پاڪستان قوم طور قائداعظم جي ويزن، اصولن ۽ اخلاقي قدرن کي زندهه رکڻ لاءِ پُرعزم آهي: سيد يوسف رضا گيلاني

اسلام آباد-29 ڊسمبر (اي پي پي) سينيٽ چيئرمين سيد يوسف رضا گيلاني چيو آهي ته پاڪستان جو باني قائداعظم محمدعلي جناح هڪ مدبر سياستدان هو، سندس اڳواڻي ديانت، آئيني جدوجهد ۽ انصاف سان پُختي وابستگي ذريعي تاريخ جو رُخ موڙيو. پاڪستان قوم طور قائداعظم جي ويزن، اصولن ۽ اخلاقي قدرن کي زندهه رکڻ لاءِ پُرعزم آهي. ملڪ جو مستقبل نوجوان نسل سان واڳيل آهي، کين قائد جي ويزن موجب اتحاد، نظم و ضبط، آئين پسندي ۽ قانون جي حڪمرانيءَ جي اصولن کي اختيار ڪرڻ گهرجي. هن اهڙو اظهار ايوانِ صدر ۾ باباءِ قوم جي 149 جنم ڏينهن جي موقعي تي ”قائد ۽ ٻار“ جي موضوع تي رٿيل تقريب کي خطاب ڪندي ڪيو. تقريب ۾ مختلف اسڪولن جي شاگردن، قومي گيتن، تلاوت، نعت ۽ دلڪش پرفارمنس ذريعي باباءِ قوم قائداعظم محمدعلي جناح کي خراجِ عقيدت پيش ڪيو. تقريب کي خطاب ڪندي سينيٽ چيئرمين چيو ته قائد ۽ ٻار جي سالياني روايت ان ڳالهه جي عڪاسي آهي ته پاڪستان قوم طور قائداعظم جي ويزن، اصولن ۽ اخلاقي قدرن کي زندهه رکڻ لاءِ پُرعزم آهي. هن قائداعظم کي اهڙو مدبر سياستدان قرار ڏنو جنهن جي اڳواڻي ديانت، آئيني جدوجهد ۽ انصاف سان پُختي وابستگي ذريعي تاريخ جو هڪ رُخ موڙيو. سيد يوسف رضا گيلاني چيو آهي ته قائداعظم جمهوري ۽ آئيني طريقن تي پُختو يقين رکندو هو ۽ هن آل انڊيا مسلم ليگ کي هڪ عوامي سياسي تحريڪ ۾ تبديل ڪيو جيڪو 1940ع جي لاهور قرارداد تي نتيجا ڏيندڙ سان ٿيو. هن واضح ڪيو ته پاڪستان جو قيام احتجاج، هنگامن يا ڀڃ ڊاهه سان نه پر منتقي ڳالهين، قانوني بصيرت ۽ اخلاقي اٿارٽي ذريعي عمل ۾ آيو. قائداعظم جي 11 آگسٽ 1947ع جي تاريخي تقرير جو حوالو ڏيندي سينيٽ چيئرمين چيو ته قائداعظم محمدعلي جناح پاڪستان کي هڪ اهڙي جديد جمهوري رياست طور ڏسڻ چاهيو ٿي جيڪو مساوات، مذهبي آزادي ۽ قانون جي حڪمرانيءَ تي ٻَڌل هجي، جتي سمورن شهرين کي مذهب يا عقيدي کان هٽي ڪري حق حاصل هجن. هن ان ڳالهه تي زور ڀريو ته بدعنواني، پنهنجا نوازي ۽ ناانصافيءَ جي خاتمي بابت قائداعظم جون هدايتون اڄ به پوريءَ طرح مؤثر ۽ قابلِ عمل آهن. سينيٽ چيئرمين پاڪستان جي قيام جي شروعاتي سالن ۾ قائداعظم جي اڻٿڪ خدمتن کي خراجِ تحسين پيش ڪندي چيو ته شديد بيماريءَ باوجود هن قومي ادارن جي قيام، پناهگيرن جي بحالي ۽ عالمي برادريءَ ۾ پاڪستان جي مقام جي استحڪام لاءِ مسلسل محنت ڪئي. هن عوامي عهديدارن تي زور ڀريو ته هو ذاتي مفادن تي قومي مفادن کي ترجيح ڏين ۽ ادارا شفافيت ۽ ديانت سان ڪم ڪن، نوجوانن جي ڪردار تي زور ڀريندي سيد يوسف رضا گيلاني چيو ته پاڪستان جي ترقي ان ڳالهه سان واڳيل آهي ته نوجوان قائداعظم جي رهنما اصولن ايمان، نظم و ضبط ۽ بي لوث خدمت کي اختيار ڪن ۽ کين هڪ خوشحال جامع پاڪستان جي تعمير لاءِ عملي شڪل ڏين. سينيٽ چيئرمين تعليم واري مملڪتي وزير، پارليامينٽ جي ميمبرن، سفارتي برادري جي ميمبرن ۽ شاگردن سان گڏ باباءِ قوم قائداعظم محمدعلي جناح جي 149هين يومِ پيدائش جو ڪيڪ ڪٽيو.