نائب وزيراعظم ۽ پرڏيهي وزير سينيٽر محمد اسحاق ڊار جي جرمن پرڏيهي وزير جوهان وڊي فل سان ملاقات

برسلز – 21 نومبر (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار برسلز ۾ چوٿين يورپي يونين انڊو-پيسفڪ وزارتي فورم جي موقعي تي جرمن پرڏيهي وزير جوهان وڊي فل سان ملاقات ڪئي. پرڏيهي آفيس جي مطابق ٻنهي وزيرن پاڪستان ۽ جرمني جي لاڳاپن جي مثبت اڳڀرائي تي اطمينان جو اظهار ڪيو ۽ دفاع، سياسي، معاشي، واپار ۽ سيڙپڪاري ۽ تعليمي شعبن ۾ تعاون کي وڌيڪ مضبوط ڪرڻ جي عزم کي ورجايو. انهن علائقائي ۽ عالمي صورتحال تي پڻ خيالن جي ڏي وٺ ڪئي ۽ گڏيل مفاهمت کي فروغ ڏيڻ ۽ گڏيل تعاون جي شعبن ۾ تعاون کي وڌائڻ لاءِ ويجهي ڳالهه ٻولهه کي برقرار رکڻ تي اتفاق ڪيو. نائب وزيراعظم 2025ع ۽ 2026ع لاءِ جرمني جي 114 ملين يورو جي عزم کي به ساراهيو. نائب وزيراعظم جرمن قيادت کي پاڪستان جو دورو ڪرڻ جي دعوت پڻ ڏني.