اسلام آباد-29 آگسٽ (اي پي پي) سينيٽ جي چيئرمين سيد يوسف رضا گيلاني ان عزم کي ورجايو ته پاڪستان سريلنڪا سان نه صرف ثقافتي رابطن کي هٿي ڏيندو پر ٽيڪسيلا تخت ڀائي ۽ وادي سوات ۾ موجود گڏيل ٻڌمت ورثي جي ماڳن کي محفوظ بڻائڻ ۽ عوامي سطح تي رابطا وڌائڻ ۾ به پنهنجو ڪردار ادا ڪندو رهندو. ڏکڻ ايشيا ۾ امن ۽ تعاون کانسواءِ ترقي ممڪن ناهي. هن ڀارت تي زور ڀريو ته هو سنڌ طاس معاهدي جون پنهنجون ذميداريون پوريون ڪري. سينيٽ سيڪريٽريٽ مان جاري بيان موجب سريلنڪا جي پاڪستان ۾ نئين هاءِ ڪمشنر ريئر ايڊمرل (ر) ايڇ ايل اي ڊان فريڊ سينويراتني، سينيٽ چيئرمين سيد يوسف رضا گيلاني سان ان جي رهائشگاهه تي ملاقات ڪئي. ان موقعي تي قومي اسيمبليءَ جو اسپيڪر سردار اياز صادق به موجود هو. سينيٽ چيئرمين هاءِ ڪمشنر کي پاڪستان ۾ سفارتي ذميداريون سنڀالڻ تي مبارڪون ڏنيون ۽ نيڪ خواهشن جو اظهار ڪيو. هن ان اعتماد جو اظهار ڪيو ته پاڪستان ۽ سريلنڪا وچ ۾ 70 سالن کان وڌيڪ عرصي تي ٻَڌل تاريخي، دوستاڻا لاڳاپا وڌيڪ مستحڪم ٿيندا ۽ مختلف شعبن ۾ عملي تعاون کي هٿي ملندي. سيد يوسف رضا گيلاني چيو ته پاڪستان سرلنڪا کي خطي جو هڪ اهم ۽ ڀروسي جوڳو حصيدار سمجهي ٿو. پاڪستان ۽ سريلنڪا جا ڀائراڻا لاڳاپا گڏيل اعتماد، احترام ۽ تعاون جو اعليٰ مثال آهن. سينيٽ چيئرمين خطي ۾ تعاون کي هٿي ڏيڻ تي زور ڀريندي چيو ته ڏکڻ ايشيائي ملڪن جي تنظيم سارڪ کي ٻيهر فعال ڪرڻ اڻٽر آهي ته جيئن گڏيل خوشحالي، امن ۽ علائقائي رابطن جا هدف حاصل ڪري سگهجن. هن چيو ته خطي جي معاشي ۽ سماجي ترقيءَ لاءِ سارڪ کي پنهنجي حقيقي صلاحيتن موجب ڪردار ادا ڪرڻو پوندو. سينيٽ چيئرمين پنهنجي ماضيءَ جي سريلنڪار جي سرڪاري دؤري جو حوالو ڏيندي چيو ته اعليٰ سطحي قيادت جي مٽاسٽا ٻنهي ملڪن جي لاڳاپن کي وڌيڪ هٿي ڏين ٿا ۽ هي سلسلو مستقبل ۾ به جاري رهڻ گهرجي. دفاعي تعاون تي ڳالهائيندي سينيٽ چيئرمين چيو ته پاڪستان ۽ سريلنڪا وچ ۾ فوجي لاڳاپا نهايت اهميت رکندڙ آهن. هن تربيتي پروگرامز، اعليٰ سطحي دؤرن ۽ عسڪري اوزارن جي فراهميءَ جي حوالي سان جاري تعاون تي اطمينان جو اظهار ڪيو ۽ ان ۾ واڌ جي ضرورت تي زور ڀريو. ملاقات ۾ تعليمي، ثقافتي لاڳاپن کي به نمايان حيثيت ڏني وئي. سينيٽ چيئرمين ان عزم کي ورجايو ته پاڪستان نه صرف ثقافتي رابطن کي هٿي ڏيندو پر گڏيل ٻڌمت ورثي جي ماڳن کي محفوظ بڻائڻ لاءِ پنهنجو ڪردار ادا ڪندو رهندو، ان سان گڏوگڏ پاڪستاني حڪومت سريلنڪن شاگردن کي وظيفا ۽ تربيتي موقعا فراهم ڪندو رهندو. سينيٽ چيئرمين سريلنڪا طرفان ڪورونا وبا کانپوءِ معيشت کي مستحڪم ڪرڻ جي ڪوششن کي ساراهيو ۽ چيو ته مشڪل حالتن باوجود سريلنڪا بحاليءَ لاءِ مؤثر قدم کنيا آهن جيڪي ان جي استحڪام ۽ ترقيءَ جا ضامن آهن. علائقائي معاملن تي ڳالهائيندي هن پاڪستان جي ان مؤقف کي ورجايو ته ڏکڻ ايشيا ۾ امن ۽ـ تعاون کانسواءِ ترقي ممڪن ناهي. هن چيو ته پُراڻن تڪرارن خاص ڪري ڄمون ڪشمير مسئلي کي انصاف ۽ عالمي واعدن مطابق حل ڪرڻو پوندو. جنگ امن نٿي آڻي، اصل امن انصاف ۽ مساوات سان قائم ٿئي ٿو. هن ڀارت تي زور ڀريو ته هو سنڌ طاس معاهدي جون پنهنجون ذميداريون پوريون ڪري. سينيٽ چيئرمين وزيراعظم طور پنهنجي حڪومتي دؤر کي ياد ڪندي چيو ته پاڪستان هميشه پاڙيسري ملڪن سان پُرامن ڳالهين ۽ تعميري رابطن جو خواهشمند رهيو آهي. هن بين الپارلياماني رابطن کي وڌيڪ مضبوط بنائڻ تي زور ڀريو ۽ سريلنڪن قيادت کي نومبر 2025ع ۾ پاڪستان ۾ رٿيل اسپيڪرز ڪانفرنس ۾ شرڪت جي دعوت ڏني. هاءِ ڪمشنر گرمجوشيءَ سان آجيان ڪندي ٿورو مڃيو ۽ چيو ته سريلنڪا پاڪستان کي هڪ اهم علائقائي ساٿي سمجهي ٿو ۽ مختلف شعبن ۾ گڏيل لاڳاپن کي هٿي ڏيڻ چاهي ٿو. هن پاڪستان جي تعميري ڪردار کي ساراهيندي چيو ته پاڪستان ۾ موجود ٻڌمت ورثي سبب مذهبي سياحت کي هٿي ڏيڻ جي وسيع گنجائش موجود آهي جيڪو ٻنهي ملڪن جي عوام کي وڌيڪ ويجهو آڻي سگهي ٿو. ملاقات جي پڄاڻيءَ تي سينيٽ چيئرمين، هاءِ ڪمشنر لاءِ نيڪ خواهشن جو اظهار ڪيو.
