لاهور – 29 آگسٽ (اي پي پي) وزيراعظم محمد شهباز شريف کي ايران جي صدر ڊاڪٽر مسعود پيز شڪيان ٽيليفون ڪئي ۽ پاڪستان جي مختلف علائقن ۾ ٻوڏ سبب ٿيندڙ نقصانن تي پاڪستاني عوام سان دلي تعزيت جو اظهار ڪيو. وزيراعظم آفيس جي ميڊيا ونگ پاران جاري بيان موجب ايراني صدر تازي ٻوڏ ۾ جاني ۽ مالي نقصان تي متاثر خاندانن سان همدرديءَ ۽ يڪجهتي جو اظهار ڪندي هُن مشڪل وقت ۾ پاڪستان جي ڀائر عوام کي هر ممڪن مدد فراهم ڪرڻ جي آڇ ڪئي. وزيراعظم صدر مسعود پيز شڪيان پاران همدرديءَ ۽ يڪجهتي جي اظهار ۽ ايراني ڀينرن ڀائرن پاران ڏک ۽ تڪليف جي هن گهڙيءَ ۾ يڪجهتي جي اظهار تي ٿورا مڃيا. وزيراعظم ايراني صدر کي ايران جي سپريم ليڊر آيت الله علي خامنه اي جي لاءِ گهري احترام ۽ نيڪ خواهشن جو پيغام ڏنو. ٻنهي اڳواڻن چين جي شهر تيانجن ۾ ٿيندڙ شنگهائي تعاون تنظيم جي ايندڙ سربراهي اجلاس جي موقعي تي متوقع ملاقات ۽ ڳالهه ٻولهه جي حوالي سان مثبت خيالن جو پڻ اظهار ڪيو.
