اسلام آباد – 28 مئي (اي پي پي) نائب وزيراعظم/ پرڏيهي وزير سينيٽر محمد اسحاق ڊار ثالثي بابت عالمي تنظيم قائم ٿيڻ جي ڪنوينشن تي صحيحن واري تقريب ۾ شرڪت جي لاءِ 29 کان 30 مئي تائين چين جي خصوصي انتظامي علائقي هانگ ڪانگ جو دورو ڪندو. پرڏيهي آفيس جي ترجمان پاران جاري پڌرائي موجب نائب وزيراعظم/ پرڏيهي وزير محمد اسحاق ڊار ثالثي بابت عالمي تنظيم ڪنوينشن تي صحيحون ڪندو ۽ 30 مئي 2025ع تي تقريب کي خطاب پڻ ڪندو. وڌيڪ اهو ته اجلاس جي موقعي تي نائب وزيراعظم/ پرڏيهي وزير ڪيترين ئي ٻطرفي مصروفيتن تي پڻ خيالن جي ڏي وٺ ڪندو. پرڏيهي آفيس چيو آهي ته پاڪستان ان ڳالهه تي يقين رکي ٿو ته گڏيل قومن جي چارٽر جي اصولن تي سختي سان عمل پيرا ٿيڻ، گڏيل قومن جي سلامتي ڪائونسل جي قراردادن سان گڏوگڏ عالمي قانون تي ايمانداري سان عملدرآمد جي ذريعي امن ۽ سلامتي سان گڏوگڏ عالمي خوشحالي جو فروغ وڌيڪ محفوظ ڪري سگهجي ٿو. ثالثي، سفارتڪاري، مڪالمو ۽ عالمي تعاون ان جامع موقف جا اهم سنگ بنياد آهن. پاڪستان ثالثي بابت عالمي تنظيم جي باني ميمبر جي طور تي ڪنوينشن ۾ شموليت اختيار ڪئي آهي. پاڪستان ثالثي سان گڏوگڏ عالمي تڪرارن جي پرامن حل ۽ بحرالڪاهل جي صلاحيت کي تسليم ڪندي ثالثي بابت عالمي تنظيم جي مقصدن جي ڀرپور حمايت پڻ ڪري ٿو.
