پاڪستان ۽ جاپان جا ناتا گڏيل اعتماد ۽ گڏيل خوشحاليءَ تي ٻَڌل مضبوط معاشي ڀائيواري جي عڪاسي ڪن ٿا: هارون اختر خان

اسلام آباد-10 فيبروري (اي پي پي) صنعت ۽ پيداوار بابت وزيراعظم جي صلاحڪار هارون اختر خان ان ڳالهه جي توثيق ڪئي آهي ته پاڪستان ۽ جاپان جا ناتا فقط سفارتي نوعيت جا ناهن پر گڏيل اعتماد ۽ گڏيل خوشحاليءَ تي ٻَڌل هڪ مضبوط معاشي ڀائيواري جي عڪاسي ڪن ٿا. جاپان جي سفير اڪاماتسو شوئچي ۽ ٻنهي ملڪن جي ناليواري ڪاروباري اڳواڻن جي موجودگيءَ ۾ جاپان – پاڪستان بزنس فورم کي خطاب ڪندي هارون اختر خان چيو ته علامه اقبال جو پيغام اڄ به پاڪستان جي قوم جي ويزن جي اڳواڻي ڪري رهيو آهي. اوڀر مان نڪرندڙ سج طرف ڏسڻ بابت اقبال جي مشهور شعر جو حوالو ڏيندي هن چيو ته جاپان جو سفر ان ڳالهه جو زندهه ثبوت آهي ته ويزن، نظم و ضبط ۽ مسلسل بهتري ڪنهن به قوم کي عالمي معاشي قيادت جي منزل تائين پهچائي سگهي ٿي. هن چيو ته پاڪستان، جاپان جي تجربن مان سکڻ ۽ ان کي جٽادار صنعتي ترقيءَ جون نيون راهون تلاش ڪرڻ لاءِ ڪتب آڻڻ جو خواهشمند آهي. پاڪستان ۽ جاپان وچ ۾ 70 سالن کان وڌيڪ ٻه طرفي سهڪار جو حوالو ڏيندي هن ان تعلق کي ڊگهي مُدي واري ڀائيواري ۽ گڏيل اعتماد جو روشن مثال قرار ڏنو. خاص صلاحڪار 2001ع ۾ قائم ٿيل جاپان- پاڪستان بزنس فورم جي مُک ڪردار کي ساراهيندي چيو ته هي فورم ٻه طرفي واپار، سيڙپڪاري ۽ بزنس ٽو بزنس رابطن کي هٿي وٺرائڻ ۾ اهم ڪردار ادا ڪري رهيو آهي. هن واضح ڪيو ته آٽو موبائل سيڪٽر ۾ جاپاني سيڙپڪاري پاڪستان جي صنعتي نظام ۾ ڪرنگهي جي هڏي بڻجي چڪو آهي. 1980ع جي ڏهاڪي جي شروعات کان جاپان جا ڪارساز ادارا روزگار جا موقعا پيدا ڪرڻ، ٽيڪنالاجي جي منتقلي ۽ مقامي سپلاءِ چين کي هٿي وٺرائڻ ۾ مرڪزي ادا ڪري رهيا آهن. هارون اختر ٻُڌايو ته هن وقت پاڪستان ۾ 80 کان وڌيڪ جاپاني ڪمپنيون ڪم ڪري رهيون آهن جيڪي هزارين پاڪستانين کي روزگار فراهم ڪري رهيون آهن ۽ معاشي سرگرمين ۽ سرڪاري محصولن ۾ نمايان حصو وجهي رهيون آهن. جاپاني سيڙپڪارن جي خدشن جو ذڪر ڪندي هن فورم کي خاطري ڏياري ته حڪومت ٽيڪس ريفنڊز، روانگي واپار ۽ ريگيوليٽري رڪاوٽن بابت مسئلن جي حل لاءِ سنجيده، متحرڪ ۽ مڪمل طور تي مصروف عمل آهي. هن زور ڀريندي چيو ته پاڪستان ٻُڌي به رهيو آهي ۽ عملي قدم به کڻي رهيو آهي ۽ ان ڳالهه تي زور ڀريو ته سيڙپڪاريءَ سان مسلسل ڳالهيون هڪ مستحڪم ۽ سازگار ڪاروباري ماحول لاءِ ترجيح آهي. وزيراعظم محمد شهباز شريف جي اڳواڻيءَ جو حوالو ڏيندي خاص صلاحڪار چيو ته پاڪستان صنعتي سڌارن لاءِ هڪ جامع عمل جي شروعات ڪري ڇڏي آهي جنهن جو مقصد ترقي کي جٽادار، جامع ۽ روانگي واپار تي ٻڌل بڻائڻ آهي. هن وڌيڪ چيو ته ون ونڊو سهولتن کي حاصل ڪرڻ خاص اقتصادي زونزن ۽ ريگيوليٽري گيلوٽين تحت سڌارن ذريعي غير ضروري قانونن ۽ ڳاڙهي ڦيٿي جو خاتمو ڪيو پيو وڃي ته جيئن سيڙپڪاريءَ لاءِ وڌيڪ دوستاڻو فريم ورڪ فراهم ڪري سگهجي. هن چيو ته نيشنل ٽيرف پاليسي، ٽيرف جي معقول جوڙجڪ ۽ پيداواري لاڳت ۾ گهٽتائيءَ ذريعي روانگي واپار تي ٻَڌل صنعتي ترقيءَ جو بنياد فراهم ڪري ٿي. هارون اختر نئين توانائي گاڏين جي پاليسي 30-2025ع طرف به ڌيان ڇڪرايو جنهن تحت 2030ع تائين 30 سيڪڙو اليڪٽرڪ گاڏين جو هدف مقرر ڪيو ويو آهي. هن چيو ته گرين موبيلٽي نه صرف ماحولياتي تحفظ ۾ مدد ڏيندي ۽ خاص ڪري عالمي ڀائيوارن لاءِ نوان صنعتي ۽ سيڙپڪاري جا موقعا به پيدا ڪندي. هن ڪاروباري عورت جي وڌندڙ ڪردار کي ساراهيندي چيو ته عورتون پاڪستان جي معيشت کي اڳتي وڌائڻ ۾ فعال ڪردار ادا ڪري رهيون آهن. هن ان ڳالهه جو ورجاءُ ڪيو ته ننڍي ۽ وچولي درجي جو ڪاروبار قومي معيشت جي اصل طاقت آهي ۽ ان کي هدفي پاليسين ۽ اداره جاتي معاونت ذريعي مڪمل سهولت فراهم ڪئي پئي وڃي. هن وڌيڪ ٻڌايو ته نيشنل جيم اسٽونز پاليسيءَ جو مقصد پاڪستان جي قيمتي معدني وسيلن کي عالمي سطح تي چٽاڀيٽي ۽ روانگي واپار جي شعبي ۾ تبديل ڪرڻ آهي. هارون اختر چيو ته پاڪستان جاپاني سيڙپڪارن لاءِ هڪ محفوظ، شفاف ۽ پُرڪشش مارڪيٽ فراهم ڪري ٿو. هن آٽوموبائل، آءِ ٽي، ڪلين انرجي، مينيوفيڪچرنگ ۽ انفراسٽرڪچر سميت اهم شعبن ۾ جاپان سان سهڪار کي وڌيڪ هٿي وٺرائڻ جي خواهش جو اظهار ڪيو. هن چيو ته پاڪستان گڏيل ترقي، جدت ۽ خوشحاليءَ جي مستقبل جي تعمير لاءِ جاپان سان گڏجي ڪم ڪرڻ لاءِ تيار آهي ۽ ٻنهي ملڪن جي حڪومتن، نجي شعبن ۽ ڪاروباري برادرين وچ ۾ گهري ڀائيواريءَ تي زور ڀريو.