گلگت بلتستان اسيمبلي جُون چونڊُون، اڳوڻو وڏو وزير حافظ حفيظ الرحمان ۽ پاڪستان پيپلزپارٽي گلگت-بلتستان جو صدر امجد حسين ايڊووڪيٽ ڪامياب، پيپلز پارٽي 10 سيٽن سان سڀ کان وڏي پارٽي بڻجي وئي

گلگت- 08 جون (اي پي پي) گلگت بلتستان اسيمبلي جي عام چونڊن 2026ع ۾ اڳوڻي وڏي وزير حافظ حفيظ الرحمان ۽ پاڪستان پيپلزپارٽي گلگت-بلتستان جي صدر امجد حسين ايڊووڪيٽ ڪاميابي حاصل ڪري ورتي آهي. غير تصديق ٿيل ۽ غير سرڪاري نتيجن موجب،  گلگت ضلعي جي ٻنهي تڪن گلگت-1 مان، پاڪستان مسلم ليگ (ن) جي اميدوار ۽ گلگت-بلتستان جي اڳوڻي وڏي وزير حافظ حفيظ الرحمان کي وڏي اڪثريت سان ڪامياب قرار ڏنو ويو آهي. ٻئي طرف، گلگت-2 مان، پاڪستان پيپلز پارٽي گلگت-بلتستان جي صدر ۽ اميدوار امجد حسين ايڊووڪيٽ پنهنجي مخالف اميدوارن کي شڪست ڏئي ڪاميابي حاصل ڪئي آهي. هيستائين ملندڙ غير سرڪاري نتيجن موجب، پاڪستان پيپلز پارٽي 10 سيٽن سان سڀ کان وڏي پارٽي طور سامهون آئي آهي، جڏهن ته پاڪستان مسلم ليگ (ن) 6 سيٽون کٽيون آهن. تحريڪ انصاف جا حمايت يافته اميدوار 2 سيٽون حاصل ڪرڻ ۾ ڪامياب ٿيا آهن، جڏهن ته 5 آزاد اميدوار ۽ مجلس وحدت مسلمين هڪ سيٽ تي ڪاميابي حاصل ڪئي آهي.