اسلام آباد-29 آگسٽ (اي پي پي) سائنس ۽ ٽيڪنالاجي واري وفاقي وزير خالد حسين مگسي چيو آهي ته ڪنهن به قوم جي ترقي انجنيئرز جي ويزن ۽ جدت کانسواءِ ممڪن ناهي. هو پاڪستان انجنيئرنگ ڪائونسل طرفان انجنيئرز ايڪسيلينس ايوارڊ 2023ع جي تقريب کي خطاب ڪري رهيو هو. تقريب ۾ 30 ناليوارن انجنيئرز کي 8 مختلف شعبن ۾ انهن جي قومي خدمتن لاءِ اعزاز ڏنا ويا. ان موقعي تي پرڏيهي نمائندا، پارليامينٽ جا ميمبر، اعليٰ سرڪاري عملدار، سينيئر انجنيئر ۽ ٻيا موجود هئا. وفاقي وزير پي اي سي جي ڪوششن کي ساراهيندي چيو ته هي ايوارڊز نه صرف ذاتي ڪاميابيءَ جو اعتراف آهن پر قومي ترقي، پيشيوراڻي مهارت ۽ نوجوانن لاءِ هڪ مثال پڻ آهن. هن ”سمارٽ پي اي سي ڊرائيو“، بلوچستان لاءِ خصوصي پروگرامز، گريجوئيٽ انجنيئرز ٽريننگ پروگرام، جنريٽيو اي آءِ ڪورسز ۽ پي اي سي جي عالمي سطح تي ڪاميابين جو به ذڪر ڪيو. پي اي سي جي چيئرمين انجنيئر وسيم نذير به خطاب ڪيو.
