اي آءِ زميني سطح تي موسمياتي ڪمزورين جي نشاندهي ۾ مدد ڏئي سگهي ٿي، مختلف ٽيڪنالاجيز ۽ نگراني جي نظام کي گڏائي هڪ واچ ڊاگ طور تي ڪم ڪري سگهي ٿي: ڊاڪٽر مصدق ملڪ

اسلام آباد-10 فيبروري (اي پي پي) موسمياتي تبديلي ۽ ماحولياتي هم آهنگي واري وفاقي وزير ڊاڪٽر مصدق ملڪ چيو آهي ته اي آءِ کي شامل ڪندي هلندڙ وقت غير معمولي احتياط جي ضرورت آهي ۽ متاثر ماڻهن کي وقت سر ۽ اثرائتي انداز ۾ متبادل ڪردارن ۾ آڻڻ اڻٽر هوندو، اي آءِ زميني سطح تي موسمياتي ڪمزورين جي نشاندهي ۾ مدد ڏئي سگهي ٿي، مختلف ٽيڪنالاجيز ۽ نگراني جي نظام کي گڏائي هڪ واچ ڊاگ طور تي ڪم ڪري سگهي ٿي. اهڙن خيالن جو اظهار هن قومي اي آءِ ورڪشاپ کي خطاب ڪندي ڪيو. وفاقي وزير قومي سطح تي رٿيل مصنوعي ذهانت ورڪشاپ جي پينل کي خطاب ڪندي موسمياتي نظم و نسق، عوامي پاليسي ۽ قدرتي آفتن کي مُنهن ڏيڻ ۾ اي آءِ جي اثرائتي ڪردار تي روشني وڌي. وفاقي وزير چيو ته اي آءِ جو سڀ کان اهم ۽ مؤثر استعمال ان جي اڳڪٿي ۽ ازالو ڪرڻ جي صلاحيت ۾ آهي. هن چيو ته پاڪستان ۾ ڊيٽا محدود ۽ وِکريل آهي جنهن سبب مؤثر سازيءَ ۾ ڏُکيائي درپيش آهي. پاڪستان وزيبلٽي رپورٽ جو حوالو ڏيندي ڊاڪٽر مصدق ملڪ ٻُڌايو ته رپورٽ موجب ملڪ جي سڀ کان وڌيڪ موسمياتي طور تي حساس 20 ضلعن مان 18 بلوچستان جڏهن ته 2 ڪي پي ڪي ۾ واقع آهن. وفاقي وزير چيو ته اهي رپورٽون اسان کي واضح طور تي اهو سمجهڻ ۾ مدد ڏين ٿيون ته خطرا ڪٿي موجود آهن ۽ اي آءِ تي ٻَڌل ماڊلنگ ذريعي اهڙا قدم ترتيب ڏئي سگهجن ٿا جيڪي وڌ کان وڌ اثر جوڙين. هن چيو ته اي آءِ زميني سطح تي موسمياتي ڪمزورين جي نشاندهي ۾ مدد ڏئي سگهي ٿي، مختلف ٽيڪنالاجيز ۽ نگراني جي نظام کي گڏائي هڪ واچ ڊاگ طور تي ڪم ڪري سگهي ٿي، ان ذريعي ڪنهن امڪاني آفت جي اڳواٽ نشاندهي ممڪن ٿي وڃي ٿي ته جيئن وقت سر قدم کڻي سگهجن. هن چيو ته هن وقت دنيا هڪ ٽيڪنالاجي انقلاب مان گذري رهي آهي جتي مصنوعي ذهانت کي مرڪزي پليٽ فارم بڻائي مختلف ٽيڪنالاجيز جو گڏيل انضمام ٿي رهيو آهي، جڏهن ته هن خبردار ڪيو ته اي آءِ تي انڌو اعتماد انساني فهم ۽ فيصلي سازيءَ کي ڪمزور ڪري سگهي ٿو، ان لاءِ ان جي استعمال ۾ احتياط ۽ نگراني نهايت ضروري آهي. وفاقي وزير چيو ته مصنوعي ذهانت جي ايندڙ مرحلي ۾ اي آءِ ايجنٽس جو ظهور ٿي رهيو آهي، جيڪي ڪجهه شعبن ۾ انساني ملازمتن جي جڳهه وٺي سگهن ٿا. هن چيو ته عوامي شعبي ۾ اي آءِ کي شامل ڪندي غير معمولي احتياط جي ضرورت آهي ۽ متاثر ماڻهن کي وقت سر ۽ اثرائتي انداز ۾ متبادل ڪردارن ۾ آڻڻ اڻٽر هوندو. هن چيو ته جيتوڻيڪ ٽيڪنالاجي ذريعي وقتي طور تي پيداواري صلاحيت ۾ واڌ ممڪن آهي جڏهن ته ڊگهي مُدي واري ترقي ۽ پيداواري صلاحيت لاءِ جدت ۽ ايجاد اڻٽر آهي. پينل ڳالهين ۾ ناڻي ۽ محصولن واري وفاقي وزير سينيٽر محمد اورنگزيب، رٿابندي واري وفاقي وزير پروفيسر احسن اقبال ۽ آءِ ٽي ۽ ٽيلي ڪميونيڪيشن واري وفاقي وزير شزه فاطمه خواجه سميت مختلف شعبن سان تعلق رکندڙ ماهرن، پاليسي سازن ۽ ڌُرين شرڪت ڪئي.