غزه-26 ڊسمبر (اي پي پي) اسرائيلي فوج چيو آهي ته ڪيترن ئي اسرائيلي ويڙهاڪن گذريل 24 ڪلاڪن دوران ڏکڻ غزه ۾ 100 کان وڌيڪ هدفن تي حملا ڪيا آهن. الجزيره مطابق اسرائيلي فوج پنهنجي ويب سائٽ تي جاري بيان ۾ وڌيڪ چيو ته انهن هدفن ۾ زمين اندر سرنگهن ۽ فوجي ٺڪاڻن تي حملا شامل آهن. ٻئي پاسي انجمن هلال احمر فلسطين چيو آهي ته اسرائيل غزه جي ڏکڻ شهر خان يونس ۾ تنظيم جي هيڊ ڪوارٽر کي نشانو بڻايو آهي. هلال احمر طرفان ايڪس تي جاري بيان ۾ چيو ويو آهي ته خان يونس ۾ تنظيم جي هيڊ ڪوارٽر جي مٿاهين منزلن تي اسرائيلي توپ خاني جي بمباري ۾ ڪيترائي ماڻهو زخمي ٿيا آهن. بيان ۾ وڌيڪ چيو ويو آهي ته اسرائيلي فوجي ڪاررواين جي نتيجي ۾ بي گهر ٿيل فلسطيني ماڻهن هلال احمر جي هيڊ ڪوارٽر ۾ پناهه ورتل آهي.
