شب برات اسلامي تقويم جي انتهائي بابرڪت راتين مان هڪ آهي: صدر آصف علي زرداري

اسلام آباد- 04 فيبروري (اي پي پي) صدر آصف علي زرداري چيو آهي ته شب برات اسلامي تقويم جي انتهائي بابرڪت راتين مان هڪ آهي، جيڪا پندرهين شعبان المعظم تي اچي ٿي، ان مقدس رات کي الله تعاليٰ جي رحمت، مغفرت ۽ انسانن جي لاءِ فيصلن جي رات قرار ڏنو ويو آهي، هي رات انسان کي توبهه ۽ استغفار، نفس جو گهيراءٌ ۽ الله تعاليٰ طرف رجوع جو خصوصي ۽ قيمتي موقعو فراهم ڪري ٿي، عالمن موجب شب برات اها مبارڪ رات آهي جنهن ۾ بخشش، رحمت ۽ نجات جا فيصلا صادر ٿين ٿا. ايوان صدر جي پريس ونگ پاران جاري بيان موجب صدر آصف علي زرداري شب برات جي موقعي تي پنهنجي پيغام ۾ چيو ته شب برات مسلمان امت جي لاءِ الله تعاليٰ جي خصوصي عنايتن، رحمت ۽ مغفرت حاصل ڪرڻ جي عظيم رات آهي، ان بابرڪت موقعي تي آئون پوري پاڪستاني قوم کي دلي خير جو پيغام پيش ڪريان ٿو، هي رات اسان کي الله تعاليٰ جي بي پناهه رحمت، ان جي ڪرم ۽ فضل ۽ انسانن سان ان جي شفقت جي گهري ياد ڏياري ٿي. هن چيو ته شب برات اسان کي دعوت ڏي ٿي ته اسان پنهنجي اعمال جو سنجيدگي سان گهيراءُ ڪريون، الله تعاليٰ جي آڏو سچي دل سان توبهه ڪريون ۽ پنهنجي انفرادي ۽ گڏيل زندگين کي نيڪي، تقويٰ ۽ اصلاح جي راهه تي گامزن ڪريون، هي مقدس رات انسان کي پنهنجي ڪوتاهين تي ندامت ۽ مستقبل جي لاءِ بهتر ۽ صحيح رستو اختيار ڪرڻ جي ترغيب ڏي ٿي. هن چيو ته اسلام اسان کي صبر، درگذر، رحمدلي ۽ گڏيل همدرديءَ جو درس ڏي ٿو ۽ شب برات انهن اعليٰ اخلاقي قدرن کي اختيار ڪرڻ جو عملي موقعو فراهم ڪري ٿي، هي رات اسان کي ياد ڏياري ٿي ته الله تعاليٰ جي رحمت بي حد ۽ بي حساب وسعت رکندڙ آهي جنهن ۾ هو پنهنجي بندن جي لاءِ مغفرت جا دروازا کولي ڇڏي ٿو. صدر چيو ته آئون ان موقعي تي قوم کي اپيل ڪريان ٿو ته اسان شب برات جي برڪتن مان ڀرپور فائدو کڻندي هڪ ٻئي جي حقن جو احترام ڪريون، معاشري ۾ امن، برداشت ۽ ڀائيچاري کي فروغ ڏيون ۽ ملڪ جي ترقي، استحڪام ۽ خوشحالي جي لاءِ پنهنجو مثبت ۽ تعميري ڪردار ادا ڪريون، اڄ جڏهن پاڪستان کي مختلف نوعيت جا چئلينجز درپيش آهن، شب برات اسان کي اميد، اصلاح ۽ گڏيل اتحاد جو پيغام ڏي ٿي، هي رات اسان کي ان عزم جي تجديد جو موقعو فراهم ڪري ٿي ته اسان ذاتي مفادن کان مٿانهون ٿي قومي مفاد ۽ گڏيل ڀلائي کي مٿانهون رکون، آئون هن مقدس رات الله تعاليٰ آڏو دعاڳو آهيان ته هو پاڪستان کي امن ۽ سلامتي، معاشي استحڪام ۽ قومي يڪجهتي سان نوازي، اسان کي هڪ ٻئي جي لاءِ آسانيون پيدا ڪرڻ جي توفيق عطا فرمائي ۽ اسان جي ڪوششن کي ملڪ ۽ قوم جي ڀلائي لاءِ شرف قبوليت بخشي، الله تعاليٰ اسان کي شب برات جي پيغام کي صحيح معنيٰ ۾ سمجهڻ، ان تي عمل ڪرڻ ۽ پنهنجي زندگين ۾ مثبت ۽ پائيدار تبديلي آڻڻ جي توفيق عطا فرمائي.