ڪي پي ڪي ۾ گورنر راڄ بابت پارٽيءَ ۾ ڪا ڳالهه ٻولهه نه ٿي، جڏهن ته پي ٽي آءِ پنهنجي سياست ذريعي اهڙيون حالتون پيدا ڪري رهي آهي: بلاول ڀٽو زرداري

چنيوٽ-11 ڊسمبر (اي پي پي) پاڪستان پيپلز پارٽيءَ جي چيئرمين بلاول ڀٽو زرداري چيو آهي ته ڪي پي ڪي ۾ گورنر راڄ بابت پارٽيءَ ۾ ڪا به ڳالهه ٻولهه نه ٿي، جڏهن ته پي ٽي آءِ پنهنجي سياست ذريعي اهڙيون حالتون پيدا ڪري رهي آهي جنهن سان وفاقي حڪومت سخت فيصلا ڪرڻ تي مجبور ٿي سگهي ٿي. اها ڳالهه ضلعي چنيوٽ جي علائقي رجوعه سادات ۾ پ پ وچ پنجاب جي جنرل سيڪريٽري سيد حسن مرتضيٰ جي والد جي لاڏاڻي تي تعزيت ۽ فاتحه خواني کانپوءِ ميڊيا سان ڳالهائيندي ڪيو. بلاول ڀٽو زرداري چيو ته گورنر راڄ آئيني آپشن ضرور آهي پر نه ان تي ڪو فيصلو ٿيو آهي ۽ نه ئي پارٽيءَ اندر ڪا باقائدگي مشاورت ڪئي وئي. هن چيو ته پي ٽي آءِ جي سياست مسلسل اشتعال انگيزي ۽ محاذ آرائي تي ٻَڌل آهي ۽ هو اهڙيون حالتون پيدا ڪرڻ ۾ مصروف آهي جنهن سان ملڪ ۾ سياسي ڇڪتاڻ وڌي رهي آهي. هن آءِ ايس آءِ جي اڳوڻي ڊي جي جنرل (ر) فيض حميد کي ٻُڌايل 14 سالن جي قيد جي سزا کي تاريخي فيصلو قرار ڏيندي چيو ته هي هڪ انتهائي اهم اڳڀرائي آهي جنهن سان طاقت جي غلط استعمال ۽ سياسي مداخلت جو دروازو بند ٿيندو. بلاول ڀٽو چيو ته وڌيڪ جاچ ۽ ري انويسٽيگيشن به متوقع آهي ۽ هي فيصلو واضح پيغام آهي ته ڪوبه شخص قانون کان مٿاهون ناهي. بلاول ڀٽو زرداري چيو ته پنهنجي سياسي زندگيءَ ۾ هن ٻن ماڻهن کي پنهنجي وقت جو فرعون بڻجندي ڏٺو، هڪ عمران خان کي جيڪو وزيراعظم هوندي سياسي مخالفن کي جيل موڪلڻ جون ڌمڪيون ڏيندو رهيو، عورتن کي نشانو بڻايو ۽ طاقت جي نشي ۾ سياسي ماحول کي گدلو ڪري ڇڏيو. ٻيو فيض حميد جنهن سياست، ميڊيا ۽ ادارن ۾ مداخلت کي معمول بڻائي ملڪ اندر عدم توازن پيدا ڪيو. اڄ ٻئي قانون ۽ تاريخ آڏو جوابدار آهن. بلاول ڀٽو زرداري چيو ته عمران خان جي حڪومت ۾ مخالفن ۽ انهن جي گهر جي عورتن کي نشانو بڻائي انتهائي ناڪاري روايت قائم ڪئي ۽ هو اڄ پاڻ پنهنجي سياسي رويي جا نتيجا ڀوڳي رهيو آهي. آئيني سڌارن جي حوالي سان ڳالهائيندي هن چيو ته آئيني عدالت جو قيام پ پ ۽ مسلم ليگ (ن) وچ ۾ چارٽر آف ڊيموڪريسيءَ ۾ ڪيل وعدو هو جنهن کي پورو ڪيو ويو. 27 ترميم ذريعي آئيني عدالتن ۾ سڀني صوبن کي هڪجهڙي نمائندگي يقيني بڻائي وئي ۽ ان عدالت جو پهريون چيف جسٽس ڏکڻ پنجاب سان تعلق رکي ٿو جيڪو پ پ جي پُراڻي مؤقف جي ڪاميابي آهي. ملڪي معاشي صورتحال جي حوالي سان بلاول ڀٽو چيو ته پي ڊي ايم حڪومت ملڪ کي ڏيوالو ٿيڻ جي خطري کان ڪڍيو ۽ معاشي استحڪام جا بنياد رکيا، جيتوڻيڪ هاڻ ضرورت ان ڳالهه جي آهي ته پرڏيهي سيڙپڪاريءَ سان گڏوگڏ روانگي واپار جي واڌ تي ڌيان ڏيڻ گهرجي. هن چيو ته زرعي شعبو ملڪ جي معاشي ڪرنگهي جي هڏي آهي ۽ سنڌ ۾ ننڍن آبادگارن کي ڊي اي پي ۽ يوريا تي سبسڊي ڏئي سندن مدد ڪئي وئي آهي. اهڙيءَ طرح پوري ملڪ ۾ زرعي شعبي کي مضبوط بڻائڻ وقت جي ضرورت آهي. سندس چوڻ هو ته پ پ ملڪ جي معاشي بحران جي حل لاءِ پنهنجو ڪردار ادا ڪندي رهندي ۽ اميد ڪئي پئي وڃي ته اڄ جي عدالتي فيصلي کانپوءِ ملڪ ۾ سياسي انجنيئرنگ مداخلت ۽ غير آئيني قدمن جو دروازو هميشه لاءِ بند ٿي ويندو.