اسلام آباد – 27 آگسٽ (اي پي پي) صدر آصف علي زرداري پنجاب، خيبرپختونخواهه، گلگت بلتستان ۽ آزاد ڄمون ۽ ڪشمير ۾ ٻوڏ ۽ برساتن سبب ٿيندڙ تباهي تي گهري ڏک ۽ افسوس جو اظهار ڪندي چيو آهي ته پورو يقين آهي ته پاڪستاني قوم حوصلي ۽ عزم سان مشڪلاتن جو مقابلو ڪندي. ايوان صدر جي پريس ونگ پاران جاري بيان ۾ صدر آصف علي زرداري ٻوڏ ۾ فوت ٿيندڙن جي گهرڀاتين سان دلي تعزيت، همدرديءَ ۽ متاثرين سان مڪمل يڪجهتي جو اظهار ڪيو. صدر آصف علي زرداري چيو ته ٻوڏ ۽ ريلن ۾ جاني ۽ مالي نقصان کڻندڙ خاندانن سان گڏ آهيون. صدر آبادگارن جي فصلن ۽ چوپائي مال جي وڏي پئماني تي نقصان تي گهري همدرديءَ جو اظهار ڪيو. صدر هٿياربند فوج ۽ ريسڪيو ادارن جي بهادري ۽ خدمتن کي خراج تحسين پيش ڪيو ۽ چيو ته آزمائش جي گهڙيءَ ۾ پاڪ فوج عوام جي خدمت جو شاندار مثال قائم ڪيو آهي. صدر سنڌ حڪومت کي ايندڙ ٻوڏ ريلي کان بچڻ جي لاءِ فوري تياري ڪرڻ جي هدايت ڪئي آهي. صدر چيو ته پورو يقين آهي ته پاڪستاني قوم حوصلي ۽ عزم سان مشڪلاتن جو مقابلو ڪندي. صدر آصف علي زرداري چيو ته 2010ع ۽ 2022ع جي ٻوڏن وانگر هن ڀيري به قوم سرخرو ٿيندي.
