اسلام آباد – 29 آگسٽ (اي پي پي) قومي اسيمبلي جي اطلاعات ۽ نشريات بابت اسٽينڊنگ ڪميٽي ايسوسيئيٽيڊ پريس آف پاڪستان (اي پي پي) جي مئنيجنگ ڊائريڪٽر محمد عاصم کچي کي اداري ۾ اربين رپين جي وڏي مالياتي اسڪينڊل کي بي نقاب ڪرڻ تي سندس مثالي ڪردار تي زبردست خراج تحسين پيش ڪيو. ايم اين اي پُلين بلوچ جي صدارت ۾ ٿيندڙ اجلاس ۾ ڪميٽي متفقه طور تي محمد عاصم کچي کي ساراهيو، جنهن هڪ جامع اندروني جاچ جي شروعات ڪئي جنهن جي نتيجي ۾ وڏي پئماني تي مالي بي ضابطگين جو انڪشاف ٿيو. ان جاچ ۾ پبلڪ سيڪٽر ڊيولپمينٽ پروگرام (پي ايس ڊي پي) جي هڪ منصوبي مان 1.24 ارب رپين جو گهپلو سامهون آيو، جڏهن ته جعلي ڀرتين ۽ اداري جي پروويڊنٽ فنڊ جي ناجائز استعمال جو جدا اسڪينڊل پڻ بي نقاب ٿيو. ڪميٽي ايم ڊي کي ”وسل بلوئر“ قرار ڏيندي سندس ديانتداري ۽ اصولي عزم کي ساراهيو جنهن جي ذريعي هن بدعنواني جي منظم نيٽ ورڪ کي ٽوڙيو. چيئرپرسن پُلين بلوچ زور ڏنو ته احتساب جي عمل ۾ بنا سبب جي دير نه ٿيڻ گهرجي ۽ يقين ڏياريو ته ڏوهارين کي انصاف جي ڪٽهڙي ۾ آڻڻ جي لاءِ مڪمل پارلياماني تعاون فراهم ڪيو ويندو. اطلاعات ۽ نشريات واري سيڪريٽري عنبرين جان پڻ ان اسڪينڊل کي بي نقاب ڪرڻ ۾ محمد عاصم کچي جي فيصلائتي ڪردار کي تسليم ڪيو ۽ وزارت جي شفافيت ۽ اداراجاتي احتساب جي عزم کي ورجايو. ڪميٽي جي ميمبرن، جن ۾ ڪرن عمران ڊار ۽ سيد امين الحق (ايم ڪيو ايم) شامل هئا، انهن اداراجاتي شفافيت کي مضبوط بڻائڻ جي لاءِ ايم ڊي اي پي پي جي سڌاراجاتي ايجنڊا جي توثيق ڪئي. امين الحق وڌيڪ پڇيو ته ڇا ايماندار ايم ڊي کي بدعنوان نيٽ ورڪ سان واڳيل عنصرن پاران ڪنهن به قسم جون ڌمڪيون مليون آهن يا نه، ۽ ٻين ميمبرن سان گڏجي ان جي شفافيت برقرار رکڻ ۽ ٻاهرئين دٻاءُ جي خلاف ڄمي بيهڻ جي ڪوششن ۾ اڻٿڪ حمايت جو عزم ظاهر ڪيو. ڪميٽي متفقه طور تي ان عزم جو پڻ ورجاءُ ڪيو ته سمورن ميڊيا سان لاڳاپيل ادارن ۾ احتساب کي يقيني بڻايو ويندو ۽ ”اي پي پي“ جي مئنيجنگ ڊائريڪٽر کي هدايت ڪئي ته گهپلو ٿيل رقم جي وصولي جي لاءِ سمورا ضروري قدم کنيا وڃن.
