ماسڪو-28 ڊسمبر (اي پي پي)روس ۽ ايران آمريڪي ڊالر بدران مقامي ڪرنسين ۾ واپار ڪرڻ جو فيصلو ڪيو آهي، هي فيصلو ٻنهي ملڪن جي مرڪزي بئنڪن جي گورنرن جي اجلاس ۾ ڪيو ويو. جرمن نشرياتي اداري روس جي خابرو اداري جي حوالي سان ٻڌايو ته ايران ۽ روس جي مرڪزي بئنڪن جي گورنرن جو اجلاس ماسڪو ۾ ٿيو جنهن ۾ ٻنهي ملڪن گڏيل واپار کي آمريڪي ڊالر بدران مقامي ڪرنسين ۾ ڪرڻ جي معاهدي کي حتمي شڪل ڏئي ڇڏي آهي. ان معاهدي کانپوءِ هاڻي بئنڪ ۽ گروپ مقامي ڪرنسين ۾ ڏي وٺ ڪري سگهندا ۽ اهڙو بئنڪاري نظام استعمال ڪري سگهندا جن ۾ سوئفٽ سسٽم گهربل نه هوندو، بيان ۾ وڌيڪ چيو ويو ته روس جي قيادت ۾ يوريشين اڪنامڪ يونين (يو اي اي يو) جي ميمبرن 25 ڊسمبر تي ايران سان هڪ مڪمل آزاد واپاري معاهدي تي صحيحون ڪيون آهن. روس کانسواءِ بيلاروس، قزاخستان، ڪرغزستان ۽ ارمينيا ان يونين جا ميمبر آهن.
