لاهور – 29 آگسٽ (اي پي پي) وزيراعظم محمد شهباز شريف جي حڪمن تي موسمياتي تبديلي ۽ چوماسي جي اثرن کي وقت سر منهن ڏيڻ جي لاءِ موثر پاليسي تيار ڪئي ويندي، هنگامي صورتحال مان نڪرندي ئي وزيراعظم اعليٰ سطحي اجلاس گهرائڻ جو فيصلو ڪيو آهي جنهن ۾ چئني صوبن جا وڏا وزير ۽ ٻين لاڳاپيل ادارن جا سربراهه به شريڪ ٿيندا. وزيراعظم آفيس جي ميڊيا ونگ پاران جاري بيان موجب ان پاليسي جو ورڪنگ پيپر سمورين صوبائي حڪومتن سان شيئر ڪيو ويندو ته جيئن ان جي بنياد تي هڪ گڏيل حڪمت عملي ٺاهي وڃي. هنگامي صورتحال مان نڪرندي ئي وزيراعظم هڪ اعليٰ سطحي اجلاس گهرائڻ جو فيصلو ڪيو آهي جنهن ۾ چئني صوبن جا وڏا وزير ۽ ٻين لاڳاپيل ادارن جا سربراهه به شريڪ ٿيندا. آزاد ڪشمير جي وزيراعظم ۽ گلگت بلتستان جي وڏي وزير کي به اجلاس ۾ گهرايو ويندو. وزيراعظم چيو ته چئني صوبن سميت آزاد ڪشمير ۽ گلگت بلتستان ۾ پاڻي ذخيرن جي تعمير ۽ پاڻي جي بهتر انتظام جي لاءِ حڪمت عملي ٺاهي پئي وڃي. پاڻي ذخيرا مشاورت ۽ سمورن صوبن جي مڪمل هم آهنگي سان ٺاهيا ويندا. وزيراعظم چيو ته موسمياتي تبديلي هڪ حقيقت آهي، ان جي موثر تياري سان ئي قدرتي آفتن جي نقصانن کان بچي سگهجي ٿو. چئني صوبن، آزاد ڪشمير، گلگت بلتستان ۽ وفاق کي گڏجي موسمياتي تبديلي جي موثر اثرن کان ماڻهن کي بچائڻو آهي. اهو هڪ قومي مسئلو آهي، جنهن تي سڀني کي گڏجي ڪم ڪرڻو آهي.
