اسلام آباد-09 فيبروري (اي پي پي) چيف جسٽس آف پاڪستان جسٽس يحيٰ آفريدي عدالتي سڌارن، انصاف تائين اثرائتي پهچ ۽ اداره جاتي مضبوطي جي عزم جو ورجاءُ ڪندي چيو آهي ته هڪ مضبوط، شفاف ۽ عوام دوست عدالتي نظام جٽادار ترقي ۽ جمهوري حڪمراني جو بنياد آهي. سپريم ڪورٽ جي سڌ سماءَ واري شعبي مان جاري پڌرائيءَ موجب اهڙن خيالن جو اظهار هن گڏيل قومن جي اعليٰ سطحي وفد سان …
مضبوط، شفاف ۽ عوام دوست عدالتي نظام جٽادار ترقي ۽ جمهوري حڪمراني جو بنياد آهي: چيف جسٽس يحيٰ آفريدي
مزید خبریں
اسلام آباد-09 فيبروري (اي پي پي) چيف جسٽس آف پاڪستان جسٽس يحيٰ آفريدي عدالتي سڌارن، انصاف تائين اثرائتي پهچ ۽ اداره جاتي مضبوطي جي عزم جو ورجاءُ ڪندي چيو آهي ته هڪ مضبوط، شفاف ۽ عوام دوست عدالتي نظام جٽادار ترقي ۽ جمهوري حڪمراني جو بنياد آهي. سپريم ڪورٽ جي سڌ سماءَ واري شعبي مان جاري پڌرائيءَ موجب اهڙن خيالن جو اظهار هن گڏيل قومن جي اعليٰ سطحي وفد سان ملاقات دوران ڪيو، جتي پاڪستان جي انصاف واري نظام کي جديد گهُرجن سان هم آهنگ ڪرڻ تي تفصيلي خيالن جي ڏي وٺ ڪئي وئي. چيف جسٽس سان گڏيل قومن جي پاڪستان ۾ ريزيڊنٽ ڪوآرڊينيٽر محمد يحيٰ وفد سان ملاقات ڪئي، جنهن ۾ گڏيل قومن جي ترقياتي پروگرام (يو اين ڊي پي)، يو اين وومين، يونيسيف، منشيات ۽ ڏوهن جي خاتمي بابت گڏيل قومن جي آفيس ۽ يو اين ايف پي اي جي ملڪي نمائندن به شرڪت ڪئي. ملاقات ۾ عدالتي سڌارن جي ترجيحن، اداره جاتي ڪارڪردگيءَ ۾ بهتري، گورننس کي هٿي وٺرائڻ ۽ قانون جي بالادستي تي عوامي اعتماد ۾ واڌ جي معاملن تي جامع ڳالهيون ڪيون ويون. چيف جسٽس چيو ته عدالتي سڌارن ۽ جٽادار ترقياتي هدف (ايس ڊي جيز) جو پاڻ ۾ گهرو ناتو آهي ڇاڪاڻ ته اهي هدف انصاف تائين برابر پهچ ۽ اثرائتي، جوابده ۽ شفاف ادارن جي قيام تي زور ڏين ٿا. هن ان ڳالهه تي زور ڀريو ته هڪ اعتماد جوڳو ۽ مضبوط عدالتي نظام نه صرف بنيادي حقن جي تحفظ جي ضمانت آهي پر جٽادار ترقي ۽ جمهوري نظام جي استحڪام لاءِ پڻ اڻٽر آهي. هن انصاف جي فراهميءَ کي تيز، آسان ۽ شموليتي بنائڻ لاءِ جاري سڌارن وارن قدمن تي روشني وجهندي چيو ته عدالتي نظام کي شهرين جي ضرورتن موجب آڻڻ وقت جي اهم ضرورت آهي. چيف جسٽس موجب ٽيڪنالاجي جي اثرائتي استعمال، عدالتي عملي جي تربيت ۽ پاليسي سطح تي سڌارن ذريعي انصاف جي نظام ۾ جٽادار بهتري آڻي سگهجي ٿي. چيف جسٽس پاڪستان ۾ گڏيل قومن جي ادارن طرفان قانون جي بالادستي، انساني حقن جي تحفظ، صنفي برابري، ٻارن بابت حساس انصاف ۽ عدالتي ادارن جي سگهه کي وڌائڻ لاءِ کنيل قدمن کي ساراهيو. هن چيو ته گڏيل قومن جو سهڪار قومي سطح تي جاري سڌارن جي ڪوششن لاءِ هڪ اثرائتو ڪردار ادا ڪري رهيو آهي. ملاقات ۾ مستقبل ۾ عدليه ۽ گڏيل قومن جي ادارن وچ ۾ سهڪار جي امڪانن تي پڻ غور ڪيو ويو، جن ۾ فني معاونت، عدالتي تعليم ۽ تربيت، شاهدين ۽ ڊيٽا تي ٻَڌل سڌارن، پاليسي معاونت ۽ عالمي بهترين تجربن جي مٽاسٽا شامل آهي. ڌُرين ان ڳالهه تي اتفاق ڪيو ته منظم ۽ پُراڻي ڀائيواريءَ ذريعي عدالتي نظام کي پيش ايندڙ موجوده ۽ ايندڙ چئلينجز سان اثرائتي انداز ۾ مُنهن ڏئي سگهجي ٿو. ملاقات جي پڄاڻيءَ تي ڌُرين پاڪستان جي آئيني قدرن ۽ عالمي ترقياتي واعدن موجب عدالتي سڌارن کي هٿي وٺرائڻ، گڏيل سهڪار ۽ مسلسل ڳالهين جي عزم جو ورجاءُ ڪيو.
