حڪومت ڪراچي جي صنعتي علائقن ۾ انفراسٽرڪچر جي بحالي ۽ بهتري لاءِ 9.282 ارب رپيا منظور ڪيا آهن: مراد علي شاهه

ڪراچي- 30 سيپٽمبر (اي پي پي) سنڌ جي وڏي وزير سيد مراد علي شاهه چيو آهي ته سنڌ حڪومت ڪراچي جي صنعتي علائقن ۾ انفراسٽرڪچر جي بحالي ۽ بهتري لاءِ 9.282 ارب رپيا منظور ڪيا آهن، جڏهن ته صنعت، روانگي واپار، سيڙپڪاري ۽ روزگار کي هٿي وٺرائڻ لاءِ حڪومت ۽ نجي شعبي وچ ۾ سهڪار وڌيڪ مضبوط بڻائڻو پوندو. هن اربع ڏينهن ڪورنگي ايسوسيئيشن آف ٽريڊ اينڊ انڊسٽري (ڪاٽي) جي سالياني سانجهاندي 2026ع کي خطاب ڪندي چيو ته ڪراچي پاڪستان جو اقتصادي انجڻ آهي، جتي صنعت، بندرگاهن، واپار، روانگي واپار ۽ سيڙپڪاري جا اهم موقعا موجود آهن. هن چيو ته ڪراچي جي صنعتي سرگرمين سان لکين ماڻهن جو روزگار وابسته آهي، تنهنڪري مضبوط صنعتي شعبو مضبوط معيشت لاءِ بنيادي اهميت رکي ٿو.وڏي وزير چيو ته ڪورنگي صنعتي علائقي ۾ رستن، نيڪال جي نظام ۽ ٻين بنيادي سهولتن جي بهتري لاءِ ترقياتي اسڪيمون جاري آهن. صنعتي ترقي لاءِ رستن، پاڻي، نيڪال، بجلي، گئس، ٽرانسپورٽ، امن امان ۽ پاليسي جي تسلسل سميت سازگار ماحول فراهم ڪرڻ حڪومت جي ذميواري آهي.هن چيو ته صوبائي حڪومت جي اختيارن سان لاڳاپيل صنعتڪارن جا مسئلا ترجيحي بنيادن تي حل ڪيا ويندا. حڪومت اعلانن بدران عملي نتيجن تي يقين رکي ٿي ۽ ڪاروباري برادري سان مشاورت جو عمل جاري رکيو ويندو.سيد مراد علي شاهه صنعتڪارن تي زور ڏنو ته اهي ٽيڪنالاجي، جدت ۽ ڊجيٽل تبديلي کي اختيار ڪن ۽ خام مال جي روانگي واپار بدران ويليو ايڊيڊ شين جي تياري، بهتر برانڊنگ ۽ عالمي معيارن تي ڌيان ڏين. هن چيو ته صنعت ۽ تعليمي ادارن وچ ۾ رابطا وڌائڻ سان نوجوانن کي مارڪيٽ جي ضرورتن مطابق مهارتون فراهم ڪري سگهجن ٿيون، جڏهن ته انٽرنشپ ۽ اپرنٽس شپ جا موقعا پڻ وڌائڻ گهرجن.هن چيو ته صنعتي ترقي سان گڏ ماحولياتي تحفظ کي به يقيني بڻائڻ ضروري آهي، جڏهن ته امن امان ۽ قانون جي حڪمراني ڪاروباري سرگرمين لاءِ بنيادي شرط آهن.وڏي وزير مرحوم ڪاروباري اڳواڻ ايس ايم منير کي ڀيٽا پيش ڪندي چيو ته هن صنعتڪارن جا مسئلا هر فورم تي اجاگر ڪرڻ ۽ حڪومت ۽ نجي شعبي وچ ۾ رابطن کي مضبوط بڻائڻ ۾ اهم ڪردار ادا ڪيو. هن ايس ايم تنوير ۽ زبير ڇايا جي به ڪاروباري برادري جي خدمتن کي ساراهيو.هن ڪاٽي جي نئين چونڊيل صدر شيخ عمر ريحان، سينيئر نائب صدر سيد فرخ علي قنڌاري ۽ نائب صدر ناصر شيخ کي مبارڪباد ڏني، جڏهن ته عهدي تان رٽائر ٿيندڙ صدر محمد اڪرام راجپوت، سينيئر نائب صدر زاهد حميد ۽ نائب صدر سيد محمد طلحه علي جي خدمتن کي ساراهيو.ان موقعي تي ڪاٽي جي سرپرست اعليٰ ايس ايم تنوير چيو ته نجي شعبو سيڙپڪاري، روانگي واپار ۽ روزگار جي فراهمي ذريعي ملڪي معيشت جي ترقي ۾ پنهنجو ڪردار ادا ڪرڻ لاءِ پرعزم آهي. هن چيو ته پيداواري صلاحيت وڌائڻ ۽ جدت کي هٿي ڏيڻ لاءِ صنعت ۽ حڪومت کي گڏجي ڪم ڪرڻو پوندو.ڪاٽي جي صدر محمد اڪرام راجپوت چيو ته ڪاٽي حڪومت ۽ ڪاروباري برادري وچ ۾ پل جو ڪردار ادا ڪري رهي آهي ۽ صنعتي ترقي، سيڙپڪاري ۽ روزگار کي هٿي وٺرائڻ لاءِ سنڌ حڪومت سان سهڪار جاري رکندي.نائب سرپرست اعليٰ ڪاٽي زبير ڇايا چيو ته صنعتي انفراسٽرڪچر جي بهتري ۽ ڪاروباري مسئلن جي حل لاءِ حڪومت ۽ صنعت وچ ۾ مسلسل سهڪار ضروري آهي، جنهن سان سيڙپڪارن جو اعتماد وڌندو ۽ اقتصادي سرگرمين کي هٿي ملندي.تقريب ۾ ڪاٽي جي عهديدارن، صنعتڪارن، ڪاروباري اڳواڻن ۽ صنعتي برادري جي ٻين نمائندن شرڪت ڪئي.