چيئرمين آءِ سي ٽي – پي اي آءِ آر اي ڊاڪٽر غلام ملاح جي صدارت ۾ اهم اجلاس، اسلام آباد جي نجي تعليمي ادارن ۾ 10 سيڪڙو لازمي اسڪالرشپس تي عملدرآمد جو جائزو ورتو ويو

اسلام آباد – 17 جون (اي پي پي) سينيٽ جي وفاقي تعليم ۽ پيشيواراڻي تربيت بابت اسٽينڊنگ ڪميٽي جي هدايتن ۽ تعليم واري وفاقي سيڪريٽري جي خصوصي رهنمائي تحت آءِ سي ٽي – پي اي آءِ آر اي جي چيئرمين ڊاڪٽر غلام علي ملاح جي صدارت ۾ هڪ اهم اجلاس ٿيو جنهن ۾ اسلام آباد جي نجي تعليمي ادارن پاران رائيٽ ٽو فري اينڊ ڪمپلسري ايجوڪيشن ايڪٽ 2012ع تحت 10 سيڪڙو مستحق شاگردن جي لاءِ لازمي اسڪالرشپس تي عملدرآمد جو جائزو ورتو ويو. اجلاس ۾ ان ڳالهه تي ڳڻتي جو اظهار ڪيو ويو ته ڪيترن ئي نجي تعليمي ادارن ڪيترائي ڀيرا ياد ڪرائڻ ۽ هدايتن جي باوجود اسڪالرشپ بابت گهربل معلومات آءِ سي ٽي – پي اي آءِ آر اي کي فراهم ناهي ڪئي. ڊاڪٽر غلام علي ملاح چيو ته اٿارٽي قانون تي مڪمل عملدرآمد يقيني بڻائڻ جي لاءِ هر ممڪن قدم کڻندي. هن وڌيڪ چيو ته آئوٽ آف اسڪول ٻارن کي ترجيحي بنيادن تي 10 سيڪڙو اسڪالرشپ اسڪيم تحت نجي تعليمي ادارن ۾ داخلا ڏياري ويندي ته جيئن ڪو به مستحق ٻار تعليم کان محروم نه رهي. اجلاس ۾ فيصلو ڪيو ويو ته سمورن باقيدار ادارن کي 30 جون 2026ع تائين گهربل معلومات جمع ڪرائڻ جو آخري موقعو ڏنو وڃي. مقرر تاريخ تائين تعميل نه ڪرڻ جي صورت ۾ لاڳاپيل ادارن جي رجسٽريشن ۽ تجديد رجسٽريشن جي ڪارروائي روڪي ويندي، انهن جا نالا آءِ سي ٽي – پي اي آءِ آر اي جي ويب سائيٽ تي بطور باقيدار شايع ڪيا ويندا ۽ لاڳاپيل امتحاني بورڊز کي پڻ آگاهه ڪيو ويندو. وڌيڪ اهو ته مسلسل تعميل نه ڪرڻ جي صورت ۾ ادارن تي ڏنڊ، رجسٽريشن جي معطلي ۽ آءِ سي ٽي – پي اي آءِ آر اي ايڪٽ 2013ع تحت قانوني ڪارروائي عمل ۾ آندي ويندي. اجلاس ۾ انهن نجي تعليمي ادارن جي ڪوششن کي پڻ ساراهيو ويو جن 10 سيڪڙو اسڪالرشپس فراهم ڪرڻ جي حوالي سان مڪمل تعاون ڪيو آهي. اهڙن ادارن کي انهن جي سماجي ذميواري ۽ تعليمي شموليت جي فروغ ۾ ڪردار جي اعتراف ۾ تعريفي سرٽيفڪيٽ جاري ڪيا ويندا. آءِ سي ٽي – پي اي آءِ آر اي اسلام آباد جي سمورن ٻارن، خاص طور تي مستحق ۽ آئوٽ آف اسڪول ٻارن، کي معياري تعليم جي فراهمي ۽ انهن جي تعليمي حقن جي تحفظ جي لاءِ پنهنجي عزم جو ورجاءُ ڪري ٿي.