ڀارت 27 آڪٽوبر 1947ع تي غيرقانوني قدمن سان ڄمون ۽ ڪشمير تي قبضو ڪيو: نائب وزيراعظم ۽ پرڏيهي وزير سينيٽر اسحاق ڊار

اسلام آباد- 27 آڪٽوبر (اي پي پي) نائب وزيراعظم ۽ پرڏيهي وزير سينيٽر اسحاق ڊار چيو آهي ته ڀارت 27 آڪٽوبر 1947ع تي غيرقانوني قدمن سان ڄمون ۽ ڪشمير تي قبضو ڪيو. 27 آڪٽوبر جو ڀارتي قدم عالمي قانونن ۽ عالمي اصولن جي خلاف هو، ان ڏينهن تي ڪارو ڏينهن ملهائڻ جو مقصد دنيا کي ڪشمير جي مسئلي ۽ ڪشميري عوام جي خودمختياري جي حق جي ياد ڏيارڻ آهي، پاڪستان ڪشميري عوام جي خودمختياري جي حق جي سياسي، سفارتي ۽ اخلاقي حمايت جاري رکندو. گڏيل قومن جي سلامتي ڪائونسل جون قراردادون ڪشمير مسئلي جي حل لاءِ هڪ اهم بنياد آهن، ڪشميرين کي انهن قراردادن جي روشني ۾ انهن جي خواهشن مُوجب خودمختياري جو حق ڏنو وڃي. اڱاري 27 آڪٽوبر تي اسلام آباد جي ڊي-چوڪ ۾ ڪشمير جي ڪاري ڏينهن جي مرڪزي تقريب کي خاص مهمان جي حيثيت ۾ خطاب ڪندي نائب وزيراعظم ۽ پرڏيهي وزير اسحاق ڊار چيو ته ڪشميري "ڪشمير بڻجندو پاڪستان” جي نعري جي تڪميل ۽ آزادي ضرور حاصل ڪندا. هي هر پاڪستاني جي دل جو آواز آهي، ڪشمير جي مسئلي کي عالمي سطح تي ٻيهر اجاگر ڪرڻ پاڪستان جي سفارتي ذميواري آهي. نائب وزيراعظم چيو ته وزيراعظم شهباز شريف ۽ پرڏيهي وزارت ڪشمير مسئلي کي عالمي فورمن تي مسلسل اٿاري رهيا آهن، او آءِ سي ڪشمير رابطا گروپ جي اجلاسن جو سلسلو ٻيهر فعال ڪيو ويو آهي. اسحاق ڊار چيو ته گڏيل قومن جي جنرل اسيمبلي جي اجلاس جي موقعي تي او آءِ سي رابطا گروپ جو اجلاس نيويارڪ ۾ منعقد ڪيو ويو. اجلاس ۾ سعودي عرب، ترڪيه، عمان ۽ ٻين اسلامي ملڪن جي پرڏيهي وزيرن جي شرڪت عالمي ڌيان جي عڪاس آهي. اسحاق ڊار چيو ته دنيا ڪشمير مسئلي کي ناهي وساريو، پاڪستان ان کي عالمي سطح تي اجاگر ڪندو رهندو. هن چيو ته 5 آگسٽ 2019ع تي ڀارت والاريل ڄمون ۽ ڪشمير جي آئيني حيثيت کي تبديل ڪيو. اسحاق ڊار چيو ته 5 آگسٽ 2019ع جو ڀارتي قدم ڪشميري عوام جي حقن جي خلاف هو، گڏيل قومن جي سلامتي ڪائونسل جون قراردادون ڪشمير مسئلي جي حل لاءِ اهم بنياد آهن. اسحاق ڊار چيو ته ڪشميري عوام کي خودمختياري جي حق کان محروم نٿو ڪري سگهجي، ڀارت والاريل ڪشمير ۾ آبادي جي تناسب تبديل ڪرڻ جي ڪوشش ڪري رهيو آهي، والاريل ڪشمير ۾ غير مقامي ماڻهن کي آباد ڪرڻ ۽ ملڪيتون خريد ڪرڻ جي اجازت ڏيڻ تي پاڪستان کي خدشا آهن، ڪشميري قيادت کي جيلن ۾ قيد ڪرڻ ۽ مذهبي آزادين تي پابنديون لڳائڻ ڳڻتي جو سبب آهن، والاريل ڪشمير ۾ جمعي جي نماز ادا ڪرڻ تي به پابنديون هنيُون وينديُون آهن. هن چيو ته والاريل ڪشمير ۾ انساني حقن ۽ عالمي قانونن جي ڀڃڪڙين تي پاڪستان آواز بلند ڪندو رهندو، پرڏيهي نمائندن ۽ مبصرين کي والاريل ڪشمير تائين پهچ نه ڏيڻ صورتحال تي سوال اٿاري ٿو. نائب وزيراعظم چيو ته وزيراعظم شهباز شريف هر عالمي فورم تي ڪشمير جي مسئلي کي اجاگر ڪري رهيو آهي، گڏيل قومن، او آءِ سي ۽ شنگھائي تعاون تنظيم سميت سڀني لاڳاپيل فورمن تي ڪشمير جي مسئلي کي اٿاريو پيو وڃي. تاجڪستان ۾ شنگھائي تعاون تنظيم جي اجلاس دوران پُڻ ڪشمير جي مسئلي تي پاڪستان جو موقف پيش ڪيو ويو. اسحاق ڊار چيو ته پرڏيهي وزارت مسلسل گڏيل قومن جي سيڪريٽري جنرل، جنرل اسيمبلي جي صدر ۽ عالمي ادارن جو ڌيان ڪشمير جي مسئلي ڏانهن ڇڪائيندي رهي آهي. پاڪستان ڪشميري عوام جي سياسي، سفارتي ۽ عالمي سطح تي حمايت جاري رکندو. ڪشميري عوام کي پنهنجي مستقبل جو فيصلو ڪرڻ جو حق ملڻ گهرجي. اسحاق ڊار چيو ته ڪشميري عوام جون دعائون ۽ جدوجهدون ضرور هڪ ڏينهن رنگ لائينديون. قائداعظم محمد علي جناح ڪشمير کي پاڪستان جي شهه رگ قرار ڏنو هو. اسحاق ڊار چيو ته پاڪستان جي 25 ڪروڙ عوام پنهنجي ڪشميري ڀائرن ۽ ڀينرن سان گڏ بيٺل آهي. پاڪستان ڪشمير جي مسئلي جي حل تائين ڪشميري عوام جي حمايت جاري رکندو. اسحاق ڊار چيو ته الله تعاليٰ ڪشميري عوام کي آزادي ۽ خودمختياري جو حق عطا فرمائي.