ڪراچي-29 آگسٽ (اي پي پي) سنڌ جي وڏي وزير سيد مراد علي شاهه پي ڊي ايم اي ۽ ضلعي انتظاميا کي هدايت ڪئي آهي ته دريائي بندن تي 500 کان وڌيڪ ڪيمپ قائم ڪرڻ جي تياري ڪئي وڃي ته جيئن متاثر ٿيندڙ آبادي ۽ چوپايو مال محفوظ ٿي سگهن۔ هن هدايت ڪئي ته جيڪڏهن وڏو وهڪرو اچي ته ان ۾ انساني يا ڪنهن به قسم جي جاندار جي جان ضايع نه ٿيڻ گهرجي. اهڙيون هدايتون هن وزيراعليٰ هائوس ۾ هڪ اعليٰ سطحي هنگامي اجلاس جي صدارت دوران جاري ڪيون. اجلاس ۾ صوبي ۾ امڪاني برساتن ۽ 3 ۽ 4 سيپٽمبر تي گڊو بئراج وٽ ايندڙ امڪاني وڏي وهڪري بابت تيارين جو جائزو ورتو ويو ۽ آبپاشي واري وزير ڄام خان شورو، ايڪسائيز واري وزير مڪيش ڪمار چائولا، زراعت واري وزير محمد بخش مهر ۽ صنعت واري وزير ڄام اڪرام ڌاريجو کي درياءِ سنڌ جي ساڄي ۽ کاٻي ڪناري تي ٻوڏ واري صورتحال ۽ عوامي ڀلائيءَ جي نگراني جي ذميواري سونپي وئي۔آبپاشي ۽ پي ڊي ايم اي جي عملدارن وڏي وزير کي بريفنگ ڏيندي ٻڌايو ته اربع ۽ خميس جي وچ واري رات تائين گڊو بئراج وٽ پاڻيءَ جو وهڪرو 7 لکن کان 8 لک ڪيوسڪ تائين پهچڻ جو امڪان آهي۔ وڏي وزير انتظاميه کي هاءِ الرٽ رهڻ ۽ مڪمل ريسڪيو ۽ ريليف انتظام ڪرڻ جي هدايت ڪئي۔ پي ڊي ايم اي موجب اتر وارن ضلعن ۾ 72 ۽ ڏکڻ ضلعن ۾ 106 ريسڪيو ٻيڙيون مقرر ڪيون ويون آهن جڏهن ته ممڪن طور 52 هزار کان وڌيڪ خاندان متاثر ٿي سگهن ٿا۔ وڏي وزير اترين ضلعن ۾ 30 هزار کان وڌيڪ ريسڪيو 1122 عملي جي مقرري ۽ ڪمزور ضلعن ۾ ٻيڙين جي ورڇ جي هدايت ڪئي. سکر ۾ 6، گھوٽڪي، خيرپور، شڪارپور، نوشهروفيروز ۽ دادو ۾ 4-4، ۽ شهيد بينظيرآباد ۾ 3 ٻيڙيون۔ ساڳي وقت سکر کان دادو تائين ٻيڙين سميت ريسڪيو ٽيمون مقرر ڪرڻ جو حڪم ڏنو ويو۔اجلاس کي ٻڌايو ويو ته پاڪستان نيوي 26 ٻيڙيون رليف آپريشن لاءِ اسٽينڊ باءِ تي رکي آهي۔ پي ڊي ايم اي جي اسٽاڪ پوزيشن بابت ٻڌايو ويو ته مڇرداڻيون، ڪمبل، فرسٽ ايڊ ڪٽون، ڪچن سيٽ، گدا، پلاسٽڪ شيٽ، موبائل ٽائليٽس، سِوڙيون، جيري ڪين، سليپنگ ميٽ، ٽينٽ، ڊي واٽرنگ پمپ ۽ جنريٽر ڪافي مقدار ۾ موجود آهن۔ صورتحال کي نظر ۾ رکندي وڏي وزير گڊو بئراج ۽ سکر بئراج جو دورو ڪرڻ ۽ درياجي سڀني ڪمزور بندن جو فضائي جائزو وٺڻ جو فيصلو ڪيو۔ اجلاس کي آگاهي ڏني وئي ته جيڪڏهن وڏي ٻوڏ آئي ته 50 هزار کان وڌيڪ خاندان بي گهر ٿي سگهن ٿا۔ مراد علي شاهه مڪمل تيارين کي يقيني بڻائڻ ۽ ضرورت پوڻ تي نجي شعبي مان به ڳري مشينري حاصل ڪرڻ جي هدايت ڪئي۔اجلاس ۾ صوبائي وزير شرجيل انعام ميمڻ، مخدوم محبوب زمان، چيف سيڪريٽري آصف حيدر شاهه، وڏي وزير جو پرنسپل سيڪريٽري آغا واصف، وڏي وزير جو سيڪريٽري رحيم شيخ، سيڪريٽري ريهبيليٽيشن اختر بگٽي ۽ ڊي جي پي ڊي ايم اي سلمان شاهه شرڪت ڪئي۔ ڊويزنل ڪمشنرن ۽ ڊي آءِ جيز اجلاس ۾ وڊيو لنڪ وسيلي شرڪت ڪئي.
