چين ۾ پاڪستان جي سفير پاران پاڪستان امبيسي ڪاليج جي شاگرد ڪائونسل جي حلف برداري تقريب ۾ خاص مهمان طور شرڪت

بيجنگ- 15 آڪٽوبر(اي پي پي) چين ۾ پاڪستان جي سفير سيد علي اسد گيلاني بيجنگ ۾ پاڪستان امبيسي ڪاليج جي تعليمي سيشن سال 27-2026ع لاءِ شاگرد ڪائونسل جي حلف برداري تقريب ۾ خاص مهمان طور شرڪت ڪئي. تقريب ۾ ڪيمبرج انٽرنيشنل ايجوڪيشن (سي آءِ اي) جي امتحانن ۾ نمايان تعليمي ڪاميابيون حاصل ڪندڙ شاگردن کي ساراهيو ويو. خميس تي جاري بيان مطابق پاڪستان جي سفير شاگردن ۽ سندن استادن جي محنت کي ساراهيندي چيو ته اهي ڪاميابيون نه رڳو شاگردن جي اعليٰ معيار جي تعليم حاصل ڪرڻ جي عزم کي ظاهر ڪن ٿيون پر سندن استادن جي محنت ۽ پاڪستان امبيسي ڪاليج جي معياري تعليم جي اعليٰ معيار کي برقرار رکڻ جي ڪوششن جو ثبوت به آهن. تقريب ۾ نئين چونڊيل شاگرد اڳواڻن کي اعزازي پٽيون به پارايون ويون، جن ۾ مختلف ڪلبن جا صدر ۽ نائب صدر، راندين جا ڪپتان، هيڊ بواءِ ۽ هيڊ گرل شامل هيون. بعد ۾ تازو چونڊيل شاگرد ڪائونسل جي ميمبرن پنهنجن عهدن جو حلف کنيو ۽ ديانتداري ۽ محنت سان پنهنجون ذميواريون ادا ڪرڻ جي عزم جو اظهار ڪيو. سفير سيد علي اسد گيلاني پاڪستان ۽ چين جي لاڳاپن کي هٿي ڏيڻ ۾ ڪاليج جي ڪردار کي اجاگر ڪندي چيو ته اهو ادارو تعليمي معيار ۾ بهتري، ثقافتي مٽا سٽا ۽ چيني ۽ عالمي برادرين ۾ پاڪستان جي ورثي ۽ روايتن بابت بهتر تفهيم پيدا ڪرڻ ۾ اهم ڪردار ادا ڪري رهيو آهي. هن نمايان تعليمي ڪاميابيون حاصل ڪندڙ شاگردن کي اعزازي شيلڊز به پيش ڪيون. تازو چونڊيل شاگرد ڪائونسل کي مبارڪون ڏيندي سمورن شاگردن جي روشن مستقبل ۽ مسلسل ڪاميابين لاءِ نيڪ خواهشن جو اظهار پڻ ڪيو.