پاڪستاني حاجين پاران رياض الجنة جي حاضرين جي شروعات، 335 پاڪستانين پاران رياض الجنة جي حاضري

مدينو شريف-21 اپريل (اي پي پي) مسجد نبويﷺ ۾ پاڪستاني حاجين لاءِ رياض الجنة جي حاضرين جي باقائده شروعات ٿي وئي. مدينو شريف جي ڪوآرڊينيٽر ڪاشف حسين، ڊائريڪٽر زاهد سهيل ۽ رياض الجنة ٽيم جي انچارج زبير نيازي جي صدارت هيٺ هڪ اجلاس ۾ انتظامن جو جائزو ورتو ويو. 335 پاڪستاني حاجي جن ۾ 173 مرد ۽ 162 عورتون شامل آهن، رياض الجنة ۾ حاضري ڀري. انهن حاضرين لاءِ سعودي عملدارن کان خاص اجازت به حاصل ڪئي وئي. عملدارن موجب حاجين جي رَش کي منظم رکڻ لاءِ خاص وقت مقرر ڪيا ويا آهن. مرد زائرين کي ٻنپهر کان سومهڻيءَ جي نماز تائين ۽ وري ٻنپهر 2 وڳي کان فجر نماز تائين حاضريءَ جي اجازت هوندي، جڏهن ته عورتن لاءِ فجر نماز کان صبح 11 وڳي تائين ۽ پوءِ سومهڻيءَ جي نماز کانپوءِ رات 12 وڳي تائين جا وقت مختص ڪيا ويا آهن. سموري چُرپر ۽ حرڪت جي نگراني مذهبي معاملن واري وزارت جي عملي خادم الحجاج ذريعي ڪئي پئي وڃي ته جيئن زائرين کي هڪ منظم ۽ آسان تجربو فراهم ڪري سگهجي. عملدارن جو چوڻ آهي ته مسجد نبويﷺ اندر نهايت مقدس مقام رياض الجنة تائين پهچ کي يقيني بڻائڻ مديني ۾ موجود پاڪستاني زائرين لاءِ پهرين ترجيح آهي.