اسلام آباد – 29 آگسٽ (اي پي پي) قومي اسيمبلي جي اطلاعات ۽ نشريات بابت اسٽينڊنگ ڪميٽي قومي خابرو اداري ايسوسيئيٽيڊ پريس آف پاڪستان (اي پي پي) جي مئنيجنگ ڊائريڪٽر محمد عاصم کچي پاران اداري ۾ اربين رپين جي ڪرپشن بي نقاب ڪرڻ تي سندس ايمانداري ۽ جرئت کي ساراهيو آهي. ڪميٽي جو اجلاس قومي اسيمبلي پُلين بلوچ جي صدارت ۾ ٿيو. ڪميٽي اي پي پي جي ايم ڊي کي بطور ”وسل بلوور“ خراج تحسين پيش ڪندي اداري جي اندر ڪرپشن جي منظم نيٽ ورڪ کي بي نقاب ڪرڻ تي سندس ڪردار کي ساراهيو. ڪميٽي جي چيئرمين پُلين بلوچ احتساب جي عمل کي بنا سبب ڊيگهه نه ڏيڻ تي زور ڏيندي ڪميٽي پاران ڦريل عوامي فنڊز جي ريڪوري ۽ جوابدارن کي انصاف جي ڪٽهڙي ۾ آڻڻ جي لاءِ مڪمل تعاون جو يقين ڏياريو. اطلاعات واري وفاقي سيڪريٽري عنبرين جان پڻ اي پي پي جي ايم ڊي محمد عاصم کچي جي ديانتداري کي ساراهيو ۽ شفافيت ۽ اداراجاتي احتساب جي لاءِ پنهنجي وزارت جي مڪمل حمايت جو ورجاءُ ڪيو. ڪميٽي ميمبر ڪرن ڊار ايم ڊي اي پي پي جي سڌاراجاتي ايجنڊا جي حمايت کي ساراهيندي چيو ته اداري جي شفافيت ۾ اضافو وقت جي ضرورت آهي. ايم ڪيو ايم جي سيد امين الحق پڇيو ته ڇا ايم ڊي کي ڪرپٽ مافيا کان ڌمڪيون مليون آهن؟ هن ۽ ٻين ميمبر هر طرح جي دٻاءُ جي خلاف ايم ڊي اي پي پي جي جدوجهد ۾ مُڪمل تعاون جي عزم جو اظهار ڪيو. اجلاس ۾ متفقه طور تي فيصلو ڪيو ويو ته ميڊيا سان لاڳاپيل سمورن ادارن ۾ شفافيت ۽ احتساب کي يقيني بڻايو ويندو ۽ ايم ڊي اي پي پي کي هدايت ڪئي وئي ته ڦرلٽ ڪيل فنڊز جي بازيابي جي لاءِ سمورا ضروري قدم کڻي. ان کان اڳ ڪميٽي کي بريفنگ ڏيندي اي پي پي جي ايم ڊي محمد عاصم کچي ٻڌايو ته اداري جي سطح تي انڪوائري ۾ پي ايس ڊي پي فنڊز منصوبي ۾ 124 ارب رپين کان وڌيڪ جا گهپلا سامهون آيا آهن. ملازمن بابت خرچن، جعلي ڀرتين ۽ پروويڊنٽ فنڊ ۾ پڻ بي ضابطگيون ڏٺيون ويون جنهن تي ايف آءِ اي اڳوڻي ايگزيڪيوٽو ڊائريڪٽرز، مئنيجرز ۽ ڪلريڪل اسٽاف سميت 16 ماڻهن جي خلاف ڪيس داخل ڪيو آهي. هن اي پي پي جي مختلف شعبن جي فعاليت بابت ٻڌايو ته اي پي پي جي ويب سائيٽ تان ساليانو 24 لک رپين جي آمدني حاصل ٿي رهي آهي جنهن سان اداري جي وڌندڙ ڊيجيٽل آمدني جي صلاحيت جي عڪاسي ٿئي ٿي. هن ٻڌايو ته اي پي پي جي ويب سائيٽ کي لوڪل سرور تي منتقل ڪيو ويو آهي جنهن سان ساليانو 9 هزار ڊالر جي بچت ٿيندي، ويب سائيٽ جا امپريشنز 85 ملين رڪارڊ ڪيا ويا، فيس بڪ تي فالورز جو انگ 1 ڪروڙ 3 لک، ٽڪ ٽاڪ تي 1 ڪروڙ، ايڪس تي 15 لک، انسٽاگرام تي 3 لک 19 هزار ۽ يو ٽيوب تي هڪ لک 37 هزار ٿي چڪو آهي. اي پي پي خبرون جاري ڪرڻ ۽ انهن کي ويب سائيت تي اپ لوڊ ڪرڻ جي ان تسلسل کي برقرار رکيو آهي، روزانو 350 کان 400 خبرون ويب تي شايع ٿين ٿيون. هن ڪميٽي ميمبرن کي ٻڌايو ته 11 غيرملڪي نيوز ايجنسين سان مفاهمت جي يادداشتن تي صحيحن جي لاءِ ڪابينا جي منظوري جو انتظار آهي. ايم ڊي اي پي پي ڪميٽي کي ٻڌايو ته ڊگري ويريفڪيشن ڪميٽي ڇنڊڇاڻ جو عمل تقريبن مڪمل ڪري ورتو آهي ۽ جعلي ڊگري رکندڙن جي خلاف سخت ڪارروائي ٿيندي. اهڙي طرح پينشنرز جي لاءِ هر ڇهن مهينن کانپوءِ ”لائيف سرٽيفڪيٽ“ جمع ڪرائڻ لازمي قرار ڏنو ويو آهي جڏهن ته گذريل ٽن وفاقي بجيٽ ۾ اعلان ڪيل پينشن اضافي کي شامل ڪرڻ جي لاءِ فنانس ڊويزن آڏو 30 ڪروڙ رپين جو مطالبو رکيو ويو آهي. ايم ڊي اي پي پي چيو ته آمدني وڌائڻ جي لاءِ ڪيتريون ئي حڪمت عمليون تيار ڪيون ويون آهن ۽ ساليانو 20 ڪروڙ رپين تائين جي آمدني متوقع آهي. اطلاعات واري سيڪريٽري عنبرين جان ڪميٽي کي ٻڌايو ته پاڪستان ٽيليويزن ڪارپوريشن (پي ٽي وي) ۾ آپريشنل ڪارڪردگي بهتر بڻائڻ جي لاءِ سڌارا جاري آهن. پي ٽي وي ملازمن جي رهتن جي ادائيگي جي لاءِ 11 ارب رپين جي منظوري ڏني وئي آهي ۽ وڌيڪ 4.5 ارب رپين جي مطالبي جي تياري ڪئي پئي وڃي. هن ٻڌايو ته مستقل، ڪنٽريڪٽ ۽ ڊيلي ويجز ملازمن جا پگهار 25 جون تائين ادا ڪيا ويا آهن. پريس انفارميشن ڪميشن (پي آءِ سي) جي نمائندي ٻڌايو ته گذريل 8 سالن ۾ 6 هزار 340 شڪايتون مليون جن مان 5 هزار 435 اڪلايون ويون جڏهن ته 905 التوا هيٺ آهن. 268 اپيلون مختلف هاءِ ڪورٽس ۾ ٻڌڻي جي مرحلن ۾ آهن. پرنسپل انفارميشن آفيسر مبشر حسن ڪميٽي کي آگاهه ڪيو ته 14 آگسٽ جي تقريبن کي ”معرڪه حق“ جي يادگار سان ڳنڍيو ويو. آزادي جي ڏهاڙي جي موقعي تي سرڪاري اشتهار ۾ قائداعظم جي تصوير نه هجڻ بابت هن ٻڌايو ته او آءِ سي جي اوورسائيٽ امپليمينٽيشن ڪميٽي پنهنجي انڪوائري مڪمل ڪري ورتي آهي جنهن ۾ انڪشاف ٿيو ته 14 آگسٽ جي اشتهار جي منظور ٿيل مواد ۾ قائداعظم محمد علي جناح جي تصوير شامل نه هئي. ايڊورٽائيزنگ ايجنسي ان ڪوتاهي کي تسليم ڪندي پنهنجي غلطي مڃي ورتي، جڏهن ته ڪميٽي قائداعظم جي اهميت جي ڏس ۾ ان معذرت کي ناڪافي قرار ڏنو. پي آءِ او وڌيڪ ٻڌايو ته 25 – 2024ع جي اخبارن جون رهتون هلندڙ سال سيپٽمبر تائين ادا ڪيون وينديون. اجلاس ۾ سينيٽر سحر ڪامران، امين الحق، آسيه ناز تنولي، راڻا انصر، ڪرن ڊار، شاهين ۽ صلاح الدين جوڻيجو شرڪت ڪئي. مهتاب اڪبر راشدي اجلاس ۾ آن لائين شرڪت ڪئي.
