وقتي صدر سيد يوسف رضا گيلاني پاران حوالدار لالڪ جان شهيد کي 27هين ورسيءَ تي خراج عقيدت پيش

اسلام آباد – 06 جولاءِ (اي پي پي) وقتي صدر سيد يوسف رضا گيلاني حوالدار لالڪ جان شهيد جي 27هين ورسيءَ جي موقعي تي کيس زبردست لفظن ۾ خراج عقيدت پيش ڪندي چيو آهي ته ملڪ جي ان بهادر فرزند پاڪستان جي دفاع جي لاءِ پنهنجي جان جو نذرانو پيش ڪري جرئت، فرض شناسي ۽ حب الوطني جو اهڙو روشن مثال قائم ڪيو جيڪو سدائين قوم جي لاءِ مشعل راهه رهندو، ڪارگل جي محاذ تي حوالدار لالڪ جان شهيد جي بي مثال استقامت ۽ بهادري اسان جي عسڪري تاريخ جو هڪ روشن باب آهي جنهن تي پوري قوم کي فخر آهي. سومر ڏينهن ايوان صدر جي پريس ونگ پاران جاري بيان موجب وقتي صدر چيو ته حوالدار لالڪ جان شهيد 7 جولاءِ 1999ع تي ڪارگل جنگ دوران شديد گولاباري ۽ دشمن جي مسلسل حملن جي باوجود غيرمعمولي بهادري ۽ پيشيواراڻي مهارت جو مظاهرو ڪندي پنهنجي دفاعي پوزيشن جو آخري ساهه تائين تحفظ ڪيو ۽ ملڪ جي دفاع ۾ شهادت ماڻي. هن چيو ته ملڪ جي لاءِ ڏني ويندڙ اهڙيون عظيم قربانيون سدائين قومي تاريخ جو قيمتي سرمايو رهنديون ۽ ايندڙ نسلن کي حب الوطني، عزم ۽ ايثار جو درس ڏينديون رهنديون. سيد يوسف رضا گيلاني چيو ته پاڪستان جي هٿياربند فوج جي آفيسرن ۽ جوانن هر دور ۾ ملڪي خودمختياري، آزادي ۽ سرحدن جي تحفظ جي لاءِ لازوال قربانيون ڏنيون آهن. پوري قوم پنهنجي شهيدن جي عظمت کي سلام پيش ڪري ٿي ۽ انهن جي گهرڀاتين جي صبر، حوصلي ۽ ايثار کي انتهائي قدر ۽ احترام جي نگاهه سان ڏسي ٿي. هن چيو ته شهيدن جون قربانيون قومي اتحاد، دفاعي قوت ۽ وطن سان وابستگي جي جذبي کي وڌيڪ مستحڪم ڪن ٿيون ۽ قوم پنهنجي انهن عظيم هيروز کي ڪڏهن به نه وساريندي. وقتي صدر سيد يوسف رضا گيلاني دعا ڪئي ته الله تعالى حوالدار لالڪ جان شهيد جا درجا بلند فرمائي، کيس جنت ۾ اعلى مقام عطا ڪري ۽ پاڪستان کي سدائين امن، استحڪام، ترقي ۽ خوشحالي سان نوازي.