ڄامشورو - 27 آڪٽوبر(اي پي پي) لياقت يونيورسٽي آف ميڊيڪل اينڊ هيلٿ سائنسز (لمس) ڄامشورو ۾ ڪشميري عوام سان يڪجهتي جي اظهار لاءِ ڪارو ڏينهن ملهايو ويو. ان موقعي تي هڪ ريلي ڪڍي وئي، جنهن ۾ ڪشميري عوام جي حق ۾ آواز اٿاريو ويو ۽ کين انصاف، آزادي ۽ پنهنجي مستقبل جو فيصلو پاڻ ڪرڻ جو حق ڏيڻ جو مطالبو ڪيو ويو. ريلي يونيورسٽي جي مين ڪيمپس کان شروع ٿي ۽ وائيس چانسلر سيڪريٽريٽ …
لمس ڄامشورو ۾ ڪشميري عوام سان يڪجهتي جي اظهار لاءِ ڪارو ڏينهن ملهايو ويو
ڄامشورو – 27 آڪٽوبر(اي پي پي) لياقت يونيورسٽي آف ميڊيڪل اينڊ هيلٿ سائنسز (لمس) ڄامشورو ۾ ڪشميري عوام سان يڪجهتي جي اظهار لاءِ ڪارو ڏينهن ملهايو ويو. ان موقعي تي هڪ ريلي ڪڍي وئي، جنهن ۾ ڪشميري عوام جي حق ۾ آواز اٿاريو ويو ۽ کين انصاف، آزادي ۽ پنهنجي مستقبل جو فيصلو پاڻ ڪرڻ جو حق ڏيڻ جو مطالبو ڪيو ويو. ريلي يونيورسٽي جي مين ڪيمپس کان شروع ٿي ۽ وائيس چانسلر سيڪريٽريٽ پهچي ختم ٿي.ريلي ۾ پروفيسرن، استادن، ملازمن ۽ شاگردن وڏي انگ ۾ شرڪت ڪئي. شرڪت ڪندڙن جي هٿن ۾ بينر ۽ پلي ڪارڊ هئا ۽ هو ڪشميري عوام جي حق ۾ نعرا هڻي رهيا هئا. ان موقعي تي شرڪت ڪندڙن "ڪشمير جو درد اسان جو درد آهي” جو پيغام ڏيندي ڪشميري عوام سان ڀرپور يڪجهتي جو اظهار ڪيو. ريلي کانپوءِ ڪشمير جي ڪاري ڏينهن جي حوالي سان هڪ سيمينار پڻ منعقد ڪيو ويو، جنهن ۾ شاگردن تقريرون ڪيون ۽ ڪشميري عوام جي جدوجهد، سندن حقن ۽ ڪشمير جي مسئلي بابت ڳالهايو. ان موقعي تي شاگردن کي ڪشمير بابت هڪ دستاويزي فلم پڻ ڏيکاري وئي، جنهن ذريعي کين ڪشمير جي صورتحال ۽ ڪشميري عوام جي جدوجهد بابت ڄاڻ ڏني وئي.ان موقعي تي لمس ڄامشورو جي وائيس چانسلر پروفيسر ڊاڪٽر اڪرام دين اڄڻ پنهنجي بيان ۾ چيو ته ڪشميري عوام جي تڪليفن ۽ سندن بنيادي حقن لاءِ جاري جدوجهد کي نظرانداز نٿو ڪري سگهجي. هن چيو ته "ڪشمير جو درد اسان جو درد آهي. ڪشميري عوام کي امن، عزت، انصاف ۽ پنهنجي مستقبل جو فيصلو پاڻ ڪرڻ جو حق حاصل آهي. اسان ڪشميري عوام سان گڏ بيٺل آهيون ۽ گڏيل قومن جي قراردادن موجب ڪشمير جي مسئلي جي پرامن ۽ انصاف تي ٻڌل حل جي حمايت ڪريون ٿا.”پروفيسر ڊاڪٽر اڪرام دين اڄڻ وڌيڪ چيو ته تعليمي ادارن جي ذميواري آهي ته اهي انساني حقن، امن ۽ انصاف بابت آگاهي پيدا ڪن. هن چيو ته لمس يونيورسٽي جا استاد، ملازم ۽ شاگرد ڪشميري عوام سان يڪجهتي ظاهر ڪرڻ لاءِ متحد آهن.ريلي ۾ پروفيسر ڊاڪٽر ثمرين ميمڻ، پروفيسر ڊاڪٽر منظور علي لاکير، ڊاڪٽر سلمان شمس، ڊاڪٽر سنتوش ڪمار، ڊاڪٽر فرحانه راڄپر، پروفيسر ڊاڪٽر احسن لغاري ۽ پروفيسر عمران شيخ سميت يونيورسٽي جي استادن، ملازمن ۽ شاگردن شرڪت ڪئي. تقريب جي پڄاڻي تي ڪشميري عوام سان يڪجهتي، امن ۽ سندن بنيادي حقن جي حمايت جو پيغام ڏنو ويو.
