پاڪ فوج، ايف سي بلوچستان ۽ پوليس جو گڏيل ”آپريشن شعبان“ جاري، وڌيڪ 4 خوارجي مارجي ويا

اسلام آباد-12 جولاءِ (اي پي پي) سيڪيورٽي فورسز جون فتنه الخوارج خلاف علائقي ۾ موثر ڪارروائيون جاري آهن. سران ٽنگي ۾ تازين ڪارروائين دوران وڌيڪ 4 خوارجين کي ماريو ويو، آپريشن شعبان ۾ مارجي ويلن جو مجموعي تعداد 71 ٿي ويو آهي. سيڪيورٽي ذريعن موجب 5 جولاءِ کان هن وقت تائين آپريشن شعبان ۽ ٻين انٽيليجنس بيسڊ آپريشنز ۾ مجموعي طور تي 109 خوارجي دهشتگرد ماريا ويا آهن، سيڪيورٽي ذريعن موجب مارجي ويل خوارجين جي قبضي مان وڏي تعداد ۾ هٿيار ۽ بارود به هٿ ڪيو ويو آهي. هٿ ڪيل هٿيارن ۾ ايم فور رائيفل، ايس ايم جيز، راڪيٽ لانچر، موبائيل فونز ۽ ٻيو سامان شامل آهي، آخري دهشتگرد جي خاتمي تائين بلوچستان ۾ آپريشن شعبان جاري رهندو.