اسلام آباد-29 آگسٽ (اي پي پي) ناڻي ۽ محصولن واري وفاقي وزير سينيٽر محمد اورنگزيب چيو آهي ته پاڪستان گڏيل عرب امارتن سان اقتصادي ۽ سيڙپڪاري واري حصيداريءَ کي سڀ کان وڌيڪ اهميت ڏئي ٿو، يو اي اي جي سيڙپڪارن کي سهولتون فراهم ڪرڻ لاءِ پُرعزم آهيون، کاڻين جي کوٽائي واري شعبي خاص ڪري ريڪوڊڪ پراجيڪٽ ۾ شاندار موقعا موجود آهن، ٽيرف سڌارا ۽ ڊجيٽل ۽ ايڪسپورٽ پروموشن پاليسيز حڪومت جي آئينده سڌارا جاتي ايجنڊا جي عڪاس آهن. ناڻي واري وزير اهڙو اظهار ابوظهبي ۾ قائم عالمي سيڙپڪار ۽ اسٽريٽجڪ ايڊوائيزري خدمتن جي فراهم ڪندڙ ڪمپني اي آءِ ايڪس جي گروپ چيف انفارميشن آفيسر محمد برادي جي اڳواڻيءَ ۾ يو اي اي جي ناليوارن سيڙپڪارن ۽ واپارين جي وفد سان ملاقات ۾ ڪيو. وفد جي آجيان ڪندي ناڻي واري وزير ان جي پاڪستان جي دؤري کي ساراهيو. ناڻي واري وزير وفد کي پاڪستان جي معيشت ۽ گذريل ڏيڍ سال دوران ڪيل وڏي پيماني تي ڍانچه جاتي سڌارن بابت آگاهه ڪيو. هن زور ڀريو ته سمورن معاشي اهڃاڻن ۾ مثبت اڳڀرائيءَ جو تسلسل برقرار آهي، ڪيترن ئي سالن کانپوءِ ڪرنٽ اڪائونٽ کاتي جو توازن فاضل ٿي ويو آهي، ناڻي واڌ سنگل ڊجيٽ آهي، ملڪي ڪرنسي ۽ مٽاسٽا جي ناڻي جا ذخيرا مستحڪم آهن، عالمي ريٽنگ ايجنسين طرفان پاڪستان جي ڪريڊٽ ريٽنگ ۾ بهتري آئي آهي جنهن سان ملڪي معيشت تي پرڏيهي اعتماد جي عڪاسي ٿي رهي آهي. هن روانگي واپار ۽ پرڏيهه مان پورهيتن پاران موڪليل ناڻي کي همٿائيندڙ قرار ڏيندي چيو ته پاڪستان اسٽاڪ ايڪسچينج ۾ واپار ۽ سيڙپڪاري جون سرگرميون ۽ تيزي بي مثال آهن، 70 هزار کان وڌيڪ نَون سيڙپڪارن جي شموليت ملڪي ۽ـ پرڏيهي سيڙپڪارن جي اعتماد ۾ واڌ ڪئي آهي. ناڻي واري وزير سيڙپڪارن جي خدشن کي ختم ڪرڻ لاءِ حڪومت جي عزم کي ورجايو ۽ چيو ته ٽيڪس سڌارا، ٽيرف ۾ گهٽتائي، سرڪاري ادارن جي نجڪاري ۽ ٻين جرئتمنداڻي ڍانچه جاتي قدمن معيشت کي بنيادي طور تي تبديل ڪرڻ جي ڪوشش ڪئي آهي. هن ٻُڌايو ته کاڻين جي کوٽائي واري شعبي خاص ڪري ريڪوڊڪ پراجيڪٽ ۾ شاندار موقعا موجود آهن جيڪي پائيدار پرڏيهي سيڙپڪاري ذريعي پرڏيهي شعبي کي مضبوط ڪندا. هن سيڙپڪاريءَ جي ماحول کي بهتر بنائڻ لاءِ جلد سامهون ايندڙ نئين صنعتي پاليسيءَ جي باري ۾ به آگاهه ڪيو ۽ چيو ته ٽيرف سڌارا ۽ ڊجيٽل ۽ ايڪسپورٽ پروموشن پاليسيز حڪومت جي ايندڙ سڌارا جاتي ايجنڊا جي عڪاسي آهن. ناڻي واري وزير وڌيڪ ٻُڌايو ته ٽيڪس نيٽ کي مينيوفيڪچرنگ ۽ پگهاردار طبقي سان اڳتي وڌائي خدمتن، هول سيل، ريٽيل ۽ زرعي شعبي تائين پکيڙيو پيو وڃي، جڏهن ته ڪاروبار لاءِ توانائي ۽ فنانسنگ لاڳت گهٽ ڪرڻ تي به ڪم جاري آهي. هن نجڪاري جي جاري عمل تي روشني وڌي ۽ چيو ته ايندڙ هفتن ۽ مهينن ۾ پي آءِ اي ۽ ٻين رياستي اثاثن جي وڏي ڊيلز اڳتي وڌائي ويندي. هن ٻُڌايو ته پاڪستان پهريون ڀيرو پانڊا بانڊ جاري ڪرڻ ذريعي عالمي ڪيپيٽل مارڪيٽس ۾ داخل ٿيڻ جي تياري ڪري رهيو آهي، جڏهن ته مستقبل ۾ يورو ۽ آمريڪي ڊالر بانڊز به جاري ڪرڻ منصوبي جو حصو آهن ته جيئن ذخيرا وڌيڪ مستحڪم ڪري سگهجن. ماحولياتي ۽ موسمياتي تبديلين جي حوالي سان پاڪستان جي حساسيت کي اجاگر ڪندي ناڻي واري وزير چيو ته موسمياتي لحاظ سان موزون منصوبا اڻٽر آهن ۽ ان مقصد لاءِ آءِ ايم ايف، ورلڊ بئنڪ ۽ ايشيائي ترقياتي بئنڪ جهڙن ادارن سان مالي معاونت دستياب آهي، پر ان لاءِ سيڙپڪاري جوڳا ۽ بئنڪ ايبل منصوبا ضروري آهن. هن واضح ڪيو ته پاڪستان جي ترقيءَ جو رستو سيڙپڪاري ۽ روانگي واپار تي ٻَڌل اؤسر ۾ آهي، جنهن ۾ پرڏيهي سيڙپڪار خاص ڪري گڏيل عرب امارتن جا سيڙپڪار، مقامي ڪاروبار سان گڏجي اهم ڪردار ادا ڪندا. هن خاطري ڪرائي ته حڪومت ان جي سيڙپڪاريءَ ۾ ڀرپور تعاون فراهم ڪندي. يو اي اي جي وفد به خيرسگالي جي جذبي جو اظهار ڪيو ۽ پاڪستان ۾ شاندار آڌرڀاءُ ۽ مثبت ۽ تعميري ملاقاتن تي ٿورو مڃيو. هن پاڪستان جي معيشت جي مثبت رجحان، ڍانچه جاتي سڌارن ۾ اڳڀرائي ۽ اهم شعبن جي لچڪ کي ساراهيو. وفد پاڪستان جي صلاحيتن تي اعتماد جو اظهار ڪيو ۽ـ چيو ته پاڪستان جو بنيادي ڍانچو نوجوان آباديءَ جي فائدن ۽ ڊگهي مُدي واري سيڙپڪاريءَ جا بي پناهه امڪان رکي ٿو. هن واضح ڪيو ته هو صرف پئسو ئي نه پر اسٽريٽجڪ مهارت به گڏ آندي آهي ۽ پاڪستان ۾ سڌارن جي سفر ۾ سڀ کان اڳتي رهڻ جو خواهشمند آهي. هن زور ڀريو ته پاڪستان ۽ يو اي اي وچ ۾ سيڙپڪاري ۽ افرادي سگهه جي وڌندڙ مٽاسٽا سان معاشي لاڳاپا وڌيڪ گهرا ٿيندا ۽ ٻئي ملڪ گڏيل مفاد تي ٻَڌل حصيداريءَ جي ذريعي گڏجي ترقي ڪندا. ناڻي واري وزير عزم کي ورجايو ته پاڪستان گڏيل عرب امارتن سان اقتصادي ۽ سيڙپڪاري واري حصيداريءَ کي سڀ کان وڌيڪ اهميت ڏئي ٿو ۽ يو اي اي جي سيڙپڪارن کي هر ممڪن سهولتون فراهم ڪرڻ لاءِ پُرعزم آهي. هن ان ڳالهه تي اعتماد ظاهر ڪيو ته ان ملاقات سان پيدا ٿيل مثبت رفتار جلد ٺوس سيڙپڪارين ۽ گڏيل منصوبن ۾ تبديل ٿيندي، جنهن سان ٻنهي ڀائر ملڪن وچ ۾ معاشي لاڳاپا وڌيڪ مستحڪم ٿيندا.
