ڪراچي-29 آگسٽ (اي پي پي) سنڌ ۾ امڪاني برساتن ۽ ٻوڏ جي صورتحال کي نظر ۾ رکندي زراعت واري وزير سردار محمد بخش مھر جي هدايت تي زراعت کاتي جي سمورن آفيسرن ۽ عملي جون موڪلون رد ڪيون ويون آهن، جڏهن ته حيدرآباد ۾ ڊي جي زراعت ايڪسٽينشن جي آفيس ۾ “رين ايمرجنسي سيل” قائم ڪيو ويو آهي، جتي هاري هنگامي حالتن ۾ سڌو سنئون رابطو ڪري سگهندا. صوبائي وزير جي ترجمان موجب، سنڌ جي سڀني ضلعن ۽ تعلقي سطح تي ايمرجنسي سينٽر قائم ڪيا ويا آهن، جڏهن ته 30 ضلعن ۾ ڊائريڪٽرن ۽ ڊپٽي ڊائريڪٽرن کي فوڪل پرسن مقرر ڪيو ويو آهي ته جيئن ٻوڏ واري صورتحال ۾ فوري قدم کنيا وڃن. ترجمان مطابق هارين جي رهنمائي لاءِزرعي ايڪسٽينشن ونگ حيدرآباد ۾ 24 ڪلاڪ فعال رين ايمرجنسي ڪنٽرول روم قائم ڪيو ويو آهي، جنهن جي نگراني ڊائريڪٽر جنرل ايگريڪلچر ايڪسٽينشن منير جماڻي پاڻ ڪندو. وزير جي هدايت تي انجنيئرنگ ونگ کي مشينري ۽ بلڊوزر تيار رکڻ جا حڪم پڻ ڏنا ويا آهن، ته جيئن سموري سنڌ جي ضلعي انتظاميا کي ضرورت پوڻ تي فوري سهولت فراهم ڪئي وڃي.سردار محمد بخش مھر چيو آهي ته امڪاني ٻوڏ ۾ متاثر ٿيندڙ هارين کي فوري امداد، جيئن ٻج، ڀاڻ ۽ زرعي اوزار فراهم ڪيا ويندا. سڀني آفيسرن کي هارين سان سڌي ريت رابطو رکڻ، الرٽ رهڻ ۽ روزانو سيڪريٽري زراعت محمد زمان ناريجو کي رپورٽ ڏيڻ جي هدايت ڪئي وئي آهي.صوبائي وزير جو چوڻ ھو ته هارين جي سهولت لاءِ هيلپ لائين نمبر 0311-1164611پڻ جاري ڪيو ويو آهي.ان موقعي تي زراعت واري وزير وڌيڪ چيو ته وڏي وزير درياءَ جي کاٻي ۽ ساڄي ڪناري تي صوبائي وزيرن جون ڊيوٽيون پڻ لڳائي ڇڏيون آهن.سردار محمد بخش مھر جو چوڻ هو ته موسمياتي تبديليءَ سبب ملڪ ۾ ٻوڏ جي صورتحال وڌيڪ سنگين ٿي رهي آهي، تنهنڪري سڀئي لاڳاپيل ادارا هارين جي هر ممڪن مدد جاري رکندا.
