمام سان مسافرن کي هڪ نظام مان ٻئي نظام ۾ منتقل ٿيڻ ۽ پنهنجي منزل تائين پهچڻ ۾ آساني ٿيندي. سينيئر وزير شرجيل انعام ميمڻ وڌيڪ چيو ته يلو لائين جي مختلف حصن، پُلن ۽ ٻين تعميراتي ڪمن تي پڻ اڳڀرائي جاري آهي. سنڌ حڪومت جي ڪوشش آهي ته انهن منصوبن کي جلد مڪمل ڪري انهن جي وچ ۾ اثرائتو رابطو قائم ڪيو وڃي، جيئن ڪراچي جي شهرين کي هڪ مربوط، جديد ۽ اثرائتو سفري نظام فراهم ڪري سگهجي.