پيٽروليم واري وفاقي وزير سان برطانوي هاءِ ڪمشنر جي ملاقات

اسلام آباد- 20 جنوري (اي پي پي) پيٽروليم واري وفاقي وزير علي پرويز ملڪ سان پاڪستان ۾ مقرر برطانوي هاءِ ڪمشنر جين ميريٽ ملاقات ڪئي، جنهن ۾ تيل، گيس ۽ معدنيات جي شعبن ۾ ٻه طرفي سهڪار کي هٿي وٺرائڻ تي خيالن جي ڏي وٺ ڪئي وئي. ملاقات دوران هاءِ ڪمشنر چيو ته پاڪستان ۾ بي پناهه صلاحيت موجود آهي ۽ معاشي شعبي ۾ اهم سڌارا جاري آهن. هن پاڪستان سان سهڪار کي وڌيڪ مضبوط بنائڻ ۾ برطانيه جي گهري دلچسپيءَ جو اظهار ڪيو. ملاقات ۾ تيل ۽ گيس جي ڳولها ۽ معدنيات جي شعبن ۾ سهڪار جي مختلف رُخن تي ڳالهه ٻولهه ڪئي وئي. وفاقي وزير ان ڳالهه تي زور ڀريو ته سيڙپڪارن جو اعتماد بحال ڪرڻ ۽ سيڙپڪاريءَ کي هٿي وٺرائڻ لاءِ شفاف ۽ اعتماد جوڳو طريقو اڻٽر آهي. هن چيو ته حڪومت توانائي جي شعبي ۾ اداري جاتي سگهه کي مضبوط بنائڻ لاءِ ٺوس قدم کڻي رهي آهي. ان موقعي تي معدنيات جي شعبي ۾ سهڪار جي اڳڀرائيءَ جو به جائزو ورتو ويو، جنهن تي ڌُرين برٽش جيولوجيڪل سروي ۽ جيولوجيڪل سروي آف پاڪستان وچ ۾ وڌندڙ سهڪار کي ساراهيو، جنهن جو مقصد هڪ جامع سگهه واري پروگرام جي جوڙجڪ آهي. هاءِ ڪمشنر ان قدم لاءِ 400 ملين آمريڪي ڊالرن تائين جي معاونت جو اشارو ڏنو. وفاقي وزير چيو ته حتمي شڪل اختيار ڪرڻ کان پوءِ هي پروگرام پاڪستان جي معدنيات جي شعبي جي ترقيءَ لاءِ نهايت فائديمند ثابت ٿيندو. وفاقي وزير هڪ اثرائتي ۽ مضبوط ريگيوليٽر جي اهميت تي زور ڀريندي چيو ته تيل ۽ گيس جي شعبي جي بهتر ڪارڪردگي لاءِ اوگرا جو ڪردار اهم آهي ۽ ان جي معاونت يا نئين سر تنظيم سازيءَ ۾ برطانيا اهم ڪردار ادا ڪري سگهي ٿو. هن اوگرا جي نئين سر تنظيم سازي ۽ سگهه سازي لاءِ جامع سڃاڻپ جو جائزو وٺڻ جي تجويز ڏني، جنهن ۾ جديد گورننس ٽولز جو تعارف به شامل آهي. هاءِ ڪمشنر ان ڳالهه تي اتفاق ڪيو ته هي ريگيوليٽر شعبي جي پائيداريءَ ۾ اهم ڪردار ادا ڪري ٿو ۽ ان نوعيت جي مشق کي گڏيل طور تي دريافت ڪري سگهي ٿو. وفاقي وزير برطانوي ڪمپنين کي پاڪستان ۾ موقعا تلاش ڪرڻ جي دعوت ڏيندي ان جي وڌيڪ شموليت جي حوصلا افزائي ڪئي. جين ميريٽ آف شور ايڪسپلوريشن ۾ برطانيه جي مضبوط صلاحيتن جو حوالو ڏيندي چيو ته ان شعبي ۾ سهڪار جا وسيع امڪان موجود آهن. وفاقي وزير وڌيڪ چيو ته پاڪستان جي تازي آف شور واڪ جي عمل کي هاڪاري ردِعمل مليو آهي، جنهن ۾ ترڪ پيٽروليم جي شرڪت شامل آهي ۽ تجويز ڏني ته برطانوي ڪمپنيون پاڪستان جي سرڪاري ادارن سان ڀائيواري ذريعي گڏيل طور تي تلاش ۽ پيداوار جي سرگرمين ۾ حصو وٺن. وفاقي وزير علي پرويز ملڪ برطانوي هاءِ ڪمشنر کي 8 ۽ 9 اپريل تي منعقد ٿيندڙ پاڪستان منرلز انويسٽمينٽ (پي ايم آءِ ايف) ۾ شرڪت جي دعوت به ڏني. جين ميريٽ گذريل سال رٿيل پي ايم آءِ ايف کي متاثر ڪندڙ قرار ڏيندي چيو ته برطانيه طرفان ايندڙ فورم ۾ اثرائتي شرڪت کي يقيني بنائڻ لاءِ خاص طور تي سروس فراهم ڪندڙ برطانوي ڪمپنين سان رابطو ڪيو ويندو. ملاقات ۾ ٻنهي ڌُرين توانائي ۽ معدنيات جي شعبن ۾ پاڪستان ۽ برطانيه وچ ۾ سهڪار کي وڌيڪ گهرو ڪرڻ جي عزم جو ورجاءُ ڪيو، جنهن جو مقصد پائيدار ترقي، سيڙپڪاريءَ کي هٿي وٺرائڻ ۽ اداري جاتي مضبوطي آهي.