واپار واري وفاقي وزير سان قازقستان جي هم منصب جي ملاقات، ٻنهي ملڪن وچ ۾ واپار ۽ سيڙپڪاري ۾ تعاون وڌائڻ تي اتفاق

اسلام آباد -04 فيبروري (اي پي پي) واپار واري وفاقي وزير ڄام ڪمال خان سان قازقستان جي واپار واري وزير ارمان شقاقليف اسلام آباد ۾ ملاقات ڪئي. ملاقات ۾ ٻه طرفه واپار جي صورتحال جو جائزو ورتو ويو ۽ اقتصادي سهڪار، رابطن ۽ سيڙپڪاري کي وڌائڻ جي حوالي سان پڻ ڳالهيون ڪيون ويون. ملاقات ۾  پاڪستان ۽ وچ ايشيا وچ ۾ رابطن جي چئلينجز کي منهن ڏيڻ ۽ ٻنهي ملڪن وچ ۾ مڪمل واپاري امڪانن کي کولڻ لاءِ عملي حل تي ڳالهيون ڪيون ويون. ڌرين ان ڳالهه تي اتفاق ڪيو ته ريل، روڊ ۽ ملٽي ماڊل جي بهتر ڪنيڪٽوٽي پاڪستان ۽ قازقستان وچ ۾ واپار کي مضبوط بڻائڻ، ڊگهي مدي وارن اقتصادي رابطن کي فعال بڻائڻ لاءِ بنيادي حيثيت رکن ٿا. قازقستان جي وزير بنيادي ڍانچي جي وڏن منصوبن خاص طور تي ريلوي ۽ روڊن جي راهدارين کي تيار ڪرڻ جي اهميت کي اجاگر ڪيو.  جنهن مان اٽڪل 5 ارب آمريڪي ڊالرز جي واپار ۽ سيڙپڪاري جا امڪان پيدا ٿي سگهن ٿا جڏهن ته روزگار جا موقعا پڻ پيدا ٿي سگهن ٿا ۽ علائقائي سپلاءِ چينز کي سپورٽ ڪري سگهجي ٿي. وفاقي وزير ڄام ڪمال خان علائقائي ۽ جاگرافيائي ۽ سياسي چئلينجز جو اعتراف ڪندي ترڪمانستان ۽ افغانستان ذريعي وچ ايشيا سان سڌي ريت رابطا وڌائڻ ۾ پاڪستان جي دلچسپي جو اظهار ڪيو. هن چيو ته بهتر ٽرانزٽ روٽ ذريعي نه رڳو پاڪستان ۽ قازقستان کي فائدو پهچندو پر علائقائي ۽ عالمي واپار جا وسيع موقعا پڻ کلندا، جن ۾ پاڪستان جي بندرگاهن ذريعي آفريقي ۽ آسيان مارڪيٽن تائين رسائي پڻ شامل آهي.ٻنهي وزيرن مختلف شعبن زراعت ۽ فوڊ سيڪيورٽي، فارماسيوٽيڪل، ٽيڪسٽائيل، راندين جي سامان، چمڙي جي مصنوعات، معدنيات، توانائي ۽ بنيادي ڍانچي جي ترقي ۾ سهڪار تي پڻ ڳالهيون ڪيون. ٻنهي ڌرين ان ڳالهه تي اتفاق ڪيو ته واپار کي هٿي وٺائڻ وارن ادارن کي ريگيوليٽري رڪاوٽون پيدا ڪرڻ کان سواءِ ڪاروباري ادارن سان ڳنڍي مارڪيٽ، انٽيليجنسي جي ڀائيواري ۽ ميچ ميڪنگ جي حمايت ڪندي هڪ سهولتڪار جو ڪردار ادا ڪرڻ گهرجي. جڏهن ته ان حوالي سان ترجيحي شعبن، واپاري هدفن، واپاري مشنز، نمائشن ۽ وفدن جي مٽاسٽا سميت  مختلف سرگرمين جي روڊ ميپ جو خاڪو پيش ڪرڻ لاءِ فريم ورڪ دستاويزن کي حتمي شڪل ڏيڻ لاءِ ڪم ڪرڻ تي پڻ اتفاق ڪيو ويو.