ڪراچي-29 آگسٽ (اي پي پي) سنڌ مدرسته الاسلام يونيورسٽيءَ جي قيام جو 141هون ڏهاڙو پهرين سيپٽمبر تي شاندار نموني سان ملهايو ويندو، تقريب جو خاص مهمان سنڌ جي يونيورسٽين جو پرو- چانسلر ۽ تعليم ۽ خواندگيءَ وارو صوبائي وزير سيد سردار علي شاهه هوندو. سنڌ مدرسته الاسلام يونيورسٽيءَ جي ميڊيا ونگ پاران جاري ڪيل پڌرائي مُوجب ان سلسلي ۾ وائس چانسلر ڊاڪٽر مجيب صحرائيءَ جي صدارت هيٺ يونيورسٽيءَ جي مختلف شعبن جي سربراهن ۽ لاڳاپيل ملازمن جو اجلاس ٿيو، جنهن ۾ سنڌ مدرسته الاسلام جي قيام واري ڏينهن جي تقريب جي انتظامن جو جائزو ورتو ويو ۽ انهن کي آخري شڪل ڏني وئي. اجلاس کي خطاب ڪندي ڊاڪٽر مجيب صحرائي چيو ته سنڌ مدرسته الاسلام جي قيام وارو ڏينهن وڏي جوش ۽ جذبي سان ملهائڻ سنڌ مدرسته الاسلام جي هڪ شاندار روايت رهي آهي، جنهن کي جاري رکندي، هن ڀيري به اهو ڏينهن ڀرپور طريقي سان ملهايو ويندو. هن چيو ته سنڌ مدرسته الاسلام جي قائم ٿيڻ جو ڏينهن نه رڳو هن اداري جي تاريخ پر ملڪ جي تاريخ ۾ پڻ هڪ اهم سڃاڻپ ۽ حيثيت رکي ٿو، تنهن ڪري اسان کي پنهنجن ادارن جي ڪاميابين ۽ قومي خدمتن کي ملهائڻ گهرجي.
جڏهن ته پهرين سيپٽمبر تي ملهائجندڙ 141هين ڏهاڙي جي موقعي تي مرزا قليچ بيگ جي خانبهادر حسن علي آفنديءَ جي سوانح عمري واري لکيل ڪتاب جو انگريزي ترجمي وارو ڪتاب، جيڪو ليکڪ ۽ اسسٽنٽ پروفيسر وفا منصور ٻرڙو ترجمو ڪيو آهي تنهنجي مهورت پڻ ٿيندي. ان سان گڏ ايس ايم آءِ المناءِ ايسوسيئيشن جي قيام جو پڻ اعلان ڪيو ويندو. ان موقعي تي ايس ايم آءِ يونيورسٽي ۽ ايس ايم آءِ يو ماڊل اسڪول جا شاگرد گيت ۽ ٽيبلوز پڻ پيش ڪندا. جڏهن پروگرام ۾ مختلف يونيورسٽين جي وائس چانسلرز، تعليمي ماهرن، دانشورن ۽ سرڪاري عملدارن سميت ٻيون اهم شخصيتون شرڪت ڪنديُون. جڏهن ته وائس چانسلر ڊاڪٽر مجيب صحرائي، مشهور تعليمدان سيد جعفر احمد، سنڌ مدرسه يونيورسٽي جي سوشل اينڊ ڊويلپمينٽ اسٽڊيز شعبي جو چيئرپرسن ڊاڪٽر سڀاش بابو ۽ ڊائريڪٽر اسٽوڊنٽس افيئرز اينڊ ڪائونسلنگ محمد نعيم احمد پُڻ تقريب کي خطاب ڪندا.
