وزيراعظم محمد شهباز شريف جي صدارت ۾ ايف بي آر جي معاملن تي هفتيوار جائزه اجلاس، ايف بي آر ۾ سڌارن ۽ فيس ليس نظام جي لاڳو کي تيز ڪرڻ جي هدايت

اسلام آباد – 19 آڪٽوبر (اي پي پي) وزيراعظم محمد شهباز شريف ايف بي آر ۾ سڌارن جي رفتار ۾ تيزي آڻڻ ۽ ٽيڪس وصولي جي شعبن ۾ فيس ليس نظام جي لاڳو کي تيز ڪرڻ جي هدايت ڪندي چيو آهي ته ايف بي آر ۾ سڌارن کي ڪارائتو بڻائڻ جي لاءِ ٽيڪنالاجي، موثر تربيت، شفافيت ۽ جوابدهي تي خاص ڌيان ڏنو وڃي، ايف بي آر ۾ بدعنوان عنصرن جي خلاف بنا ڪنهن فرق جي ڪارروائي ڪئي وڃي. سومر ڏينهن وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف جي صدارت ۾ فيڊرل بورڊ آف روينيو (ايف بي آر) جي معاملن تي هفتيوار جائزه اجلاس منعقد ٿيو. اجلاس ۾ وزيراعظم ايف بي آر ۾ سڌارن جي رفتار ۾ تيزي آڻڻ جي هدايت ڪئي ۽ چيو ته ايف بي آر ۾ جاري سڌارن جا شروعاتي نتيجا حوصلي جوڳا آهن، ٽيڪس گيپ تي ضابطو آڻڻ جي لاءِ ايف بي آر جي صلاحيت ۾ مسلسل بهتري آندي وڃي. وزيراعظم چيو ته ايف بي آر ۾ سڌارن کي ڪارائتو بڻائڻ جي لاءِ ٽيڪنالاجي، موثر تربيت، شفافيت ۽ جوابدهي تي خاص ڌيان ڏنو وڃي. هن ٽيڪس وصولي جي شعبن ۾ فيس ليس نظام جي لاڳو کي تيز ڪرڻ جي هدايت ڪئي. وزيراعظم چيو ته ايف بي آر افيسرن جي ذميواري آهي ته اهي قوم جي اميدن موجب پنهنجي ڪارڪردگي بهتر ڪن، جاري سڌارا رياست جي وسيع تر مفاد ۾  آهن، انهن جو عمل هر صورت ۾ جاري رهندو. وزيراعظم هدايت ڪئي ته ايف بي آر ۾ بدعنوان عنصرن جي خلاف بنا ڪنهن فرق جي ڪارروائي ڪئي وڃي. وزيراعظم چيو ته پنهنجي رويي ۽ ڪارڪردگي ۾ بهتري آڻيندڙ آفيسرن ۽ عملي کي اصلاح جو موقعو ڏنو وڃي جڏهن ته بدعنواني ۽ ناقص ڪارڪردگي جو سلسلو جاري رکندڙن جي لاءِ اداري ۾ ڪا جڳهه نه هوندي. اجلاس کي ايف بي آر ۾ جاري سڌارن جي تازه ترين اڳڀرائي ۽ هيستائين جي نتيجن کان آگاهه ڪيو ويو. اجلاس کي ايف بي آر ۾ ٽيڪنالاجي، نظام ڪار ۽ افرادي قوت جي شعبن ۾ جاري سڌارن تي تفصيلي بريفنگ ڏني وئي. بريفنگ دوران ٻڌايو ويو ته گذريل ٽن سالن دوران سڌارن جي نتيجي ۾ ٽيڪس گيپ جو ڪاٿو جي ڊي پي جي 6 سيڪڙو کان گهٽ ٿي 5 سيڪڙو رهجي ويو آهي، ٽيڪنالاجي جي موثر استعمال سان ايف بي آر آفيسرن جي صوابديدي اختيارن ۾ خاطرخواهه گهٽتائي آئي آهي. بريفنگ ۾ اهو به ٻڌايو ويو ته ايف بي آر جي نئين آفيسرن کي لمز (LUMS) ۾ تربيت ڏني پئي وڃي جڏهن ته اڳ کان خدمتون سرانجام ڏيندڙ آفيسرن جي لاءِ ملازمت دوران تربيتي پروگرام پڻ جاري آهن، آفيسرن جي ڪارڪردگي جانچڻ جي لاءِ پيئر ريٽنگ سسٽم لاڳو ڪيو ويو آهي، ايف بي آر جي آڊٽ جي صلاحيت ۾ اضافي جي لاءِ 957 آڊيٽرز کي ٿرڊ پارٽي آڊيٽرز جي طور تي ميرٽ جي بنياد تي ڪانٽريڪٽ تي مقرر ڪيو ويو آهي. بريفنگ ۾ ٻڌايو ويو ته ٿرڊ پارٽي آڊيٽرز جي مقرري سان ايف بي آر جي آڊٽ جي صلاحيت ۾ چنئوڻ تي اضافو ٿيو آهي، ايف بي آر جي وسيع پئماني تي ٽيڪنيڪي بنيادن تي نئين سر تنظيم سازي جاري آهي، مهارت يافته ٽيڪنيڪي افرادي قوت جي ڀرتي ۽ ڪارڪردگي سان واڳيل مراعتن جو نظام متعارف ڪرايو ويو آهي. اجلاس ۾ وفاقي وزير احسن اقبال، اعظم نذير تارڙ، احد خان چيما، محمد اورنگزيب، عطاءُ الله تارڙ، مملڪتي وزير بلال اظهر ڪياني، اٽارني جنرل منصور اعواڻ ۽ اعلى سرڪاري آفيسر شريڪ ٿيا.